Read Pennsylvania German Matthäus 4 Bible Online

Matthäus 4 - Pennsylvania German bible

Matthäus 4

¹Da Geisht hott no Jesus in di vildahnis kfiaht so es da Deivel een ausbroviahra kann.

²Vo Jesus moll fatzich dawk un fatzich necht kfasht katt hott, voah eah hungahrich.

³Un da fasuchah is zu eem kumma un hott ksawt, “Vann du Gott sei Sohn bisht, sawk dee shtay si sella broht vadda.”

⁴Avvah Jesus hott ksawt zu eem, “Es shtayt kshrivva, ‘En mensh soll nett layva mitt yusht broht, avvah mitt alli vatt es aus em maul funn Gott kumd.’”

⁵No hott da Deivel Jesus mitt sich gnumma in di heilich shtatt, un hott een uf da haychsht shpitza fumm tempel kshteld,

⁶un hott ksawt zu Jesus, “Vann du Gottes Sohn bisht, dann loss dich do nunnah falla. Es shtayt kshrivva, ‘Eah zayld sei engel addahs gevva es si acht gevva uf dich, un dich hayva mitt di hend es du nett so feel es dei foos shtohsht an en shtay.’”

⁷Jesus hott ksawt zu eem, “Es shtayt aw kshrivva, ‘Du solsht da Hah dei Gott nett ausbroviahra.’”

⁸Da Deivel hott no viddah een mitt sich gnumma un si sinn uf en oahrichah hohchah hivvel ganga. Eah hott Jesus awl di lendah funn di veld gvissa, un vi grohs un shay es si sinn.

⁹Un eah hott ksawt zu Jesus, “Ich gebb diah awl dee sacha vann du anna gneesht un dusht mich ohbayda.”

¹⁰No hott Jesus ksawt zu eem, “Gay vekk, Satan! Fa es shtayt kshrivva, ‘Du solsht Gott dei Hah ohbayda, un yusht een deena.’”

¹¹No is da Deivel vekk ganga funn eem, un di engel sinn kumma un henn eem abgvoaht.

¹²Vo Jesus keaht hott es da Johannes da Dawfah eikshtekt vadda is, is eah noch Galilaya ganga.

¹³Eah is vekk ganga funn Nazareth un is an Kapernaum kumma un hott datt gvoond. Dee shtatt is nayvich em say, in di gaygend funn Sebulon un Naphthali.

¹⁴Dess voah so es es voah kumma dayt vass ksawt voah deich da brofayt Jesaia vo eah ksawt hott,

¹⁵“Dess land funn Sebulon un Naphthali is nayvich em say, uf di annah seit fumm Jordan. Dess dayl funn Galilaya is vo di Heida sinn.

¹⁶Di leit vo im dunkla kokt henn, henn en grohs licht ksenna. Un zu dee vo im land un im shadda fumm doht kokt henn, is en licht uf kumma.”

¹⁷An selli zeit hott Jesus ohkfanga breddicha un hott ksawt, “Doond boos, drayyet funn eiyah sinda. Es Kaynich-Reich fumm Himmel is nayksht.”

¹⁸Vo Jesus nayvich em say funn Galilaya nohch gloffa is hott eah zvay breedah ksenna am fisha. Si voahra da Simon—sei anrah nohma voah Petrus—un sei broodah da Andreas. Si voahra am iahra net in da say shmeisa, fa iahra eahvet voah fisha.

¹⁹Eah hott ksawt zu eena, “Kummet miah nohch, ich vill mensha fishah aus eich macha.”

²⁰Si henn grawt iahra nets falossa un sinn eem nohch ganga.

²¹Vo eah on ganga is, hott eah zvay anri breedah ksenna, da Jakobus, em Zebedeus sei boo, un da Johannes, sei broodah. Si voahra im boat, bei iahra daett da Zebedeus, am iahra nets flikka. Jesus hott eena groofa,

²²un si henn grawt's boat un iahra daett falossa un sinn eem nohch ganga.

²³Jesus is no deich gans Galilaya ganga. Eah hott di leit gland in di Yudda gmay-heisah un hott's Effangaylium fumm Kaynich-Reich gebreddicht. Eah hott alli sadda faylah un grankeda kayld es di leit katt henn.

²⁴Di leit henn keaht funn Jesus deich's gans land funn Syria un si henn leit zu eem gebrocht es alli sadda grankeda un shmatza katt henn. Si henn leit gebrocht es deivela in sich katt henn, anri es nett recht voahra in di meind, un dayl es sich nett farayya henn kenna, un eah hott si kayld.

²⁵Es sinn grohsi drubba funn leit Jesus nohch ganga. Dee leit voahra funn Galilaya, un Decapolis, un Jerusalem, un Judayya, un funn di annah seit fumm Jordan.