Read Pennsylvania German 5. Mosi 13 Bible Online

5. Mosi 13 - Pennsylvania German bible

5. Mosi 13

¹Vann en brofayt adda en drohmah unnich eich ufshtayt un gebt eich en zaycha adda en vundah,

²un sellah zaycha adda vundah es eah ksawt hott kumd voah, un eah sawkt, “Vella anri gettah nohch gay” (selli es diah nett kennet) “vella gay si deena,”

³dann misset diah nett abheicha zu sellem brofayt adda drohmah. Fa da HAH eiyah Gott is am eich ausbroviahra fa ausfinna eb diah een leevet mitt eiyah gans hatz un eiyah gansi sayl.

⁴Diah sellet da HAH eiyah Gott nohch folya un een firchta; diah sellet sei gebodda halda, eem abheicha, een deena un zu eem henka.

⁵Sellah brofayt adda drohmah muss doht gmacht sei, veil eah eich roht gevva hott es diah geyyich da HAH eiyah Gott gay sellet, deah HAH es eich aus em land funn Egypta kfiaht hott, un frei ksetzt hott fumm gnechta-land. Eah hott broviaht eich vekk drayya fumm vayk es da HAH eiyah Gott eich gebodda hott fa nohch gay. Diah misset evil vi sell vekk du funn eich.

⁶Vann eiyah ayknah broodah, eiyah boo adda maydel, eiyah fraw es diah leeb hend adda eiyah leebshtah freind eich lokt hinna rumm, un sawkt, “Vella gay anri gettah deena” (gettah es diah un eiyah feddah nett gekend henn,

⁷gettah funn di leit um eich rumm, nayksht adda veit ab, adda funn aym end zumm anra im land),

⁸dann sellet diah nett eigevva zu eem adda een abheicha. Diah sellet een nett davvahra un dess funn di leit halda.

⁹Diah misset een doht macha. Dei hand soll di eahsht sei fa een doht macha, noch sellem di hend funn awl di anra.

¹⁰Shtaynichet een doht, veil eah broviaht hott fa eich vekk drayya fumm HAH eiyah Gott, deah es eich aus em land funn Egypta kfiaht hott, aus em bunds-gnecht land.

¹¹No zayld gans Israel dess heahra un sich feicha. Un nimmand unnich eich zayld nochamohl so en evil ding du.

¹²Vann diah heahret funn ayns funn di shtett es da HAH eiyah Gott am eich gevva is fa drinn voona,

¹³es samm ungettlichi mennah ufkshtanna sinn unnich eich, un henn leit funn selli shtatt vekk kfiaht un henn ksawt, “Vella gay anri gettah deena” (gettah es diah nett kennet),

¹⁴no misset diah nohch frohwa, un's goot aussucha. Un vann's voah is un ausdrayt es so en shreklich ding gedu voah unnich eich,

¹⁵dann misset diah awl di leit in selli shtatt nunnah hakka mitt em shvatt. Diah sellet di shtatt nunnah reisa un di leit un's fee doht macha mitt em shvatt.

¹⁶Diah sellet awl's sach zammah geddahra in di mitt funn di shtatt es zu di leit keaht hott, un sellet's sach un di gans shtatt nunnah brenna fa en brand-opfah zumm HAH eiyah Gott. Es soll datt uf en haufa leiya un nee nimmi ufgebaut vadda.

¹⁷Kens funn sellem shtoft es fadamd is sellet diah in di hend nemma, so es da HAH funn seim gleedichah zann drayt un bamhatzichkeit veist zu eich. Eah zayld bamhatzich sei zu eich un eich fameahra vi eah kshvoahra hott zu eiyah foah-feddah,

¹⁸vann diah di shtimm fumm HAH eiyah Gott heichet un sei gebodda haldet es ich eich gebb heit, un doond vass recht is in di awwa fumm HAH eiyah Gott.