Read Pennsylvania German Matthäus 24 Bible Online

Matthäus 24 - Pennsylvania German bible

Matthäus 24

¹Jesus is no aus em tempel ganga, un voah am vekk gay, vo di yingah nuff zu eem kumma sinn un henn eem di gebeiyah fumm tempel veisa vella.

²Avvah eah hott eena ksawt, “Diah saynet awl dee sacha, doond diah nett? Voahlich, ich sawk eich, es zayld alles zammah nunnah kshmissa vadda so es nett ay shtay uf em anra may sei zayld.”

³Vi eah no uf em Ayl-Berg kokt hott, sinn di yingah laynich zu eem kumma un henn ksawt, “Sawk uns, vann zayla dee sacha sei, un vass zayld da zaycha sei vann du viddah kumsht un's end funn di veld kumd?”

⁴Jesus hott eena ksawt, “Gevvet acht es nimmand eich fafiaht.

⁵Fa feel kumma in meim nohma un sawwa, ‘Ich binn Christus’ un si doon feel fafiahra.

⁶Un diah zaylet heahra funn greek un kshvetzah funn greek. Saynet es diah nett gedruvveld sind, fa dess muss blatz nemma, avvah's end is noch nett do.

⁷Fa ay land zayld greek macha mitt em anra un ay kaynich-reich mitt em anra kaynich-reich, un's zayld hungahs-noht gevva un di veld zayld shidla do un datt an feel bletz.

⁸Awl dess is yusht da ohfang funn feel druvla.

⁹No drayya si eich ivvah zu grohsi dreebsawl un macha eich doht, un fa mei nohma zayla diah kast vadda bei alli lendah.

¹⁰Un no doon feel vekk falla un farohda nannah un si zayla nannah hassa.

¹¹Un feel falshi brofayda kumma uf, un zayla feel leit fafiahra.

¹²Un veil ungerechtichkeit ivvah-hand nemd, dutt feel leit iahra leevi abkeela.

¹³Avvah alli-ebbah es aushald biss an's end vatt saylich.

¹⁴Un dess Effangaylium fumm Reich vatt gebreddicht zu di gans veld fa en zeiknis zu alli lendah, un no kumd's end.

¹⁵(Loss da laysah fashtay.) Vann diah dess veesht ding vo alles fadaubt saynet shtay im heilicha-blatz—dess is vass da brofayt Daniel kshvetzt hott diveyya—

¹⁶no losset selli vo in Judayya sinn nuff in di hivla un berga shpringa.

¹⁷Veah uf em haus-dach is soll nett nunnah gay fa raus hohla vass im haus is.

¹⁸Un deah vo im feld is soll nett zrikk drayya fa sei vammes hohla.

¹⁹Es zayld avvah vay sei fa dee vo ungeboahrani kinnah drawwa, un fa dee vo kinnah an di brusht henn an selli zeit.

²⁰Un baydet es diah nett falossa misset im vindah adda uf em Sabbat-Dawk.

²¹Fa no zayld en grohsi dreebsawl sei vi's noch nett voah siddah em ohfang funn di veld biss nau, un's zayld aw nee nimmi so sei.

²²Un vann selli dawwa nett katzah gmacht veahra, dayda kenn mensha datt deich kumma. Avvah fa di sayk funn dee vo raus groofa sinn zayla selli dawwa katzah gmacht vadda.

²³Un vann ennich ebbah sawkt zu eich, ‘Gukket moll, do is Christus!’ adda ‘Datt is eah!’ glawvet's nett.

²⁴Fa falshi Chrishta un falshi brofayda vadda uf kumma, un si zayla vundahboahri sacha du un vundahboahri zaycha veisa. Vann's meeklich veah dayda si even dee fafiahra vo raus groofa sinn.

²⁵Gukket, ich habb eich dee sacha fanna naus ksawt.

²⁶So, vann si sawwa zu eich, ‘Gukket, eah is in di vildahnis,’ dann gaynd nett naus. Vann si sawwa, ‘Gukket, eah is in di hinnahsht kammah,’ glawvet's nett.

²⁷Fa vi's gviddah kumd funn di east un sheind naus in di west, so vatt's sei vann da Mensha Sohn moll kumd.

²⁸Vo-evvah es es doht flaysh is, datt fasamla di awdlah sich.

²⁹Un grawt noch di grohs dreebsawl funn selli zeit, ‘Vatt di sunn dunkel gmacht un da moon gebt sei helling nett. Di shtanna falla fumm Himmel un di grefticha fumm Himmel vadda kshiddeld.’

³⁰No veist em Mensha Sohn sei zaycha sich im Himmel, un no doon awl di kshlechtah uf di eaht heila, un si zayla da Mensha Sohn sayna am kumma in di volka fumm Himmel mitt grohsi graft un hallichkeit.

³¹No shikt eah sei engel naus mitt en laudah blohs fumm hann fa dee vo raus groofa sinn zammah samla funn di fiah vinda, un funn ay end fumm Himmel biss an's anra.

³²Nau lannet en gleichnis fumm feiya-bohm: vann di saft moll in di nesht gayt un di bleddah raus kumma, no vissa diah es da summah nayksht is.

³³So aw, vann diah moll dee sacha saynet blatz nemma, no visset diah es es nayksht is, grawt an di deah.

³⁴Voahlich, ich sawk eich, di leit in dee zeit zayla nett shtauva biss awl dee sacha blatz nemma.

³⁵Da Himmel un di eaht vadda fagay avvah mei vadda zayla nett fagay.”

³⁶“Avvah funn sellem dawk un funn selli shtund vayst nimmand. Even di engel im Himmel vissa's nett, un aw nett da Sohn, avvah yusht da Faddah.

³⁷Vi's voah an di zeit fumm Noah, so zayld's sei vann da Mensha Sohn moll kumd.

³⁸Fa vi's voah in di dawwa eb di sindfloot, si henn gessa un gedrunka, henn keiyaht un sinn keiyaht vadda biss an da dawk vo da Noah in di oahrich ganga is.

³⁹Un si henn nix gvist difunn biss di sindfloot kumma is un hott si awl vekk gnumma. So zayld's sei vann da Mensha Sohn moll kumd.

⁴⁰No zayla zvay mennah imma feld sei; aynah vatt gnumma un da annah bleibt zrikk.

⁴¹Zvay veibsleit zayla am mawla sei an di meel; ayni vatt gnumma un di annah bleibt zrikk.

⁴²So machet es diah am vatsha sind, fa diah visset nett vellah dawk es eiyah Hah kumd.

⁴³Avvah diah visset dess, vann da mann fumm haus gvist hett vass zeit funn di nacht es da deeb am kumma veah, hett eah gvatsht un hett een nett glost in sei haus nei brecha.

⁴⁴Fasell missa diah grisht sei, fa da Mensha Sohn kumd an en shtund es diah nett visset.

⁴⁵Veah, dann, is da shtandhaftich gnecht mitt veisheit es da meishtah drauwa dayt fa acht gevva ivvah sei haus, un fa di anra gnechta iahra ess-sach gevva an di recht zeit?

⁴⁶Ksaykend is sellah gnecht es am so du is vann da mann fumm haus kumd.

⁴⁷Voahlich, ich sawk eich, eah setzt sellah gnecht ivvah awl sei sacha.

⁴⁸Avvah vann en ungerechtah gnecht zu sich selvaht sawkt, ‘Mei meishtah is shpoht,’

⁴⁹un eah fangd oh di anri gnechta fashlauwa, un est un drinkt mitt dee vo ksoffa sinn,

⁵⁰no kumd da meishtah funn sellem gnecht uf en dawk vann eah nett grisht is, un an en shtund es eah nett vayst,

⁵¹un eah shtrohft sellah gnecht hatt un dutt een naus mitt di heichlah. Datt doon leit heila un iahra zay zammah beisa.”