Read Pennsylvania German Philipper 4 Bible Online

Philipper 4 - Pennsylvania German bible

Philipper 4

¹Fasell, mei leevi breedah, diah vo ich en falanga habb difoah, un diah vo mei frayt un mei krohn sind, shtaynd shtandhaftich im Hah, mei leeblichi.

²Ich famohn di Euodia un di Syntyche fa aynich sei mitt-nannah im Hah.

³Un ich frohk dich aw, mei shtandhaftichah mitt-helfah, helf dee veibsleit vo mitt miah kshaft henn im Effangaylium, un aw mitt em Klement un di ivvahricha funn meina mitt-helfah, dee vo iahra nayma im layves-buch henn.

⁴Froiyet eich immah im Hah, un ich sawk viddah, froiyet eich.

⁵Losset alli-ebbah eiyah sanftmoot sayna. Da Hah is nayksht.

⁶Seind nett engshtlich veyyich ennich ebbes, avvah in alles deich bayda un ohhalda, un deich dank gevva, losset eiyah noht vissa gmacht sei zu Gott.

⁷Un da fridda funn Gott, vo haychah is es alles es miah fashtay kenna, zayld eiyah hatza un gedanka heeda deich Christus Jesus.

⁸Un endlich, leevi breedah, vass-evvah es voah is, vass-evvah es eahlich is, vass-evvah es recht is, vass-evvah es heilich is, vass-evvah es leeblich is, vass-evvah es en goot kshvetz hott, vann ennich ebbes goot is, un vann ennich ebbes gepreist sei sett, denket an dee sacha.

⁹Selli sacha vass diah gland hend, adda eignumma hend, adda keaht hend, adda ksenna hend funn miah, selli doond. Un da Gott funn fridda vatt bei eich sei.

¹⁰Ich habb mich oahrich kfroit im Hah es diah endlich viddah bekimmaht sind veyyich miah. Ich vays es diah di gans zeit bekimmaht voahret, avvah diah hend kenn gleyyaheit katt fa's veisa.

¹¹Nett es ich shvetz veyyich noht, fa ich habb gland fa zufridda sei mitt vass ich habb un mitt vo ich binn.

¹²Ich vays vi zu layva mitt bissel, un ich vays vi zu layva mitt feel. Ich habb gland fa zufridda sei ennich vo, eb's maynd satt sei adda hungahrich sei, eb's maynd layva mitt feel adda layva mitt noht.

¹³Ich kann alles du deich Christus vo miah graft gebt.

¹⁴Doch, diah hend goot gedu es diah eich ufgnomma hend mitt mei dreebsawl.

¹⁵Diah funn Philippi visset avvah es am ohfang fumm Effangaylium vo ich Matzedonia falossa habb, hott nett ay gmay gedayld mitt miah veyyich di sach funn ausgevva un einemma, vi yusht diah laynich.

¹⁶Shund vo ich in Thessalonicha voah hend diah miah may vi aymol hilf kshikt fa mei noht.

¹⁷Nett es ich am gukka binn fa en kshenk, avvah ich binn am gukka fa frucht vo ufkshrivva vatt zu eich.

¹⁸Ich habb alles grikt, un may es ich brauch. Nau es ich di kshenkah grikt habb fumm Epaphroditus es diah kshikt henn, habb ich alles es ich brauch. Dee kshenkah sinn vi en sees-shmakkichah opfah es Gott ohnemd un es kfellich sinn zu eem.

¹⁹Mei Gott zayld eich alles gevva es diah brauchet aus sei reichheit in di hallichkeit deich Christus Jesus.

²⁰Zu unsahm Gott un Faddah, sei hallichkeit fa immah un immah. Amen.

²¹Greeset awl di glawvichi in Jesus Christus. Di breedah vo bei miah sinn greesa eich.

²²Awl di saylicha shikka eich en groos, un ennichah selli vo fumm Kaisah sei haus sinn.

²³Di gnawt funn unsahm Hah Jesus Christus sei mitt eich awl. Amen.