Read Pennsylvania German 5. Mosi 25 Bible Online

5. Mosi 25 - Pennsylvania German bible

5. Mosi 25

¹Vann's shtreit gebt zvishich mennah dann sella si di sacha richta lossa bei di richtah. Si sella ausmacha veah shuldich is un veah nett is.

²Vann sellah vo shuldich is gegaysheld sei soll, dann soll da richtah een macha sich anna layya, un eah soll gegaysheld sei fannich em richtah mitt so feel shtraych es eem shuldich sinn.

³Avvah eah dauf nett gegaysheld sei mitt may es fatzich shtraych. Sell is so es eiyah broodah nett fashohmd vatt fannich eich.

⁴Vann en ox am's frucht ausdredda is, dann sellet diah eem kenn maul-koahb ohdu.

⁵Vann breedah bei-nannah voona un ayns funna shtaubt unni kinnah, dann soll di vitt-fraw nett aus di family heiyahra. Iahra mann sei broodah soll see heiyahra un soll du vass kfoddaht is fumm shviah-broodah.

⁶Da eahsht boo es geboahra is zu iahra soll da nohma fumm dohda broodah ohnemma, so es sei nohma nett ausgrivva vatt in Israel.

⁷Avvah vann em mann sei broodah sei fraw nett heiyahra vill, dann soll see zu di eldishti gay am shtatt-doah un sawwa, “Mei mann sei broodah dutt's nett fa sei broodah sei nohma on nemma in Israel. Eah dutt's nett fa ausdrawwa vass kfoddaht is fumm shviah-broodah zu miah.”

⁸No sella di eldishti funn di shtatt een bei roofa un shvetza zu eem. Vann eah ohhald sawwa, “Ich vill see nett heiyahra,”

⁹dann soll sei broodah sei fraw nuff gay zu eem fannich di eldishti un ayns funn sei shoo ausnemma, soll in sei ksicht shpautza un sawwa, “Dess is vass gedu vatt zumm mann es sei broodah kenn nohch-kummashaft gebt.”

¹⁰Sellah mann sei family soll gvissa sei in Israel es “em boah-feesicha sei haus”.

¹¹Vann zvay mennah am fechta sinn un di fraw funn ayns funna kumd fa iahra mann helfa fechta geyyich da annah, un see langd naus un nemd hohld fumm anra mann vo's nett shiklich is,

¹²dann sellet diah iahra hand abhakka. Diah sellet see nett davvahra.

¹³Diah sellet nett zvay sadda gvichtah in eiyah sakk havva, en shveahres un en leichtes.

¹⁴Diah sellet aw nett zvay sadda mess-ksharra in eiyah haus havva, en grohses un en glennes.

¹⁵Diah misset folli un eahlichi gvichtah havva, un eahlich raus messa, so es diah lang layvet im land es da HAH eiyah Gott am eich gevva is.

¹⁶'Sis grauslich zumm HAH eiyah Gott vann ebbah so sach dutt un uneahlich is.

¹⁷Denket zrikk an vass di Amalekiddah gedu henn zu eich am vayk nohch vo diah aus Egypta kumma sind.

¹⁸Vo diah shvach un meet voahret sinn si raus kumma un henn selli doht gmacht es hinna nohch voahra; si henn kenn furcht katt funn Gott.

¹⁹So vann da HAH eiyah Gott eich moll roo gebt funn awl eiyah feinda um eich rumm, im land es eah am eich gevva is fa's ivvah-nemma es en eahbshaft, no sellet diah awl di Amalekiddah gans ausreiva so es nimmand may an si denkt. Fagesset sell nett.