Read Pennsylvania German Joshua 13 Bible Online

Joshua 13 - Pennsylvania German bible

Joshua 13

¹Vo da Joshua ald un hohch in di yoahra voah, hott da HAH ksawt zu eem, “Du bisht oahrich ald, un's is noch feel land ivvahrich fa gnumma sei.

²Dess is es land es noch ivvahrich is: Awl's land funn di Philishtah un di Gessuriddah.

³Es land fumm Sihor Revvah east funn Egypta zu's land funn Ekron in di natt is awl Kanaaniddish land. Es heaht zu di fimf Philishtah kaynicha in Gaza, Asdod, Ashkelon, Gath un Ekron—un aw noch di Avviddah.

⁴Sauda is noch awl's land funn di Kanaaniddah, un Meara es zu di Sidoniddah heaht so veit es Aphek zu di lein mitt di Amoriddah.

⁵Un's is noch's land funn di Gebaliddah, un gans Lebanon geyyich di east funn Baal-Gad unnich em Berg Hermon biss an Hamath.

⁶Awl di leit in di hivla funn Lebanon so veit es Misrephoth-Maim un awl di Sidoniddah zayl ich ausdreiva fannich di Kinnah-Israel. Avvah mach es du's land fadaylsht unnich Israel fa en eahbshaft vi ich dich gebodda habb.

⁷Fadayl's land fa en eahbshaft unnich di nein shtamma, un da halb-shtamm fumm Manasse.”

⁸Di annah helft fumm Manasse, di Rubeniddah un di Gadiddah henn iahra eahbshaft grikt uf di east seit fumm Jordan. Da Mosi em HAH sei gnecht hott eena dess gevva grawt vi eah's ausglaykt katt hott fa si.

⁹Iahra land hott glangd funn Aroer vo's nunnah gayt in's deich funn Arnon un di shtatt in di mitt fumm deich, un's nemd aw's hohch land ei funn Medeba biss an Dibon.

¹⁰Es nemd aw awl di shtett ei fumm Sihon, da kaynich funn di Amoriddah es an Hesbon gvoond hott, biss nivvah an di lein mitt di kinnah fumm Ammon.

¹¹Iahra land hott aw Gilead eignumma. Di leit funn Gessur un Maacha henn datt gvoond. Da gans Berg Hermon uns gans land funn Basan voah iahra biss an Salcha.

¹²Sell voah's kaynich-reich fumm Og in Basan. Eah hott ivvah di shtett funn Astharoth un Edrei groold un voah ayns funn di letshta Rephiddah. Da Mosi hott si gebodda im greek un hott eahra land ivvah-gnumma.

¹³Avvah di Kinnah-Israel henn nett di leit funn Gessur un Maacha ausgedrivva, un si layva noch unnich di Kinnah-Israel biss deah dawk.

¹⁴Avvah zumm shtamm fumm Levi hott eah kenn eahbshaft gevva. Di opfahra es gmacht sinn mitt feiyah zumm HAH, da Gott funn Israel, voah iahra eahbshaft vi eah fashprocha katt hott.

¹⁵Un dess is vass da Mosi zu da shtamm fumm Ruben gevva hott kshlecht bei kshlecht.

¹⁶Iahra land hott glangd funn Aroer vo's nunnah gayt in's deich funn Arnon, un di shtatt in di mitt fumm deich, fabei's hohch land funn Medeba,

¹⁷biss an Hesbon un awl di hohcha shtett funn Dibon, Bamoth-Baal, Beth-Baal-Meon,

¹⁸Jahza, Kedemoth, Mephaath,

¹⁹Kirjathaim, Sibma un Zereth-Sahar es uf em hivvel in di valley voah.

²⁰Es hott aw di shtett funn Beth-Peor un Beth-Jesimoth eignumma, un di hivla unna am Berg Pisga.

²¹So hott iahra land awl di shtett uf em ayvana land eignumma un da Sihon, da kaynich funn di Amoriddah voah ivvah si awl. Eah hott in di shtatt Hesbon gvoond. Da Mosi hott een un di foah-gengah funn di Midianiddah gebodda katt im greek. Di foah-gengah voahra da Evi, da Rekem, da Zur, da Hur un da Reba. Awl dee foah-gengah henn kfochta katt mitt em Sihon geyyich da Mosi. Si henn in sellem land gvoond.

²²Di Kinnah-Israel henn feel leit doht gmacht, un henn aw da Bileam, da sohn fumm Beor, doht gmacht mitt em shvatt. Eah hott hexahrei gedrivva.

²³Es land es zu di kinnah fumm Ruben gevva voah hott kshtobt am Jordan Revvah. Dee shtett un iahra nochbahshafta voahra di eahbshaft funn di kinnah fumm Ruben, kshlecht bei kshlecht.

²⁴Dess is vass da Mosi zu di nohch-kummashaft fumm Gad gevva hott kshlecht bei kshlecht.

²⁵Iahra land voah Jaser, awl di shtett funn Gilead un dihelft funn di kinnah Ammon iahra land, so veit es Aroer, nayksht an Rabba.

²⁶Un's gayt funn Hesbon so veit es Ramoth-Mizpe un Betonim, un funn Mahanaim biss an di lein mitt Debir.

²⁷Iahra land hott's deich, Beth-Haram, Beth-Nimra, Sukkoth un Zaphon eignumma. 'S ivvahrich land es im Sihon, da kaynich funn Hesbon, sei kaynich-reich voah, voah aw dibei. Dess land hott kshtobt drivva am Jordan Revvah, un's is on ganga biss an's end fumm Kinnereth Say east fumm Jordan.

²⁸Dess sinn di shtett un iahra nochbahshafta es gevva voahra fa en eahbshaft zu di nohch-kummashaft fumm Gad, kshlecht bei kshlecht.

²⁹Dess is es land es da Mosi zu dihelft fumm Manasse sei nohch-kummashaft gevva hott. Zu dihelft fumm Manasse sei nohch-kummashaft, kshlecht bei kshlecht voah dess land gevva:

³⁰Iahra land hott kshteaht in Mahanaim un hott alles funn Basan eignumma. Dess voah's land es im Og, da kaynich funn Basan, sei kaynich-reich voah. Un's hott aw awl di shtett eignumma funn Jair in Basan. Es voahra sechtzich shtett alles zammah.

³¹Es hott aw dihelft funn Gilead eignumma mitt Astharoth un Edrei. Dess voahra di shtett im Og, da kaynich funn Basan, sei kaynich-reich. Dess land voah gevva zumm Manasse sei sohn, da Machir. Dihelft fumm Machir sei nohch-kummashaft hott dess land grikt kshlecht bei kshlecht.

³²Dess voah di eahbshaft es da Mosi gevva katt hott vo eah drivva uf di plains funn Moab voah, uf di annah seit fumm Jordan east funn Jericho.

³³Avvah da Mosi hott kenn eahbshaft gevva zu di nohch-kummashaft fumm Levi. Da HAH, da Gott funn Israel, is iahra eahbshaft, vi eah eena fashprocha katt hott.