Read Pennsylvania German 5. Mosi 30 Bible Online

5. Mosi 30 - Pennsylvania German bible

5. Mosi 30

¹Vann awl dee sayya un flucha es ich fannich eich ksetzt habb moll uf eich kumma, un diah sind am unnich di heida voona vo da HAH eiyah Gott eich anna gedrivva hott, dann denket drivvah,

²un drayyet zrikk zumm HAH eiyah Gott, diah un eiyah kinnah. Heichet eem mitt eiyah gans hatz un sayl in alles es ich eich sawk heit.

³No zayld da HAH eiyah Gott bamhatzich sei zu eich, un zayld eich viddah zammah geddahra funn unnich awl di heida es eah eich ausnannah gedrivva hott.

⁴Even vann diah in di veitshta lendah unnich em himmel vekk gedrivva voahret, dann zayld da HAH eiyah Gott eich zammah geddahra un eich zrikk bringa.

⁵Eah zayld eich zrikk bringa in's land es zu eiyah foah-feddah keaht hott, un diah zaylet's ivvah-nemma. Eah zayld eich goot du un eich may fameahra es eah eiyah foah-feddah hott.

⁶Da HAH eiyah Gott zayld eiyah hatza beshneida, un di hatza funn eiyah nohch-kummashaft, so es diah een leeb hend mitt awl eiyah hatz un sayl, un es diah layva zaylet.

⁷Da HAH eiyah Gott dutt no awl dee flucha uf eiyah feinda es eich hassa un eich fafolka.

⁸Diah zaylet no viddah em HAH heicha un awl sei gebodda halda es ich am eich gevva binn heit.

⁹Da HAH eiyah Gott macht no es es goot gayt fa eich mitt awl di eahvet funn eiyah hend, di frucht funn eiyah muddahs-leib, di frucht funn eiyah fee un di frucht funn eiyah grund. Da HAH zayld sich viddah froiya fa eich goot du, grawt vi eah hott fa eiyah foah-feddah.

¹⁰Dess is vann diah em HAH eiyah Gott heichet un sei gebodda un adninga haldet es kshrivva sinn in demm buch fumm ksetz. Diah misset zumm HAH eiyah Gott drayya mitt eiyah gans hatz un eiyah gansi sayl.

¹¹Da Mosi hott no ksawt: Dess gebott es ich am eich gevva binn heit is nett zu veit ab fa eich zu fashtay un du.

¹²'Sis nett drovva im himmel so es diah frohwa misset, “Veah gayt nuff in da himmel un grikt's un gebt's zu uns so es miah's du kenna?”

¹³'Sis aw nett ivvah em say drivva so es diah frohwa misset, “Veah gayt ivvah da say nivvah un grikt's un gebt's zu uns so es miah's du kenna?”

¹⁴Nay, 's vatt is oahrich nayksht zu eich; 'sis in eiyah maul un hatz so es diah's du kennet.

¹⁵Gukket moll, ich habb heit fannich eich ksetzt sell vass eich layva gevva kann un vass eich goot du kann, adda vass eich da doht gevva kann un eich zu nix bringa kann.

¹⁶Ich gebb eich's gebott heit es diah da HAH eiyah Gott leevet, in seim vayk lawfet un sei gebodda, adninga un ksetza haldet. No zaylet diah layva un eich fameahra, un da HAH eiyah Gott saykend eich im land es diah am nei gay sind fa's ivvah-nemma.

¹⁷Avvah vann eiyah hatza vekk drayya un diah's nett doond fa heicha, un vann diah vekk gezowwa vaddet fa eich nunnah bikka zu anri gettah un fa si deena,

¹⁸dann sawk ich eich heit es diah zaylet gevislich zu nix gebrocht sei. Diah zaylet nett lang layva im land es diah am nei gay sind fa's ivvah-nemma, drivva uf di annah seit fumm Jordan.

¹⁹Heit roof ich zumm himmel un di eaht fa en zeiya geyyich eich, es ich layva un doht, sayya un flucha fannich eich ksetzt habb. Nau nemmet layva, so es diah un eiyah kinnah layva kennet.

²⁰Lohvet da HAH eiyah Gott, heichet sei shtimm ab un henket oh zu eem. Da HAH gebt eich layva, un eah lost eich lang layva im land es eah kshvoahra hott fa gevva zu eiyah foah-feddah, da Abraham, da Isaac un da Jakob.