Read Pennsylvania German Sacharia 6 Bible Online

Sacharia 6 - Pennsylvania German bible

Sacharia 6

¹Ich habb viddah ufgegukt un datt voahra fiah veyya am raus kumma zvishich zvay berga. Di berga voahra kubbah berga.

²Da eahsht vauwa hott rohdi geil katt, da zvett vauwa hott shvatzi geil katt,

³da dritt vauwa hott veisi geil katt, un da fiaht vauwa hott shekkichi geil katt, un si voahra awl shteik.

⁴No habb ich da engel kfrohkt es am shvetza voah mitt miah, “Mei hah, vass sinn dee?”

⁵Da engel hott miah andvat gevva un hott ksawt, “Dess sinn di fiah vinda fumm himmel. Si sinn am naus gay noch demm es si fannich em Hah funn di gans veld kshtanna henn.

⁶Da vauwa mitt di shvatza geil gayt geyyich di natt, sellah mitt di veisa geil gayt geyyich di west, un sellah mitt di shekkicha geil gayt geyyich di saut.”

⁷Vo di shteika geil raus kumma sinn, voahra si hitzich fa naus ivvah di eaht gay. Un eah hott ksawt, “Gaynd naus ivvah di gans eaht!” So sinn si ivvah di gans eaht ganga.

⁸No hott eah naus groofa zu miah un hott ksawt, “Gukk moll, selli es geyyich em land funn di natt ganga sinn, henn meim Geisht roo gevva im land funn di natt.”

⁹Es vatt fumm HAH is zu miah kumma un hott ksawt,

¹⁰“Nemm di kshenkah funn selli es kfanga voahra, da Heldai, da Tobia un da Jedaia es funn Babylon kumma sinn. Sellah saym dawk gay in's haus fumm Josia, em Zephania sei boo.

¹¹Nemm's silvah un gold un mach en krohn un du en uf em hohchen-preeshtah sei kobb, da hohchen-preeshtah Joshua, em Jozadak sei boo.

¹²Sawk eem, ‘Dess is vass da Awlmechtich HAH sawkt, “Do is da mann es ‘Da Nasht’ hayst. Eah zayld ausnannah vaxa funn demm blatz un zayld da tempel fumm HAH bauwa.

¹³Es zayld een sei es da tempel fumm HAH bauwa zayld. Eah zayld geglayt sei mitt kaynichi eah un zayld roola funn sei kaynich-shtool. Funn seim kaynich-shtool zayld eah aw da preeshtah sei, un's zayld aynichah roht sei zvishich preeshtah un kaynich.”’

¹⁴Da krohn zayld im HAH sei tempel sei un zayld en ohdenkes sei zumm Heldai, Tobia, Jedaia un zumm Josia, em Zephania sei boo.

¹⁵Selli es veit vekk voona zayla kumma un helfa da tempel fumm HAH bauwa. No zaylsht du vissa es da Awlmechtich HAH mich zu diah kshikt hott. Awl dess zayld blatz nemma vann du's gebott fumm HAH dei Gott folshtendich dusht.”