Read Pennsylvania German Sacharia 9 Bible Online

Sacharia 9 - Pennsylvania German bible

Sacharia 9

¹Em HAH sei vatt is geyyich's land funn Hadrach, un geyyich di shtatt Damascus, vo's roowa zayld. (Fa di awwa funn mensha un awl di shtamma funn Israel iahra awwa sinn uf em HAH.)

²Sei vatt is aw geyyich Hamath, grawt nayva droh, un geyyich Tyrus un Sidon, even vann si oahrich shmeaht sinn.

³Tyrus hott sich en greeks-haus gebaut, un hott silvah ufkeifeld vi shtawb, un gold vi drekk in di shtrohsa.

⁴Avvah da HAH nemd dess awl vekk funn iahra, un shmeist iahra graft in da say, un see vatt ufgebrend mitt feiyah.

⁵Askalon zayld dess sayna un sich feicha; Gaza zayld oahrich angsht havva, un aw Ekron, fa iahra hofning vatt vekk gnumma. Gaza zayld iahra kaynich faliahra, un nimmand zayld in Askalon voona.

⁶Fremdi zayla in Asdod voona, un di shtolsheit funn di Philishtah shneit ich ab.

⁷Ich nemm's bloot vekk funn iahra meilah, un's fabodda ess-sach zvishich iahra zay. Selli es ivvahrich sinn heahra zu unsahm Gott; si zayla foah-gengah sei in Juda, un Ekron vatt vi di Jebusiddah.

⁸Ich setz mich uf um mei haus rumm, un vatsh so es nimmand zrikk un faddi gayt. Mei leit vadda nee nimmi nunnah gedredda, funn nau on vatsh ich ivvah mei leit.

⁹Froiyet eich oahrich, diah leit funn Zion! Greishet laut, diah leit funn Jerusalem! Gukket, eiyah kaynich is am zu eich kumma; eah is gerecht un hott saylichkeit, is daymeedich, un is am reida uf en donkey, sell is, uf en hutsh aus en donkey.

¹⁰Ich nemm di greeks-veyya vekk fumm Ephraim, un di greeks-geil funn Jerusalem, un da greeks-bow zayld fabrocha sei. Da kaynich zayld fridda macha unnich di heida. Eah zayld roola funn aym say zumm anrah, un fumm Revvah biss an's end funn di eaht.

¹¹Un veyyich eich, deich's bloot funn meim bund mitt eich, mach ich di kfangana frei fumm loch unni vassah.

¹²Gaynd zrikk zu eiyah shteiki shtatt, diah kfangani es hofning hend; heit sawk ich es ich eich zvay mohl so feel sayya gevva zayl fa vass diah deich gmacht hend.

¹³Ich zayl Juda beeya vi ich mei bow beek, un mach Ephraim vi mei arrow. Ich zayl dei yungi mennah ufshtadda, oh Zion, geyyich di yunga mennah fumm land Grees, un zayl dich macha vi en greeks-mann sei shvatt.

¹⁴No veist da HAH sich un kumd ivvah si, sei arrow fleekt fassich vi gviddah. Gott da HAH blohst's blohs-hann; eah lawft fassich in di shtoahms funn di saut.

¹⁵Da Awlmechtich HAH zayld si heeda. Si zayla sacha nunnah reisa un uf di feinda shtamba, un zayla si ivvah-kumma mitt shling-shtay. Si zayla drinka un greisha vi funn vei, si zayla foll sei vi en shissel es gyoost vatt fa di ekkah fumm awldah shpritza.

¹⁶Da HAH iahra Gott hald si aus di kfoah uf sellem dawk, veil si di drubb funn sei aykni leit sinn. Si zayla glitzahra in seim land vi keshtlichi shtay in en krohn.

¹⁷Vi shay un leeblich zayla si sei! Di frucht fumm land un neiyah vei macht iahra yungi boova un mayt bleeya.