Read Pennsylvania German Sacharia 5 Bible Online

Sacharia 5 - Pennsylvania German bible

Sacharia 5

¹Ich habb viddah gegukt un datt voah en ausgrold babiah am fleeya deich di luft.

²Eah hott mich no kfrohkt, “Vass saynsht du?” Ich habb ksawt, “Ich sayn en ausgrold babiah am deich di luft fleeya es dreisich foos lang un fuftzay foos brayt is.”

³No hott eah ksawt, “Sell is da fluch es am naus gay is ivvah's gans land. Uf di aynd seit sawkt's es alli deeb zayld aus em land gedrivva sei, un uf di annah seit sawkt's es alli-ebbah es en falsh zeiknis gebt vatt naus gedrivva.

⁴Da Awlmechtich HAH sawkt, ‘Ich shikk deah fluch naus un eah gayt in's haus fumm deeb un in's haus funn sellah es en falsh zeiknis gebt in meim nohma. Eah zayld in sellem haus bleiva un's gans fazeahra, awl's hols un aw di shtay.’”

⁵Da engel es am shvetza voah mitt miah is zu miah kumma un hott ksawt zu miah, “Gukk moll uf un sayn vass am kumma is.”

⁶Ich habb kfrohkt, “Vass is es?” Eah hott ksawt, “Es is en koahb fa sach raus messa. Deah koahb shtayt fa di leit iahra sinda gans deich's land.”

⁷Da koahb hott en dekkel katt es gmacht voah funn lead. Da dekkel voah ufkohva un datt hott en veibsmensh drinn kokt!

⁸Da engel hott ksawt, “Dess is ungettlichkeit.” No hott eah see zrikk nunnah in da koahb kshohva un hott da koahb zu gedekt mitt em dekkel gmacht funn lead.

⁹Ich habb no ufgegukt, un datt voahra zvay veibsleit am kumma mitt flikkel es da vind gedrivva hott. Si henn flikkel katt vi selli funn en stork, un si henn da koahb nuff gedrawwa zvishich da himmel un di eaht.

¹⁰“Vo sinn si am da koahb anna nemma?” habb ich da engel kfrohkt es am shvetza voah zu miah.

¹¹Eah hott ksawt, “An's land funn Sinear vo si en tempel bauwa zayla fa see. Vann da tempel moll faddich is, vatt da koahb datt anna gedu an sei blatz.”