Read Pennsylvania German 5. Mosi 8 Bible Online

5. Mosi 8 - Pennsylvania German bible

5. Mosi 8

¹Awl di gebodda es ich am eich gevva binn heit sella diah pinklich ausdrawwa. Dess is so es diah layvet un eich fameahret, un nei in's land gaynd un's ivvah-nemmet, so vi da HAH kshvoahra hott zu eiyah foah-feddah.

²Fagesset nett awl da vayk es da HAH eiyah Gott eich kfiaht hott dee fatzich yoah in di vildahnis, so es eah eich daymeedicha un ausbroviahra hott kenna fa sayna vass in eiyah hatz voah, un eb diah sei gebodda ausdrawwet adda nett.

³Eah hott eich gedaymeedicht un eich glost hungahrich sei, no hott eah eich kfeedaht mitt manna, sell es diah un eiyah feddah nett gekend henn. Dess voah so es diah vissa sellet es da mensh nett laybt funn yusht broht, avvah funn alles es aus em maul fumm HAH kumd.

⁴Eiyah glaydah sinn nett ausgvoahra un eiyah fees sinn nett ufkshvulla deich awl dee fatzich yoah.

⁵Visset dann in eiyah hatz es da HAH eiyah Gott eich recht setzt un shtrohft, grawt vi en mann sei boo land un shtrohft.

⁶Diah sellet di gebodda fumm HAH eiyah Gott halda, so es diah in seim vayk lawfet un een firchtet.

⁷Da HAH eiyah Gott is am eich in en goot land bringa, en land mitt vassah-grikka, vassah-lechah un shpringa es lawfa in di deicha un hivla;

⁸en land vo vaytza un geahsht, drauva-ranka, feiya-baym un grannat-ebbel drinn vaxa, en land mitt ayl-baym un hunnich;

⁹en land vo diah genunk broht greeyet zu essa un kenn noht havva zaylet; en land vo di shtay eisa sei zayla, un diah kennet kubbah aus di hivla grawva.

¹⁰Vann diah gessa hend un satt sind, dann sellet diah da HAH eiyah Gott danka fa's goot land es eah eich gevva hott.

¹¹Gevvet acht es diah da HAH eiyah Gott nett fagesset bei ufheahra sei gebodda, ksetza un adninga halda es ich am eich gevva binn heit.

¹²Adda, vann diah gessa hend un satt sind un shayni heisah gebaut hend un drinn gvoond hend,

¹³un vann eiyah kee un shohf un silvah un gold un alles es diah hend moll feel vatt,

¹⁴no mecht eiyah hatz shtols vadda un diah da HAH eiyah Gott fagessa es eich aus Egypta gebrocht hott, aus em land funn gnechtheit.

¹⁵Eah hott eich deich selli grohs un heslich vildahnis kfiaht, datt vo giftichi shlanga, scorpions un dashtichah grund unni vassah voah. Eah hott eich vassah aus em hadda shtay gebrocht.

¹⁶In di vildahnis hott eah eich manna gevva zu essa, sell es eiyah foah-feddah nett gekend henn, so es eah eich daymeedicha un fasucha hott kenna, un eich goot du hott kenna am end.

¹⁷Gevvet acht es diah nett sawwet in eiyah hatz, “Mei graft un mei shteiki hend henn mich reich gmacht vi dess.”

¹⁸Avvah fagesset nett da HAH eiyah Gott; es is een es eich graft gebt fa reich vadda. Eah dutt dess fa sei bund halda es eah kshvoahra hott zu eiyah foah-feddah un dutt dess heit noch.

¹⁹Vann diah selayva da HAH eiyah Gott fagesset, un gaynd anri gettah nohch, un deenet un baydet si oh, dann gebb ich zeiknis heit es diah geviss umkumma zaylet.

²⁰Vi di heida es da HAH fannich eich umbringa zayld, so zayla diah umkumma veil diah nett keicht hend zu di shtimm fumm HAH eiyah Gott.