Read Pennsylvania German 5. Mosi 26 Bible Online

5. Mosi 26 - Pennsylvania German bible

5. Mosi 26

¹Vann diah moll in's land ganga sind es da HAH eiyah Gott am eich gevva is fa en eahbshaft, un diah drinn voonet,

²dann sellet diah en dayl funn awl em eahshta frucht fumm grund nemma un's in en koahb du. Dess is es eahsht-frucht fumm land es da HAH eiyah Gott eich gebt. No sellet diah an da blatz gay es da HAH eiyah Gott raus layst, un vo sei nohma bleibt.

³Datt sellet diah zumm preeshtah gay es da deensht hott an selli zeit un sawwa zu eem, “Ich bekenn heit zumm HAH dei Gott es ich in's land kumma binn es da HAH kshvoahra hott zu unsah foah-feddah fa uns gevva.”

⁴Da preeshtah soll no da koahb funn eiyah hend nemma un en fannich da awldah fumm HAH eiyah Gott shtella.

⁵No sellet diah sawwa fannich em HAH eiyah Gott, “Mei daett voah en Aramayah es rumm heah ganga is. Eah is nunnah in Egypta ganga mitt nett feel leit un hott datt gvoond. Datt is eah en grohs folk vadda, mechtich un mitt feel leit.

⁶Avvah di Egyptah henn uns veesht gyoost, henn uns gmacht veesht leida un henn uns gmacht hatt shaffa.

⁷No henn miah naus groofa zumm HAH, da Gott funn unsah feddah, un da HAH hott unsah shtimm keaht un hott unsah aylend, unsah haddi eahvet un unsah noht ksenna.

⁸So hott da HAH uns aus Egypta gebrocht mitt en mechtichi hand un en naus kshtrektah oahm, mitt grohsah angsht deich zaycha un vundahra.

⁹Eah hott uns an deah blatz gebrocht un hott uns dess land gevva, en land es lawft mitt millich un hunnich.

¹⁰Un nau bring ich's eahsht-frucht fumm grund es du miah gevva hosht, oh HAH.” Doond da koahb fannich da HAH eiyah Gott shtella, bikket eich nunnah un deenet da HAH eiyah Gott.

¹¹Diah un di Lefiddah un di ausahra unnich eich sellet fraylich sei fa alles es da HAH eiyah Gott eich un eiyah haus-halding gevva hott.

¹²Vann diah moll faddich sind en zeyyadel funn awl eiyah shtoft zrikk setza im dridda yoah (es yoah fumm zeyyadel gevva), no sellet diah sell gevva zu di Lefiddah, di ausahra, selli unni eldra un di vitt-veivah, so es si essa kenna in eiyah shtett un satt sei.

¹³No sellet diah sawwa zumm HAH eiyah Gott, “Ich habb sell vass heilich is aus meim haus gebrocht, un habb's zu di Lefiddah, di ausahra, selli unni eldra un di vitt-veivah gevva so vi du gebodda hosht. Ich binn nett vekk gedrayt funn dei gebodda un ich habb kens funna fagessa.

¹⁴Ich habb kens difunn gessa diveil es ich am dreebsawl leida voah, adda ennichs raus gnumma diveil es ich unrein voah, un aw kens difunn gevva zu di dohda. Ich habb em HAH mei Gott keicht, un habb alles gedu es du miah gebodda hosht fa du.

¹⁵Gukk runnah fumm himmel funn dei heilichah voon-blatz un sayken Israel, dei leit, un's land es du uns gevva hosht, en land es lawft mitt millich un hunnich, so vi du kshvoahra hosht zu unsah foah-feddah.”

¹⁶Da Mosi hott no veidah ksawt, “Deah dawk dutt da HAH eiyah Gott eich's gebott gevva es diah dee gebodda un adninga haldet. Diah sellet si halda mitt eiyah gans hatz un sayl.

¹⁷Diah hend vissa glost heit es da HAH eiyah Gott is, es diah in seim vayk lawfa zaylet, es diah sei ksetza, gebodda un adninga halda zaylet un es diah sei shtimm heicha zaylet.

¹⁸Un da HAH hott vissa glost heit es diah sei aykni, keshtlichi leit sind, vi eah eich fashprocha hott, un es diah awl sei gebodda halda sellet.

¹⁹Eah zayld eich hohch ufsetza ovvich awl di heida es eah kshaffa hott, un diah zaylet macha es sei nohma gepreist un hohch-geaht vatt. Diah zaylet en leit sei es heilich sinn zumm HAH eiyah Gott so vi eah fashprocha hott.”