Read Pennsylvania German Galater 5 Bible Online

Galater 5 - Pennsylvania German bible

Galater 5

¹Shtaynd nau in di freiheit es Christus uns frei gmacht hott, un losset eich nett viddah gebunna sei.

²Nemmet acht funn demm: Ich da Paulus, sawk eich, vann diah eich beshneida losset, dann dutt Christus eich goah kenn goot.

³Fa ich sawk viddah zu alli-ebbah es sich beshneida lost, es eah is shuldich fa's gans Ksetz halda.

⁴Diah vo am broviahra sind gerecht gmacht sei deich's Ksetz, hend eich abkshnidda funn Christus; diah sind vekk kfalla funn di gnawt.

⁵Fa miah falossa uns uf da Geisht, un voahra fa di hofning funn gerechtichkeit deich da glawva.

⁶Vann miah in Christus Jesus sinn, dann maynd di beshneidung, un aw di unbeshneidung goah nix. Yusht da glawva am shaffa deich di leevi maynd ebbes.

⁷Diah voahret am so goot du. Veah hott eich fashvetzt un eich kalda funn di voahheit du?

⁸Dess fashvetzes kumd nett funn demm vo eich groofa hott.

⁹En bissel savvah-dayk fasavvaht da gans dayk.

¹⁰Ich habb folshtendichah glawva in eich es diah kenn anrah glawva ohnemmet; avvah da vann vo am eich druvla is soll sei shtrohf drawwa, veah-evvah es eah is.

¹¹Avvah, leevi breedah, vann ich di beshneidung noch breddich, favass binn ich noch am fafolkt vadda? Vann sell voah veah, veah's eiyahnis fumm greitz vekk gnumma.

¹²Ich vott selli vo am eich druvla sinn dayda sich selvaht abshneida.

¹³Avvah diah, leevi breedah, voahret groofa zu di freiheit. Yusht gevvet acht es diah eiyah freiheit nett nemmet fa's flaysh deena, avvah deich di leevi soll aynah da annah deena.

¹⁴Fa's gans Ksetz is folfild in ay vatt: “Du solsht dei nochbah leeva vi dich selvaht.”

¹⁵Vann diah ohhaldet nannah beisa un fressa, gevvet acht es diah nett nannah uf fresset.

¹⁶Ich sawk avvah, lawfet im Geisht, no drawwet diah's falanga fumm flaysh nett aus.

¹⁷Fa's falanga fumm flaysh is geyyich's falanga fumm Geisht un's falanga fumm Geisht geyyich's falanga fumm flaysh. Si sinn geyyich nannah un halda eich funn du vass diah vellet.

¹⁸Avvah vann diah kfiaht sind bei em Geisht, sind diah nett unnich em Ksetz.

¹⁹Nau ma kann di verka fumm flaysh goot sayna, si sinn: aybruch, huahrahrei, unreinichkeit, unzucht,

²⁰abgettahrei, hexahrei, hass, shtreit, fagunsht, zann, zaufa, unaynichkeit, shpaldinga,

²¹shpeit, maddahrei, saufahrei, fressahrei un so gleicha. Ich vill eich foah vanna grawt vi ich habb difoah, es selli vo so sacha doon zayla nett's Reich-Gottes eahva.

²²Avvah di frucht fumm Geisht is leevi, frayt, fridda, geduld, freindlichkeit, goot-maynichkeit, glawva,

²³daymoot, un fashtendlichkeit. Es hott kenn Ksetz geyyich so sacha.

²⁴Selli vo zu Christus heahra henn iahra flaysh, mitt em lusht un em vinsh, gegreitzicht.

²⁵Vann miah im Geisht layva, loss uns aw im Geisht lawfa.

²⁶Losset uns nett eah-geitzich sei, adda nannah ufshtadda un nannah fagunna.