Read Pennsylvania German 5. Mosi 27 Bible Online

5. Mosi 27 - Pennsylvania German bible

5. Mosi 27

¹No hott da Mosi un di eldishti funn Israel dee gebodda gevva zu di leit: “Haldet awl di gebodda es ich eich gebb heit.

²Uf em dawk es diah ivvah da Jordan Revvah gaynd in's land es da HAH eiyah Gott eich gebt, dann sellet diah grohsi shtay ufhokka un si bleshtahra mitt kallich.

³Un shreivet awl di vadda funn demm ksetz uf di shtay, vann diah moll drivvah nivvah ganga sind in's land es da HAH eiyah Gott am eich gevva is, en land es lawft mitt millich un hunnich. Dess is grawt vi da HAH, da Gott funn eiyah foah-feddah, eich fashprocha hott.

⁴So vann diah moll ivvah da Jordan nivvah ganga sind, sellet diah dee shtay ufhokka am Berg Ebal vi ich am eich sawwa binn heit, un diah sellet si bleshtahra mitt kallich.

⁵Un datt sellet diah en awldah zumm HAH eiyah Gott bauwa, en awldah gmacht mitt shtay. Yooset kenn eisichi tools fa en bauwa.

⁶Bauwet en awldah fumm HAH eiyah Gott mitt unkakti shtay, un opfahret brand-opfahra druff zumm HAH eiyah Gott.

⁷Opfahret dank-opfahra datt, esset si un froiyet eich fannich em HAH eiyah Gott.

⁸Un diah sellet awl di vadda funn demm ksetz oahrich playn uf di shtay shreiva.”

⁹No hott da Mosi un awl di Lefiddishi preeshtah ksawt zu gans Israel, “Seind shtill un heichet, oh Israel! Diah sind heit di leit fumm HAH eiyah Gott vadda.

¹⁰Heichet em HAH eiyah Gott, un haldet sei gebodda un adninga es ich eich gebb heit.”

¹¹Sellah saym dawk hott da Mosi aw ksawt zu di leit:

¹²Vann diah moll ivvah da Jordan nivvah ganga sind dann sella dee shtamma uf em Berg Gerizim shtay diveil es di sayya auskshprocha vadda uf di leit: Simeon, Levi, Juda, Isachar, Joseph un Benjamin.

¹³Un dee shtamma sella uf em Berg Ebal shtay diveil es di flucha auskshprocha vadda: Ruben, Gad, Asser, Sebulon, Dan un Naphthali.

¹⁴Di Lefiddah sella dee vadda sawwa zu awl di leit funn Israel mitt en laudi shtimm:

¹⁵“Faflucht is ennich ebbah es en abgott adda en gegossa gleichnis macht—en grauslich ding zumm HAH es gmacht is mitt di hend funn en shaff-meishtah—un hokt's uf, hinna rumm.” No sella awl di leit sawwa, “Amen!”

¹⁶“Faflucht is ennich ebbah es sei daett un maemm nett eaht.” No sella awl di leit sawwa, “Amen!”

¹⁷“Faflucht is ennich ebbah es sei nochbah sei lein-meikah-shtay mooft.” No sella awl di leit sawwa, “Amen!”

¹⁸“Faflucht is ennich ebbah es en blindah mensh letz fiaht uf em vayk.” No sella awl di leit sawwa, “Amen!”

¹⁹“Faflucht is ennich ebbah es di ausahra, di kinnah unni eldra un di vitt-veivah iahra recht vekk nemd.” No sella awl di leit sawwa, “Amen!”

²⁰“Faflucht is sellah es shlohft mitt sei daett sei fraw, veil eah gedu hott vass yusht zu sei daett heaht.” No sella awl di leit sawwa, “Amen!”

²¹“Faflucht is ennich ebbah es sich gebt fa leiya mitt ennich diah.” No sella awl di leit sawwa, “Amen!”

²²“Faflucht is sellah es shlohft mitt sei shveshtah, ayni es sei daett adda maemm sei maydel is.” No sella awl di leit sawwa, “Amen!”

²³“Faflucht is sellah es shlohft mitt sei shviah-maemm.” No sella awl di leit sawwa, “Amen!”

²⁴“Faflucht is ennich ebbah es sei nochbah doht macht un nimmand vayst's.” No sella awl di leit sawwa, “Amen!”

²⁵“Faflucht is ennich ebbah es geld nemd fa en unshuldichah mensh doht macha.” No sella awl di leit sawwa, “Amen!”

²⁶“Faflucht is ennich ebbah es nett awl di vadda funn demm ksetz heicht un ausdrawkt.” No sella awl di leit sawwa, “Amen!”