Read Pennsylvania German 1. Korinther 16 Bible Online

1. Korinther 16 - Pennsylvania German bible

1. Korinther 16

¹Nau veyyich geld uf macha fa di saylicha, vi ich di gmayna in Galatia ksawt habb, so sella diah aw du.

²Uf em eahshta dawk funn di voch loss alli-ebbah samm geld vekk du es en dayl is funn vass eem gevva voah. Dess is so es diah kenn geld uf macha misset vann ich moll kumm.

³No vann ich moll kumm gevvich breefa zu selli vo diah raus groofa hend, un shikk si noch Jerusalem mitt eiyah kshenkah.

⁴Un vann's shiklich is es ich aw gay sett, dann kenna si mitt miah gay.

⁵Ich zayl zu eich kumma vann ich moll deich Matzedonia ganga binn. Fa ich vill deich Matzedonia gay,

⁶un's mecht sei es ich veil bei eich bleib, un fleicht ivvah da gans vindah, so es diah mich on shikka kennet zu vo-evvah es ich hee gay funn datt.

⁷Ich vill eich nett yusht kshvind psucha, avvah ich vill veil bei eich bleiva vann da Hah's alawbt.

⁸Ich vill in Ephesus bleiva biss an di Pingshta.

⁹Fa en grohsi deah mitt feel frucht is uf gmacht zu miah, un's sinn feel es geyyich mich shaffa.

¹⁰Nau vann da Timotheus kumd, saynet ditzu es eah nix zu feicha hott diveyya diveil es eah bei eich is. Fa eah shaft em Hah sei eahvet grawt vi ich aw du.

¹¹Losset nimmand een fa'achta. Helfet eem uf sei vayk in fridda so es eah zu miah kumma kann, fa ich gukk fa een mitt di breedah.

¹²Nau veyyich unsahm broodah, da Apollos, ich habb een famohnd es eah zu eich kumma sett mitt di breedah, avvah eah hott goah nett vella an deahra zeit. Eah kumd shpaydah vann's bessah soot.

¹³Vatshet eich, shtaynd fesht im glawva, seind mennah mitt moot, seind shteik.

¹⁴Losset alles es diah doond, gedu sei mitt leevi.

¹⁵Ich vill eich famohna, leevi breedah. Diah doond selli kenna im Stephanas sei haus-halding, un visset es si di eahshta voahra es geglawbt henn in Achaia. Diah visset aw es si sich ivvah-gevva henn fa selli helfa vo gerecht sinn.

¹⁶Ich famohn eich es diah eich uf gevvet zu so leit, un zu awl selli vo sellah vayk helfa un shaffa.

¹⁷Ich froi mich es da Stephanas, da Fortunatus un da Achaicus kumma henn kenna, fa si henn uf gmacht fa dess es diah nett bei miah sei hend kenna.

¹⁸Si henn mei geisht gedraysht un eiyahra aw. Fasell, achtet so leit vi sell.

¹⁹Di gmayna funn Asia greesa eich. Da Aquila un di Priscilla shikka eich voahmi greesa im Hah, un so dutt di gmay vo sich fasammeld in iahra haus.

²⁰Awl di breedah un shveshtahra shikka eich greesa. Greeset nannah mitt em heilicha kuss.

²¹Mitt mei aykni hand shreib ich mei grees zu eich.

²²Vann ennich ebbah kenn leevi hott fa da Hah Jesus Christus, loss een fadamd sei. Maranatha, da Hah kumd.

²³Di gnawt funn unsah Hah Jesus Christus sei mitt eich.

²⁴Mei leevi sei mitt eich awl in Christus Jesus. Amen.