Read Pennsylvania German Sacharia 8 Bible Online

Sacharia 8 - Pennsylvania German bible

Sacharia 8

¹Es vatt fumm Awlmechticha HAH is viddah zu miah kumma.

²Dess is vass da Awlmechtich HAH sawkt: “Ich habb en grohsi leevi fa Zion, un ich binn zannich mitt iahra feinda.”

³Dess is vass da HAH sawkt: “Ich zayl zrikk kumma zu Zion un zayl in Jerusalem voona. No zayld Jerusalem di ‘Shtatt funn di Voahheit’ haysa, un da berg fumm Awlmechticha HAH zayld da ‘Heilich Berg’ kaysa sei.”

⁴Dess is vass da Awlmechtich HAH sawkt: “Aldi mennah un veibsleit zayla viddah in di shtrohsa funn Jerusalem hokka, un yaydahs funn eena zayld en shtokk in di hand havva veil si so ald sinn.

⁵Di shtrohsa in di shtatt zayla foll sei mitt boova un mayt am shpeela.”

⁶Dess is vass da Awlmechtich HAH sawkt: “Vann dess ummeeklich seemd zu di leit es ivvahrich sinn an dee zeit, es zayld nett ummeeklich sei in mei awwa,” sawkt da Awlmechtich HAH.

⁷Dess is vass da Awlmechtich HAH sawkt: “Ich zayl mei leit frei shtella im land funn di east un im land funn di west.

⁸Ich zayl si zrikk bringa un si zayla in Jerusalem voona. Si zayla mei leit sei, un ich zayl iahra Gott sei in voahheit un gerechtichkeit.”

⁹Dess is vass da Awlmechtich HAH sawkt: “Losset eiyah hend shteik sei, diah es nau di sayma vadda heahret es ksawt voahra bei di brofayda vo da fuddah glaykt voah fa em Awlmechticha HAH sei haus bauwa. Seind shteik so es da tempel gebaut vatt.

¹⁰Eb selli zeit, voah kenn lohn gvest fa mensha eahvet, un sei fee henn eem nix ei gebrocht. Selli es rumm heah ganga sinn henn sich feicha missa veyyich iahra feinda, un ich habb alli-ebbah geyyich sei nochbah gedrayt.

¹¹Avvah nau zayl ich nett du zu selli vo noch ivvahrich sinn vi ich habb eahshtah,” sawkt da Awlmechtich HAH.

¹²“Si zayla iahra sohma sayya in fridda, da vei-shtokk gebt sei frucht, es land macht sacha vaxa, un da himmel lost da dau falla. Ich zayl di leit vo noch ivvahrich sinn awl dee sacha gevva.

¹³Diah leit funn Juda un Israel, vi diah als gnumma voahret fa en fluch unnich di heida, so zayl ich eich frei macha un diah zaylet en sayya sei. Feichet eich nett, un losset eiyah hend shteik sei.”

¹⁴Dess is vass da Awlmechtich HAH sawkt: “Grawt vi ich ausgmacht habb fa eich shtrohfa vo eiyah foah-feddah mich fazand henn, un ich habb mei meind nett getshaynsht,” sawkt da Awlmechtich HAH,

¹⁵“so habb ich nau ausgmacht fa goot du zu Jerusalem un Juda. So feichet eich nett!

¹⁶Dess is vass diah du sellet: Sawwet di voahret zu nannah, richtet recht so es diah fridda hend an eiyah shtatt-doahra.

¹⁷Machet nett aus in eiyah hatza fa nannah evil du, un lohvet nett falshi zeiknis. Dee sinn di sacha es ich hass,” sawkt da HAH.

¹⁸No is es vatt fumm Awlmechticha HAH viddah zu miah kumma.

¹⁹Dess is vass da Awlmechtich HAH sawkt: “Di fasht-dawwa es kalda vadda im fiahda, fimfda, sivvada un zeyyada moonet, zayla fraylichi zeida vadda un goodi fesht-zeida sei fa Juda. So greeyet en leevi fa di voahheit un fridda.”

²⁰Dess is vass da Awlmechtich HAH sawkt: “Di zeit zayld kumma vann feel leit, un leit funn feel shtett kumma zayla,

²¹un di leit funn ay shtatt gayn in di annah un sawwa, ‘Vella grawt gay un da HAH ohbayda, un da Awlmechtich HAH sucha. Ich selvaht zayl aw gay.’

²²Feel heida funn shteiki lendah zayla an Jerusalem kumma fa da Awlmechtich HAH sucha un een ohbayda.”

²³Dess is vass da Awlmechtich HAH sawkt: “In selli dawwa zayla zeyya mennah funn alli sadda shprohcha un lendah hohld nemma an aym Yutt sei glaydah un sawwa, ‘Losset uns mitt eich gay, veil miah keaht henn es Gott bei eich is.’”