Read Pennsylvania German Matthäus 22 Bible Online

Matthäus 22 - Pennsylvania German bible

Matthäus 22

¹No hott Jesus viddah kshvetzt zu eena deich gleichnisa, un hott ksawt,

²“Ma kann's Himmel-Reich fagleicha zu en kaynich es en hochtzich gmacht hott fa sei boo,

³Un eah hott sei gnechta naus kshikt fa selli sawwa vo an di hochtzich kaysa voahra fa kumma. Avvah si sinn nett kumma.

⁴No hott eah viddah anri shaff-leit naus kshikt un hott eena ksawt, ‘Sawwet selli vo kaysa sinn, gukket moll, ich habb mei essa grisht, mei oxa un mei feddi hamlen sinn kshlachta un alles is grisht. Kummet an di hochtzich.’

⁵Avvah si henn nix drumm gevva un sinn iahra ayknah vayk ganga, aynah zu sei bavvahrei, en anra an sei shtoah,

⁶un di anra henn sei shaff-leit fesht gnumma, henn si fafolkt un henn si doht gmacht.

⁷No is da kaynich zannich vadda un hott sei greeks-gnechta kshikt un hott selli maddah umgebrocht un hott iahra shtatt fabrend.

⁸No hott eah ksawt zu sei shaff-leit, ‘Es is alles grisht fa di hochtzich avvah dee vo kaysa voahra sinn's nett veaht.

⁹Gaynd naus uf di vayya un hayset ennich ebbah es diah saynet fa an di hochtzich kumma.’

¹⁰Un selli shaff-leit sinn naus uf di shtrohsa ganga un henn awl di leit zammah gegeddaht es si kfunna henn, goodi un shlechti, un's haus vo di hochtzich drinn voah, voah foll mitt leit.

¹¹Avvah vo da kaynich kumma is fa di leit ivvah-gukka, hott eah en mann ksenna es kenn hochtzich glaydah oh katt hott.

¹²Un eah hott ksawt zumm mann, ‘Mei freind, vi bisht du do rei kumma unni hochtzich glaydah?’ Avvah eah hott nix sawwa kenna.

¹³No hott da kaynich ksawt zu di gnechta, ‘Binnet sei hend un sei fees un shmeiset een naus in's ausahsht dunkla. Datt doon leit heila un iahra zay zammah beisa.’

¹⁴Feel vadda groofa avvah nett feel vadda raus glaysa.”

¹⁵No sinn di Pharisayah ganga un henn unnich nannah kshvetzt fa gukka vi si een fanga kenna in vass eah sawkt.

¹⁶Un si henn iahra yingah zu eem kshikt mitt dee vo zumm Herodes kshtokka henn un henn ksawt, “Meishtah, miah vissa es du di voahret sawksht, un da vayk Gottes recht auslayksht, un du gebsht nix um mensha, fa du haybsht kenn mann haychah es en anrah.

¹⁷Sawk uns, dann, vass du denksht veyyich demm. Is es recht es miah em Kaisah tax betzawla adda nett?”

¹⁸Avvah Jesus hott iahra zvay-ksichtichi gedanka fanumma un hott ksawt, “Favass broviahret diah mich aus, diah heichlah?

¹⁹Veiset miah's geld fa da tax.” Un si henn eem en shtikk geld gebrocht.

²⁰Jesus hott ksawt, “Vemm sei gleichnis is dess un vemm sei shreives is druff?”

²¹Si henn ksawt, “Em Kaisah sein.” No hott eah ksawt zu eena, “Gevvet dann di sacha vo em Kaisah sinn zumm Kaisah, un di sacha vo em Gott sinn zu Gott.”

²²Vo si dess keaht henn, henn si sich fashtaund, un henn een falossa un sinn vekk ganga.

²³Sellah saym dawk sinn di Sadduzayah zu eem kumma, selli vo sawwa es es gebt kenn uffashtayung funn di dohda,

²⁴un henn een kfrohkt, “Meishtah, da Mosi hott ksawt, ‘Vann en mann shteahbt un hott kenn kinnah, dann soll sei broodah di vitt-fraw heiyahra un kinnah havva fa sei broodah.’

²⁵Nau es voahra moll sivva breedah unnich uns. Da eahsht hott keiyaht un is kshtauva unni kinnah, un hott sei fraw glost zu seim broodah.

²⁶So, aw, voah da zvett un da dritt un on nunnah biss da sivvet.

²⁷Un's letsht is di fraw aw kshtauva.

²⁸Nau in di uffashtayung funn di dohda, vels funn di sivva breedah hott see fa en fraw? Si henn see awl keiyaht katt.”

²⁹Avvah Jesus hott eena ksawt, “Diah sind letz veil diah di Shrift nett visset, un aw nett di macht funn Gott.

³⁰In di uffashtayung funn di dohda doon leit nett heiyahra un vadda nett keiyaht, avvah si sinn vi di engel im Himmel.

³¹Un veyyich di uffashtayung funn di dohda, hend diah nett glaysa vass ksawt voah zu eich bei Gott vo eah ksawt hott,

³²‘Ich binn da Gott fumm Abraham, un da Gott fumm Isaac un da Gott fumm Jakob’? Eah is nett da Gott funn di dohda, avvah funn di levendicha.”

³³Un vo di leit dess keaht henn, voahra si fashtaund ivvah sei vadda.

³⁴Avvah vo di Pharisayah keaht henn es eah di Sadduzayah shtill gmacht hott, sinn si zammah ganga.

³⁵Un ayns funn eena, en lawyah, hott een ebbes kfrohkt fa een ausbroviahra,

³⁶“Meishtah, vels is es graysht gebott im Ksetz?”

³⁷Un Jesus hott ksawt zu eem, “Du solsht da Hah dei Gott leeva mitt dei gans hatz, un mitt dei gansi sayl un mitt dei gansi meind.

³⁸Dess is es eahsht un graysht gebott.

³⁹Un's zvedda is demm aw gleicha: Du solsht dei nochbah leeva vi dich selvaht.

⁴⁰Uf dee zvay gebodda henkt's gans Ksetz un di Brofayda.”

⁴¹Nau diveil es di Pharisayah bei-nannah voahra hott Jesus si kfrohkt,

⁴²“Vass denket diah veyyich Christus? Vemm sei sohn is eah?” Si henn eem ksawt, “Em Dawfit sei sohn.”

⁴³No hott eah ksawt zu eena, “Vi is es dann es da Dawfit im Geisht een ‘Hah’ kaysa hott? Fa eah hott ksawt,

⁴⁴‘Da Hah hott ksawt zu meim Hah, “Hokk dich do uf mei rechtsi seit biss ich dei feind unnich dei fees du.”’

⁴⁵Vann da Dawfit een dann sei Hah hayst, vi kann eah sei boo sei?”

⁴⁶Un nimmand hott eem ay vatt zrikk sawwa kenna, un funn sellem dawk on hott nimmand gedraut een ennich ebbes may frohwa.