Read Pennsylvania German 5. Mosi 16 Bible Online

5. Mosi 16 - Pennsylvania German bible

5. Mosi 16

¹Haldet da moonet funn Abib un esset's Passa-Fesht zumm HAH eiyah Gott. Im moonet Abib hott da HAH eiyah Gott eich nachts aus Egypta gebrocht.

²Diah sellet's Passa-Diah shlachta zumm HAH eiyah Gott funn di kee adda shohf un gays am blatz es da HAH raus glaysa hott fa sei Nohma eahra.

³Diah sellet kenn ksavvaht broht essa mitt, avvah fa sivva dawk sellet diah's essa mitt unksavvaht-broht, es aylend-broht, veil diah's Egypya-land kshvind falossa hend. Dess is so es diah eiyah layva lang da dawk nett fagesset es diah aus Egypta kumma sind.

⁴Losset kenn savvah-dayk kfunna sei in awl eiyah land fa sivva dawk. Un doond kenn flaysh es gopfaht voah uf em ohvet fumm eahshta dawk ivvahrich lossa biss da neksht meiya.

⁵Diah daufet's Passa-Diah nett opfahra in ennich's funn di shtett es da HAH eiyah Gott eich gebt,

⁶avvah yusht am blatz es da HAH eiyah Gott raus layst es sei Nohma bleiva soll. Datt sellet diah es Passa-Diah opfahra ohvets vann di sunn unnah gayt an di zeit es diah aus Egypta kumma sind.

⁷Rohshtet's un esset's am blatz es da HAH eiyah Gott raus layst, un da neksht meiya sellet diah zrikk an eiyah tents gay.

⁸Fa sex dawk sellet diah unksavvaht-broht essa, un uf em sivvada dawk sellet diah en fasamling havva fa da HAH eiyah Gott deena; diah sellet kenn eahvet du uf sellah dawk.

⁹Zaylet sivva vocha funn di zeit es diah ohfanget's frucht im feld abshneida mitt di sichel,

¹⁰un haldet's Vocha-Fesht zumm HAH eiyah Gott bei en frei-villich opfah bringa. Grawt so reichlich es da HAH eich ksaykend hott, so soll's opfah sei funn eiyah hand.

¹¹Diah sellet fraylich sei fannich em HAH eiyah Gott, diah, eiyah boova un mayt, eiyah gnechta un mawda, di Lefiddah in eiyah shtett, di ausahra, selli unni eldra un di vitt-veivah unnich eich. Dess soll gedu sei am blatz es da HAH eiyah Gott raus layst, datt vo diah sei nohma deena sellet.

¹²Fagesset nett es diah bunds-gnechta voahret in Egypta, un seind shuah es diah dee gebodda haldet.

¹³Noch demm es diah di eahn fumm dresha-floah un di vei-press eignumma hend, sellet diah's Lawb-Heisli-Fesht halda fa sivva dawk.

¹⁴Diah sellet fraylich sei diveil es diah dess fesht haldet, diah, eiyah boova un mayt, eiyah gnechta un mawda, di Lefiddah, di ausahra, selli unni eldra un di vitt-veivah in eiyah shtett.

¹⁵Diah sellet dess fesht zumm HAH eiyah Gott halda fa sivva dawk am blatz es da HAH raus layst. Dess is veil da HAH eiyah Gott eich saykna zayld mitt eiyah eahn un di eahvet funn eiyah hend, un diah sellet oahrich fraylich sei.

¹⁶Drei moll's yoah sella awl eiyah mennah fannich da HAH eiyah Gott kumma am blatz es eah raus layst, am Unksavvaht-Broht-Fesht, am Vocha-Fesht un am Lawb-Heisli-Fesht. Si sella nett mitt leahri hend fannich da HAH kumma.

¹⁷Alli mann soll gevva so vi eah kann; so vi da HAH eiyah Gott een ksaykend hott, so soll eah gevva.

¹⁸Diah sellet richtah un foah-gengah eisetza fa yaydahs funn eiyah shtamma in awl di shtett es da HAH eiyah Gott eich gevva zayld. Si sella di leit richta mitt en recht gericht.

¹⁹Diah sellet nett unnahshidlich sei in eiyah gericht, un sell vass recht is nett beeya. Diah sellet kenn kshenkah nemma hinna rumm, fa so kshenkah fablenna di awwa funn selli mitt veisheit un fadrayya di vadda funn di gerechta.

²⁰Diah sellet feah sei un yusht sell nohch macha vass recht is. Dess is so es diah layva kennet un's land ivvah-nemma es da HAH eiyah Gott am eich gevva is.

²¹Diah sellet kenn holsichah poshta ufsetza zu di abgott-fraw Ashera nayvich em awldah es diah bauwet zumm HAH eiyah Gott.

²²Un setzet aw nett en shtaynichah poshta uf, veil da HAH eiyah Gott so sacha hast.