Read Pennsylvania German 5. Mosi 15 Bible Online

5. Mosi 15 - Pennsylvania German bible

5. Mosi 15

¹Am end funn alli sivvet yoah misset diah di shulda abshreiva es leit eich shuldich sinn.

²Dess is vi's gedu sei soll: Alli-ebbah es geld naus laynd soll di shuld abshreiva es eah gevva hott zu sei Israeliddah broodah. Eah soll sell geld nett nemma funn seim nochbah adda broodah. Dess is es yoah es da HAH ausgroofa hott fa alli shuld abkshrivva sei.

³Diah kennet en ausahra macha betzawla, avvah diah misset ennichi shuld abshreiva es en broodah eich shuldich is.

⁴Avvah's sella kenn oahmi unnich eich sei, veil da HAH eich saykna zayld im land es da HAH eiyah Gott eich gevva zayld fa's ivvah-nemma.

⁵Dess is vann diah yusht di shtimm fumm HAH eiyah Gott abheichet, un doond awl dee gebodda es eah eich gebt heit.

⁶Fa da HAH eiyah Gott zayld eich saykna vi eah fashprocha hott, un diah zaylet geld naus layna zu feel funn di heida, avvah diah brauchet nett layna funn ennich's funn eena. Diah zaylet roola ivvah feel heida-leit, avvah si zayla nett roola ivvah eich.

⁷Vann en mann oahm is es en broodah unnich eich in ennich's funn di shtett im land es da HAH eiyah Gott am eich gevva is, dann sellet diah eiyah hatz nett hatt macha un eiyah hand zu macha geyyich eiyah oahmah broodah.

⁸Avvah diah sellet eiyah hand uf macha zu eem un eem alles layna es eah brauch.

⁹Gevvet acht es diah kenn shlechti gedanka hend un sawwet in eiyah hatz, “Es sivvet yoah, es yoah fa shulda abshreiva is nayksht,” un diah sind no nett freindlich zu eiyah oahmah broodah un gevvet eem nix. Eah mecht roofa zumm HAH geyyich eich un diah sind sinda shuldich.

¹⁰Gevvet frei-villich zu eem un losset eiyah hatz nett geitzich sei vann diah gevvet. Deich dess ding zayld da HAH eiyah Gott eich saykna in awl eiyah eahvet, un in alles es diah unnah-nemmet.

¹¹Es zayla immah oahmi im land sei. Fasell gebb ich eich's gebott es diah eiyah hand frei-villich uf machet zu eiyah breedah un zu selli es noht henn im land.

¹²Vann ayns funn eiyah aykni Hebrayishah mann adda Hebrayishi fraw sich fakawft zu eich, dann sella si eich deena fa sex yoah, avvah im sivvada yoah sellet diah si frei gay lossa.

¹³Un vann diah si frei gay losset, dann sellet diah si nett fatt shikka unni eena ebbes gevva.

¹⁴Gevvet eena frei-villich funn eiyah shohf, di frucht funn eiyah dresha-floah un funn eiyah vei-press. Gevvet eena so vi da HAH eiyah Gott eich ksaykend hott.

¹⁵Fagesset nett es diah bunds-gnechta voahret in Egypta un da HAH eiyah Gott eich frei ksetzt hott. Sell is favass es ich eich dess gebott gebb heit.

¹⁶Avvah vann eiyah gnecht sawkt zu eich, “Ich vill eich nett falossa,” veil eah eich un eiyah haus-halding leeb hott, un veil eah goot ab is mitt eich,

¹⁷dann sellet diah en awl nemma un en deich sei oah sheeva un in di deah. No soll eah eiyah bunds-gnecht sei fa'immah. Diah sellet dess aw du zu eiyah bunds-mawt.

¹⁸Es soll nett en shveah ding sei zu eich fa si frei gay lossa, fa da deensht es si gedu henn fa eich in sex yoah is zvay moll so feel veaht es en gedunganah gnecht. Un da HAH eiyah Gott zayld eich saykna in alles es diah doond.

¹⁹Setzet raus fa da HAH eiyah Gott alli eahsht-geboahra bulla hamli un bekli lamm. Doond di eahsht-geboahrana funn eiyah oxa nett shaffa, un doond di eahsht-geboahra shohf nett sheahra.

²⁰Diah un eiyah haus-halding sellet si essa fannich em HAH eiyah Gott alli yoah am blatz es eah raus layst.

²¹Avvah vann ebbes letz is mitt en diah, vann's lohm adda blind is adda ennich ebbes shunsht letz hott mitt sich, dann sellet diah's nett opfahra zumm HAH eiyah Gott.

²²Diah sellet's essa in eiyah shtett. Ennich ebbah es rein adda unrein is dauf's essa, grawt vi diah en hash adda en rein vild diah esset.

²³Avvah diah sellet's bloot nett essa; leahret's raus uf da bodda vi vassah.