Read Pennsylvania German 5. Mosi 11 Bible Online

5. Mosi 11 - Pennsylvania German bible

5. Mosi 11

¹Diah sellet da HAH eiyah Gott leeva un alles du es eah sawkt, un sei ksetza, adninga un gebodda halda.

²Un visset dess heit, ich binn nett am shvetza zu eiyah kinnah es di sacha nett gvist henn, un sei shtrohfes nett ksenna henn, sell is, vass diah gland henn veyyich em HAH eiyah Gott, sei hallichkeit, sei mechtichi hand un sei naus kshtrektah oahm,

³sei zaycha un verka es eah gedu hott in Egypta zumm Pharao, da kaynich funn Egypta un zu sei gans land;

⁴un vass eah gedu hott zu di greeks-leit funn Egypta, un zu iahra geil un greeks-veyya vo eah's vassah fumm Rohda Say gmacht hott ivvah si kumma diveil es si eich nohch kumma sinn, un da HAH si umgebrocht hott biss an deah dawk.

⁵Diah visset vass eah gedu hott fa eich in di vildahnis biss diah do heah kumma sind,

⁶un vass eah gedu hott zumm Dathan un Abiram, di boova fumm Eliab, em Ruben sei boo, vo di eaht iahra maul uf gmacht hott un si kshlukt hott mitt iahra families un tents un alles levendiches es zu eena keaht hott, fannich awl Israel.

⁷Yau, es voah eiyah awwa es dee grohsi verka fumm HAH ksenna henn es eah gedu hott.

⁸Fasell, haldet awl di gebodda es ich am eich gevva binn heit, so es diah grefta hend fa nei gay un's land ivvah-nemma es diah am drivvah nivvah gay sind fa nemma,

⁹un so es diah lang layvet im land es da HAH kshvoahra hott zu eiyah foah-feddah fa's gevva zu eena un iahra nohch-kummashaft, en land am lawfa mitt millich un hunnich.

¹⁰Es land es diah am nei gay sind is nett vi's land funn Egypta es diah raus kumma sind difunn, vo diah sohma ksayt hend un's selvaht gvessaht hend vi en goahra.

¹¹Avvah's land es diah am nei gay sind fa's ivvah-nemma hott hivla un deicha un drinkt reyyah fumm himmel.

¹²Es is en land es da HAH eiyah Gott acht gebt druff. Di awwa fumm HAH eiyah Gott sinn immah druff fumm ohfang fumm yoah biss an's end fumm yoah.

¹³So vann diah mei gebodda haldet es ich eich gebb heit, vann diah da HAH eiyah Gott leevet un een deenet mitt eiyah gans hatz un sayl,

¹⁴dann gebt eah reyyah fa's land an di recht zeit, da free un da shpoht reyyah, so es diah eiyah frucht, eiyah neiyah vei un eiyah ayl geddahra kennet,

¹⁵un eah zayld graws gevva in eiyah feldah fa eiyah fee, un diah zaylet essa un satt sei.

¹⁶Gevvet acht es eiyah hatz nett fafiaht vatt, un diah vekk drayyet fa anri gettah deena un si ohbayda.

¹⁷Adda dann zayld em HAH sei zann brenna geyyich eich, un eah zayld di himla zu macha, so es es nett reyyaht un da grund kenn frucht gebt. No zayla diah kshvind umkumma im gooda land es da HAH am eich gevva is.

¹⁸So nemmet dee vadda funn meina zu hatz un zu eiyah sayl; diah sellet si uf eiyah hand un shtann binna fa en zaycha.

¹⁹Diah sellet si zu eiyah kinnah lanna, un sellet shvetza veyyich si vann diah in eiyah haus hokket, vann diah am vayk nohch lawfet, vann diah eich anna layyet un vann diah uf shtaynd.

²⁰Diah sellet si uf di deah-poshta funn eiyah haus shreiva un uf eiyah deahra.

²¹Dess is so es diah un eiyah kinnah lang layvet im land es da HAH kshvoahra hott fa eiyah foah-feddah gevva so lang es da himmel ovvich di eaht bleibt.

²²So vann diah acht gevvet un awl di gebodda haldet es ich am eich gevva binn, vann diah da HAH eiyah Gott leevet, vann diah in awl seim vayk lawfet un ohhayvet zu eem,

²³dann zayld da HAH awl dee leit ausdreiva fannich eich un diah zaylet leit ivvah-nemma es graysah un shteikah sinn es diah sind.

²⁴Alli land es di sohla funn eiyah fees druff dredda zayld eiyahs sei. Eiyah land zayld langa funn di vildahnis biss an Lebanon, un fumm Euphrates Revvah zumm say in di west.

²⁵Nimmand kann ufshtay geyyich eich. Da HAH eiyah Gott zayld da angsht un di furcht funn eich ivvahrawlich uf's land du es diah druff dreddet, so vi eah fashprocha hott.

²⁶Heichet mich ab, heit doon ich en sayya un en fluch fannich eich:

²⁷da sayya, vann diah di gebodda haldet fumm HAH eiyah Gott es ich am gevva binn zu eich heit;

²⁸da fluch, vann diah nett di gebodda haldet fumm HAH eiyah Gott, un vann diah vekk drayyet funn di gebodda es ich eich gebb heit un gaynd anri gettah nohch es diah nett kennet.

²⁹Vann da HAH eiyah Gott eich moll in's land nei gebrocht hott es diah am nei gay sind fa's ivvah-nemma, dann sellet diah da sayya ausgevva uf em Berg Gerizim, un da fluch uf em Berg Ebal.

³⁰Diah visset es dee berga uf di annah seit fumm Jordan sinn. Si sinn west fumm vayk es di sunn unnah gayt, im land funn di Kanaaniddah es in Arabah nayksht an Gilgal layva, nayvich di aycha-baym funn Moreh.

³¹Diah sind nau grisht fa ivvah da Jordan gay un in's land nei gay fa's ivvah-nemma es da HAH eiyah Gott am eich gevva is. Diah sellet's nemma un drinn voona,

³²un sellet acht gevva fa awl di gebodda un ksetza halda es ich am fannich eich shtella binn heit.