Read Pennsylvania German 5. Mosi 19 Bible Online

5. Mosi 19 - Pennsylvania German bible

5. Mosi 19

¹Vann da HAH eiyah Gott di leit moll abkshnidda hott, dee es eah am iahra land gevva is zu eich, un diah hend si ausgedrivva un voonet in iahra shtett un heisah,

²dann sellet diah drei shtett raus setza fa eich selvaht es in di mitt fumm land sinn es da HAH eiyah Gott eich gevva hott fa ivvah-nemma.

³Bauwet vayya zu di shtett un fadaylet's land es da HAH am eich gevva is in drei daylah, so es vann ebbah en mann doht macht, kann eah zu ayns funn di shtett shpringa.

⁴Dess is vi's sei soll mitt ebbah es en mann doht macht un datt anna shpringd fa layva bleiva: vann ebbah sei nochbah unfahoft doht macht un hott nix geyyich een katt—

⁵so vi vann en mann un sei nochbah in da bush gayn fa hols macha un eah shvingd sei ax fa en bohm um macha, un di ax kumd ab fumm haendel un dreft da nochbah so es es een doht macht. Sellah mann kann no zu ayns funn selli shtett shpringa so es eah selvaht nett doht gmacht vatt.

⁶Dess is so es vann sellah es dess bloot auseeva vett, bays vadda mecht un eem nohch gay un een fanga veil's zu veit voah zu en frei-shtatt. Eah mecht een no doht macha even vann eah nett doht gmacht sei sett veil eah nix geyyich sei nochbah katt hott.

⁷Fasell gebb ich's gebott es diah drei shtett raus setzet fa eich selvaht.

⁸Vann da HAH eiyah Gott eiyah land moll graysah gmacht hott, so vi eah kshvoahra hott zu eiyah foah-feddah, un gebt eich's gans land es eah eena fashprocha hott—

⁹vann diah dee gebodda pinklich haldet es ich eich gevva habb heit, es diah da HAH eiyah Gott leeb hend un lawfet in seim vayk—no sellet diah drei may shtett raus setza.

¹⁰Dess is so es unshuldich bloot nett fagossa vatt in eiyah land es da HAH eiyah Gott am eich gevva is fa en eahbshaft, un so es diah nett shuldich sind funn bloot fageesa.

¹¹Avvah vann en mann sei nochbah hast un voaht uf een fa een fashlauwa, un een doht macha—vann eah no zu ayns funn dee shtett shpringd,

¹²dann sella di eldishti funn sei shtatt shikka fa een, un een zrikk bringa un ivvah-drayya zumm auseevah, so es eah doht gmacht vatt.

¹³Diah sellet een nett davvahra. Diah misset dess unshuldich bloot aus Israel du, so es es goot gayt mitt eich.

¹⁴Im land es da HAH eiyah Gott am eich gevva is sellet diah di lein-meikah-shtay nett moofa zvishich di feldah es eiyah foah-feddah anna ksetzt henn.

¹⁵Eb diah ebbah shtrohfet fa ebbes letzes, adda en sind es eah gedu havva hott sella, dann missa diah zvay adda drei leit havva es geyyich een zeiya. Ay mann sei zeiknis is nett genunk.

¹⁶Vann en mann ebbah shunsht letz nei greeya vill bei en falsh zeiknis gevva geyyich een,

¹⁷dann sella di zvay mennah fannich da HAH shtay un fannich di preeshtah un richtah es am blatz sinn an selli zeit.

¹⁸Di richtah sella's goot unnah-sucha, un vann da zeiyah leekt, un hott falshi zeiknis gevva geyyich sei broodah,

¹⁹dann sellet diah du zu eem vass eah du hott vella zu sei broodah. Diah misset dess evil vekk du funn unnich eich.

²⁰Di ivvahricha funn di leit zayla dess heahra un sich feicha, un's zayld nee nimmi so en ding gedu vadda unnich eich.

²¹Diah sellet so leit nett davvahra: en layva fa en layva, en awk fa en awk, en zoh fa en zoh, en hand fa en hand, en foos fa en foos.