Read Pennsylvania German 1. Thessalonicher 5 Bible Online

1. Thessalonicher 5 - Pennsylvania German bible

1. Thessalonicher 5

¹Nau, leevi breedah, veyyich di zeida un shtunda, is es nett nohtvendich es ich eich shreib.

²Fa diah selvaht visset goot genunk es da dawk fumm Hah kumma zayld vi en deeb in di nacht.

³Vann leit sawwa, “Fridda, un miah henn kenn kfoah,” no bletzlich kumd dess fadeahves uf si vi di shmatza uf en fraw vo en kind havva zayld. Un nimmand kann vekk difunn.

⁴Avvah leevi breedah, diah sind nett im dunkla, es sellah dawk eich ivvah-nemma sett vi en deeb.

⁵Diah sind awl kinnah fumm licht, un kinnah fumm dawk. Miah sinn nett funn di nacht, adda fumm dunkla.

⁶So dann, losset uns nett shlohfa vi anri doon, avvah vella vakkah bleiva un uns vatsha.

⁷Fa selli vo shlohfa, shlohfa deich di nacht, un selli vo ksoffa vadda, vadda ksoffa deich di nacht.

⁸Avvah siddah es miah zumm dawk heahra, vella miah sohbah bleiva. Doond's brusht-playt fumm glawva un leevi oh, un fa en greeks-hoot, di hofning funn di saylichkeit.

⁹Fa Gott hott uns nett groofa fa da zann deich macha, avvah fa di saylichkeit greeya deich da Hah Jesus Christus.

¹⁰Eah is kshtauva fa uns so es, eb miah vakkah sinn adda am shlohfa sinn, miah mitt-nannah bei eem layva kenna.

¹¹Fasell, famohnet nannah un bauwet nannah uf, so vi diah am du sind.

¹²Avvah miah frohwa eich, leevi breedah, fa selli eahra vo am shaffa sinn unnich eich un ivvah eich sinn im Hah, un vo eich famohna.

¹³Achtet see oahrich hohch in leevi fa iahra eahvet. Seind in fridda unnich nannah.

¹⁴Nau miah famohna eich, leevi breedah, es diah selli vanna doond vo faul sinn, drayshtet selli vo vennich moot henn, drawwet di shvacha, un seind geduldich mitt alli-ebbah.

¹⁵Saynet ditzu es nimmand evil zrikk betzawld mitt evil, avvah gukket immah fa goot du zu nannah un zu alli-ebbah.

¹⁶Seind immah fraylich.

¹⁷Baydet unni nohch lossa.

¹⁸Seind dankboah in alli sacha, fa dess is Gott sei villa fa eich in Jesus Christus.

¹⁹Machet's feiyah fumm Geisht nett aus.

²⁰Fa'achtet nett broffetzeiyunga,

²¹avvah broviahret alles aus, un vass goot is, haldet.

²²Haldet eich vekk funn ennich ebbes es en shein hott funn evil.

²³Un miah bayda es da Gott funn fridda eich deich un deich heilich macht. Miah bayda es eah eiyah geisht, sayl un leib unshuldich hald am dawk vo unsah Hah Jesus Christus kumd.

²⁴Shtandhaftich is sellah vo eich rooft; eah vatt's aw du.

²⁵Leevi breedah, baydet fa uns.

²⁶Greeset awl di breedah mitt en heilichah kuss.

²⁷Ich gebb eich en gebott fannich em Hah es deah breef glaysa sei soll zu awl di heilichi breedah un shveshtahra.

²⁸Di gnawt funn unsah Hah Jesus Christus sei bei eich. Amen.