Read Pennsylvania German Epheser 5 Bible Online

Epheser 5 - Pennsylvania German bible

Epheser 5

¹Fasell, machet Gott nohch, so vi leeblichi kinnah.

²Un lawfet in leevi, so vi Christus uns leeb katt hott, un hott sich selvaht ufgevva fa uns fa en kshenk un en sees-shmakkich opfah zu Gott.

³Avvah losset nett huahrahrei un ennichi unreinichkeit, adda lusht fa sacha even gnohmd sei unnich eich, fa dess is nett shiklich unnich heilichi leit.

⁴Losset nix ungerechtes, adda dummi un drekkichi kshvetzah vo nett shiklich sinn unnich eich sei; avvah in blatz funn sellem gevvet dank.

⁵Fa diah visset es kenn huahrah adda unreinah mensh, adda aynah es lusht hott fa sacha, sell is, aynah es abgettah deend, ennichi eahbshaft hott im Kaynich-Reich funn Christus un funn Gott.

⁶Losset nimmand eich fafiahra mitt leahri vadda, fa's is deich so sacha es da zann funn Gott uf di kinnah kumd vo nett heicha.

⁷Fasell, seind nett mitt-helfah mitt sohwichi.

⁸Fa diah voahret an ay zeit dunkelheit, avvah nau sind diah licht im Hah; lawfet vi kinnah fumm licht.

⁹(Fa di frucht fumm Geisht is alles goodheit, gerechtichkeit un voahheit.)

¹⁰Broviahret lanna vass em Hah kfellich is,

¹¹un hend nix zu du mitt di unfruchtboahri verka vass in di dunkelheit heahra; leevah bringet si raus in's licht.

¹²Fa's is en shohm fa even shvetza veyyich di sacha es si doon hinna rumm.

¹³Avvah ennich ebbes es in's licht gebrocht vatt, dess kann ma sayna, fa's licht dekt alles ab so es ma's sayna kann.

¹⁴Sell is favass es es sawkt, “Vekk uf, du es shlohfsht, shtay uf funn di dohda, un Christus zayld diah licht gevva.”

¹⁵So saynet es diah acht gevvet vi diah lawfet, nett vi selli unni veisheit, avvah vi selli es veisheit henn.

¹⁶Un machet's mensht aus di zeit, fa di dawwa sinn evil.

¹⁷Fasell seind nett unksheit, avvah fashtaynd vass em Hah sei villa is.

¹⁸Un vaddet nett ksoffa mitt vei, fa sell is kenn fashtand, avvah vaddet kfild mitt em Geisht.

¹⁹Famohnet nannah mitt psaltah, lohb-leedah un geishtlichi leedah; singet un lohvet da Hah in eiyah hatza.

²⁰Un gevvet immah dank fa alli sacha zu Gott un em Faddah im nohma funn unsahm Hah Jesus Christus.

²¹Gevvet eich uf zu nannah in di furcht funn Gott.

²²Veivah, gevvet eich unnich eiyah mennah vi zumm Hah,

²³fa da mann is ivvah di fraw so vi Christus ivvah di gmay is; un eah is da Heiland funn seim leib.

²⁴Vi di gmay unnich Christus is, so losset di veivah sich unnich iahra mennah gevva in alli sach.

²⁵Diah mennah, leevet eiyah veivah so vi Christus di gmay gleebt hott, un hott sich selvaht gevva fa see.

²⁶Dess voah so es eah see heilich un rein macha kann bei see vesha mitt vassah deich's Vatt,

²⁷un so es eah di gmay hallich fannich sich selvaht shtella kann, unni flekka un runsla adda ennich ebbes vi sell, avvah es see heilich is un kenn faylah hott.

²⁸Grawt so sella di mennah iahra veivah leeb havva, vi si iahra ayya leib leeb henn. Deah vo sei fraw leebt, dutt sich selvaht leeva,

²⁹fa nimmand hott selayva sei ayya flaysh kast, avvah eah faseikt's, un hott's leeb so vi da Hah di gmay leeb hott.

³⁰Dess is veil miah daylah sinn funn seim leib, funn seim flaysh, un funn sei gnocha.

³¹Fasell soll en mann sei faddah un muddah falossa, un soll ohkanka sei zu sei fraw; un di zvay sella ay flaysh sei.

³²Dess is en deefi sach es ma nett fashtayt, avvah ich binn am shvetza veyyich Christus un di gmay.

³³Doch, loss alli-ebbah funn eich sei fraw so leeb havva es sich selvaht; un di fraw soll iahra mann achta.