Read Pennsylvania German 5. Mosi 34 Bible Online

5. Mosi 34 - Pennsylvania German bible

5. Mosi 34

¹No is da Mosi funn hunna uf em ayvana in Moab nuff uf da Berg Nebo ganga, nuff ovva uf Pisga, yusht hivva funn Jericho. Datt hott da HAH eem's gans land gvissa, funn Gilead zu Dan,

²awl's land fumm Naphthali, fumm Ephraim un fumm Manasse; awl's land fumm Juda so veit west es da say;

³'s land in di saut un di gans Jericho Valley, un di Palma-Shtatt, so veit es Zoar.

⁴No hott da HAH ksawt zu eem, “Dess is es land es ich kshvoahra habb fa gevva zumm Abraham, em Isaac un em Jakob vo ich ksawt habb, ‘Ich gebb's zu dei nohch-kummashaft.’ Ich habb dich glost's sayna mitt dei awwa, avvah du daufsht nett nivvah in's land nei gay.”

⁵Un da Mosi, em HAH sei gnecht, is kshtauva datt in Moab so vi da HAH ksawt katt hott.

⁶Eah hott een fagrawva datt in Moab drunna in di valley nayksht an Beth-Peor, avvah nimmand vayst vo sei grawb is even heit noch.

⁷Da Mosi voah en hunnaht un zvansich yoah ald vo eah kshtauva is, avvah sei awwa voahra nett shvach un aw nett sei grefta.

⁸Di Kinnah-Israel henn uf kokt un gveind fa da Mosi datt in di plains funn Moab fa dreisich dawk, biss di dawwa funn veines ivvah voahra.

⁹Nau da Joshua, em Nun sei boo, voah kfild mitt em geisht funn veisheit, veil da Mosi sei hend uf een glaykt katt hott. Un di Kinnah-Israel henn een abkeicht un henn gedu vi da HAH da Mosi gebodda katt hott.

¹⁰Siddah sell is kenn brofayt ufkshtanna in Israel vi da Mosi, deah es da HAH gekend hott ksicht zu ksicht.

¹¹Kenn anrah brofayt hott selayva di zaycha un vundahra gedu vi selli es da HAH da Mosi kshikt hott fa du in Egypta zumm Pharao un sei gnechta, un zumm gansa land.

¹²Un nimmand hott selayva di mechtich graft gvissa un di shreklicha sacha gedu es da Mosi hott fannich di awwa funn gans Israel.