Read Pennsylvania German Sacharia 14 Bible Online

Sacharia 14 - Pennsylvania German bible

Sacharia 14

¹Gukket moll, en dawk is am kumma fa da HAH, vann eiyah feinda eich rawva un eiyah shtoft fadayla unnich sich selvaht fannich eich.

²Ich zayl aw awl di heida zammah geddahra an Jerusalem fa fechta geyyich di shtatt. Di shtatt zayld ivvah-gnumma sei, di heisah grawbt un di veibsleit vadda fashand. Dihelft funn di leit in di shtatt vadda vekk gnumma, avvah di ivvahricha in di shtatt bleiva datt.

³No gayt da HAH naus un fecht geyyich selli heida, vi eah difoah kfochta hott an di zeida funn greek.

⁴Uf sellem dawk zayla sei fees uf em Ayl-Berg shtay east funn Jerusalem. Da Ayl-Berg zayld fashpalda funn di east zu di west un's gebt en grohsi valley mitt dihelft fumm berg am nadda gay un di anna helft am sauda gay.

⁵Diah zaylet shpringa un eich fabutza deich di valley es deah berg fashpald, veil di valley so veit gayt es Azel. Diah zaylet fatt shpringa vi diah sind funn di eaht-bayben in di dawwa fumm Kaynich Usia funn Juda. No kumd da HAH mei Gott, un awl di heilicha mitt eem.

⁶Uf sellem dawk zayld's kenn licht, un kenn kald adda frosht havva.

⁷Es zayld en dawk sei es bekand is zumm HAH—nett dawk un nett nacht. Vann ohvets kumd zayld's hell sei.

⁸Uf sellem dawk zayld levendich vassah aus Jerusalem lawfa. Dihelft lawft in da say in di east, un dihelft in da say in di west; dess zayld im summah sei un aw im vindah.

⁹Da HAH zayld kaynich sei ivvah di gans eaht. In sellem dawk zayld da HAH da aynsisht sei un aw sei nohma da aynsisht.

¹⁰Es gans land funn Geba biss an Rimmon sauda funn Jerusalem vatt ayva gmacht. Avvah Jerusalem vatt ufkohva un bleibt in iahrem blatz fumm doah es Benjamin hayst biss an's Eahsht-Doah un zumm Ekk-Doah, un fumm Tavvah es Hananeel hayst biss an di kaynicha vei-pressa.

¹¹Leit zayla drinn voona, un's zayld kenn fluch may uf sich havva un zammah grissa vadda. Jerusalem zayld in fridda layva.

¹²Dess is di granket es da HAH uf awl di leit in di lendah bringa zayld es geyyich Jerusalem kfochta henn. Es flaysh uf iahra leib zayld fafaula diveil es si noch uf iahra fees shtayn, iahra awwa zayla fafaula in iahra awwa-lechah un iahra zunga in iahra meilah.

¹³Uf sellem dawk zayld da HAH leit vundahboah fagelshtaht macha. Yaydah mann zayld hohld nemma an seim nochbah sei hand un si fechta mitt-nannah.

¹⁴Juda zayld aw fechta an Jerusalem. Di koshtboahri sacha funn awl di lendah datt rumm vadda zammah ksammeld, so vi gold, silvah un feel glaydah.

¹⁵Dee granket zayld aw uf di geil un aysla, di kamayla un donkeys un awl di diahra falla es in selli heida iahra camps sinn.

¹⁶No zayla awl selli es ivvahrich sinn funn di heida es geyyich Jerusalem kfochta henn, nuff gay alli yoah un da Kaynich, da Awlmechtich HAH, ohbayda un's Lawb-Heisli-Fesht halda.

¹⁷Vann ennichi leit uf di eaht nett nuff an Jerusalem gayn fa da Kaynich, da Awlmechtich HAH, ohbayda, dann zayla iahra lendah kenn reyya greeya.

¹⁸Vann di leit funn Egypta nett nuff gayn un sich veisa, dann zayla si kenn reyya havva. Di granket es da HAH uf awl di heida bringd vann si nett nuff gayn un's Lawb-Heisli-Fesht halda, zayld uf di Egyptah kumma.

¹⁹Dess zayld da shtrohf sei es uf Egypta kumd un uf awl di anra heida es nett nuff gayn un's Lawb-Heisli-Fesht halda.

²⁰Uf sellem dawk zayld's kshrivva sei uf di geils-ksha-bella, “HEILICH ZUMM HAH.” Un di kesla im HAH sei haus zayla sei vi di bowls fannich em awldah.

²¹Un alli kessel in Jerusalem un Juda zayld heilich sei zumm Awlmechticha HAH. Alli-ebbah es kumd fa opfahra zayld samm funn di kesla nemma fa kocha drinn. An selli zeit zayla kenn Kanaaniddah im Awlmechticha HAH sei haus sei.