Read Pennsylvania German 5. Mosi 23 Bible Online

5. Mosi 23 - Pennsylvania German bible

5. Mosi 23

¹Nimmand es fashnidda is adda es sei manlich's leib fadauva hott soll nei gnumma sei unnich di leit fumm HAH.

²Nimmand es geboahra is zu eldra es nett keiyaht sinn soll nei gnumma sei unnich di leit fumm HAH, nett eah adda sei nohch-kummashaft biss nuff an's zeyyet layves-zeit.

³Kenn Ammoniddah adda Moabiddah adda ennichs funn iahra nohch-kummashaft daufa selayva nei gnumma sei unnich di leit fumm HAH, even zu di zeyyet layves-zeit un fa'immah.

⁴Sell is veil si nett kumma sinn eich ohdreffa mitt broht un vassah uf eiyah vayk aus Egypta. Un si henn da Bileam, em Beor sei boo funn Pethor in Mesopotamia, gedunga fa eich faflucha.

⁵Avvah da HAH eiyah Gott hott da Bileam nett abkeicht un hott da fluch in en sayya gedrayt fa eich, veil da HAH eiyah Gott eich leeb katt hott.

⁶Diah sellet nee nett fridda macha mitt eena adda ennich ebbes du fa eena helfa so lang es diah layvet.

⁷Gukket nett nunnah uf en Edomiddah; eah is freindshaft mitt eich. Gukket nett nunnah uf en Egyptah veil diah moll fremdi leit voahret in seim land.

⁸Iahra kinnah fumm dridda layves-zeit on daufa nei gnumma sei unnich di leit fumm HAH.

⁹Vann diah in da greek gaynd geyyich eiyah feinda, dann sellet diah eich vekk halda funn ennich evil ding.

¹⁰Vann en mann unnich eich unrein is veil sohma abganga is funn eem deich di nacht, dann muss eah naus aus di camp gay un datt bleiva.

¹¹Avvah so geyyich ohvets soll eah sich vesha mitt vassah, un an sunn-unnah dauf eah viddah zrikk nei in di camp gay.

¹²Diah sellet aw en blatz rishta aus di camp fa hee gay vann diah's nohtvendich finnet.

¹³Diah sellet en shaufel bei eich havva un vann diah eich anna hokka vellet, sella diah en loch grawva un sell fagrawva es funn eich gayt.

¹⁴Veil da HAH eiyah Gott in di mitt funn eiyah camp lawft fa eich heeda un eiyah feinda ivvah-drayya zu eich, dann muss eiyah camp heilich sei. Eah soll nix shandliches sayna unnich eich, adda eah drayt vekk funn eich.

¹⁵Vann en bunds-gnecht fatt kshprunga is funn sei ayknah un kumd zu eich, dann sellet diah een nett zrikk shikka.

¹⁶Eah soll unnich eich layva an ennichah blatz es eah vill un in di shtatt es eah vill. Doond een nett letz yoosa.

¹⁷Es soll kenn Israeliddish veibsmensh adda manskal en tempel huah vadda.

¹⁸Diah sellet's huahra-lohn-geld funn en manskal adda veibsmensh huah nett in's haus fumm HAH eiyah Gott bringa, even fa en fashprechnis-opfah. Da HAH hast si awl zvay.

¹⁹Diah sellet eiyah broodah nett macha indressa betzawla, eb's uf geld, ess-sach adda ennich ebbes shunsht is es indressa betzawld vatt.

²⁰Diah daufet en ausahra macha indressa betzawla avvah nett en broodah. Sell is so es da HAH eiyah Gott eich saykend in alles es diah unnah-nemmet im land es diah am nei gay sind fa's ivvah-nemma.

²¹Vann diah en fashprechnis machet zumm HAH eiyah Gott, dann seind nett shloh am's betzawla. Da HAH haybt eich zu eiyah fashprechnis, un's is en sind fa's nett betzawla.

²²Es is kenn sind fa nett en fashprechnis macha.

²³Avvah vann diah en fashprechnis frei-villich machet mitt eiyah leftz, dann misset diah halda vass diah fashprocha hend zumm HAH eiyah Gott.

²⁴Vann diah in eiyah nochbah sei vei-goahra gaynd, dann daufet diah awl di drauva essa es diah vellet, avvah doond kenni in eiyah keahb.

²⁵Vann diah in eiyah nochbah sei frucht-feld gaynd, dann daufet diah di kebb ablaysa mitt eiyah hend, avvah diah daufet's nett abmacha mitt en sichel.