Read Pennsylvania German Sacharia 3 Bible Online

Sacharia 3 - Pennsylvania German bible

Sacharia 3

¹No hott eah miah da hohchen-preeshtah Joshua gvissa. Eah voah am fannich em engel fumm HAH shtay, un da Satan hott an sei rechtsi seit kshtanna fa een pshuldicha.

²Da HAH hott ksawt zumm Satan, “Da HAH soll dich zanka, Satan! Loss da HAH es Jerusalem leeb hott, dich zanka! Is deah mann nett vi en brennichah shtekka es aus em feiyah gnumma is?”

³Nau da Joshua voah geglayt mitt drekkichi glaydah diveil es eah fannich em engel kshtanna hott.

⁴Da engel hott ksawt zu selli es fannich eem kshtanna henn, “Nemmet sei drekkichi glaydah ab.” No hott eah ksawt zumm Joshua, “Gukk moll, ich habb dei sinda vekk gnumma, un zayl dich glayda mitt feini glaydah.”

⁵No hott eah ksawt, “Doond en sauvah duch um sei kobb rumm vikla.” Si henn no en sauvah duch um sei kobb rumm un henn een geglayt diveil es da engel fumm HAH datt kshtanna hott.

⁶Da engel fumm HAH hott da Joshua no famohnd, un hott ksawt,

⁷“Dess is vass da Awlmechtich HAH sawkt: ‘Vann du in mei vayya lawfsht un mei deensht ausdrawksht, dann solsht du foah gay in meim haus un in mei courts, un ich gebb diah's recht fa shvetza mitt selli es do shtayn.

⁸Nau heich, du hohchen-preeshtah Joshua, un aw dei freind es datt fannich diah hokka. Diah sind en zaycha funn goodi sacha am kumma: Ich zayl mei gnecht, Da Nasht, kumma lossa.

⁹Gukket moll da shtay es ich fannich da Joshua ksetzt habb. Uf demm aynda shtay sinn sivva awwa, un ich zayl en layses nei hakka,’ sawkt da Awlmechtich HAH, ‘un ich zayl di sind funn demm land vekk nemma in ay dawk.

¹⁰In sellem dawk zayld yaydah funn eich sei nochbah frohwa fa mitt eem unnich da vei-shtokk un da feiya-bohm hokka,’ sawkt da Awlmechtich HAH.”