Read Pennsylvania German Sacharia 2 Bible Online

Sacharia 2 - Pennsylvania German bible

Sacharia 2

¹No habb ich ufgegukt, un datt fannich miah voah en mann mitt en mess-shnuah in sei hand!

²Ich habb kfrohkt, “Vo bisht du am hee gay?” Eah hott ksawt zu miah, “Fa gay un Jerusalem messa, fa ausfinna vi brayt un vi lang es es is.”

³No is da engel ganga es am shvetza voah zu miah, un en anra engel is kumma een ohdreffa,

⁴un hott ksawt zu eem, “Shpring, un sawk zu sellah yung mann, ‘Jerusalem zayld en shtatt sei unni vanda veil so feel mensha un fee drinn is.

⁵Un ich selvaht zayl en vand funn feiyah sei drumm rumm,’ sawkt da HAH, ‘un zayl di hallichkeit sei in di mitt funn iahra.’”

⁶“Kummet! Kummet! Shpringet vekk fumm land in di natt,” sawkt da HAH, “ich habb eich ausnannah kshtroit zu di fiah vinda fumm himmel,” sawkt da HAH.

⁷“Kumm, oh Zion, shpring fatt, du es mitt di dochtah funn Babylon voonsht!”

⁸Fa dess is vass da Awlmechtich HAH sawkt, deah es miah di eah gevva hott un mich kshikt hott geyyich di heida es eich grawbt henn: “Veah eich ohraykt, deah raykt da abbel funn meim awk oh.

⁹Ich zayl geviss mei hand uf hayva geyyich si un si zayla grawbt sei bei selli es als iahra bunds-gnechta voahra. No zayla diah vissa es da Awlmechtich HAH mich kshikt hott.

¹⁰Sing un sei fraylich, oh dochtah funn Zion, un gukk moll, ich zayl kumma un bei diah voona,” sawkt da HAH.

¹¹“Feel heida zayla sich zumm HAH binna an sellah dawk, un zayla mei leit vadda. Ich zayl unnich eich voona un diah zaylet vissa es da Awlmechtich HAH mich zu eich kshikt hott.

¹²Da HAH zayld Juda eahva fa sei dayl im heilicha land un zayld Jerusalem viddah sei shtatt macha.

¹³Seind shtill fannich em HAH, awl mensha, fa da HAH hott sich ufgraykt funn seim heilicha voon-blatz.”