Read Pennsylvania German Joshua 21 Bible Online

Joshua 21 - Pennsylvania German bible

Joshua 21

¹Nau di foah-gengah funn di Lefiddishi families sinn zumm preeshtah Eleasar, zumm Joshua, da sohn fumm Nun, un zu di foah-gengah funn di shtamma funn Israel ganga.

²Datt an Silo im land funn Kanaan henn si ksawt zu eena, “Da HAH hott gebodda gevva deich da Mosi es diah uns shtett gevva sellet fa drinn voona, un aw vayt-land fa unsah fee.”

³So henn di Kinnah-Israel di Lefiddishi families dee shtett un vayt-lendah gevva funn iahra aykni eahbshaft, so vi da HAH gebodda katt hott:

⁴Es eahsht lohs is uf di families funn di Kahathiddah kfalla. Un em preeshtah Aaron sei nohch-kummashaft es Lefiddishi leit voahra, henn dreitzay shtett grikt funn di shtamm fumm Juda, di shtamm fumm Simeon un funn di shtamm fumm Benjamin.

⁵Di ivvahricha kinnah fumm Kahath henn zeyya shtett grikt deich's lohs funn di families funn di shtamm fumm Ephraim, di shtamm fumm Dan un di halb-shtamm fumm Manasse.

⁶Di kinnah fumm Gerson henn dreitzay shtett grikt deich's lohs. Dee shtett voahra funn di families funn di shtamm fumm Isachar, di shtamm funn Asser, di shtamm fumm Naphthali un di halb-shtamm fumm Manasse in Basan.

⁷Di kinnah fumm Merari bei iahra family-drubba henn zvelf shtett grikt funn di shtamm fumm Ruben, di shtamm fumm Gad un di shtamm fumm Sebulon.

⁸Di Kinnah-Israel henn dee shtett un vayt-lendah zu di Lefiddah gevva deich's lohs, so vi da HAH gebodda katt hott deich da Mosi.

⁹Dess sinn di nayma funn di shtett es gnumma voahra funn di lendah fumm Juda un em Simeon:

¹⁰Dee shtett voahra gevva zu di nohch-kummashaft fumm Aaron, ayns funn di Kahathiddah families es Lefiddah voahra, veil's eahsht lohs uf si kfalla is.

¹¹Si henn eena di shtatt Arba (sell is Hebron) gevva mitt em vayt-land datt rumm. Da Arba voah da foah-faddah fumm Enak. Dee shtatt voah drovva in di hivla funn Juda.

¹²Avvah di feldah vekk funn di shtatt un di glenni shtetlen datt rumm voahra gevva gvest zumm Kaleb, da sohn fumm Jephunnes, fa sei eahbshaft.

¹³So zu di nohch-kummashaft fumm Aaron da preeshtah, henn si di shtatt funn Hebron (ayns funn di frei-shtett fa doht-shlayyah) un's vayt-land gevva. Si henn eena aw di shtett funn Libna,

¹⁴Jatthir, Esthemoah,

¹⁵Holon, Debir,

¹⁶Ain, Jutta un Beth-Semes gevva mitt em vayt-land datt rumm. Dess voahra nein shtett gnumma funn zvay shtamma.

¹⁷Un funn di shtamm fumm Benjamin henn si eena di fiah shtett, Gibeon, Giba,

¹⁸Anathoth un Almon gevva mitt em vayt-land datt rumm.

¹⁹Alles zammah voahra's dreitzay shtett un's vayt-land es gevva voahra zumm Aaron sei nohch-kummashaft.

²⁰Di ivvahricha funn di kinnah funn Kahath, es Lefiddah voahra, henn shtett grikt funn di shtamm fumm Ephraim.

²¹Drovva in di hivla fumm Ephraim henn si Sichem, (en frei-shtatt fa doht-shlayyah), Geser,

²²Kibzaim un Beth-Horon grikt mitt em vayt-land. Alles zammah voahra dess fiah shtett.

²³Fumm shtamm fumm Dan henn si aw di shtett funn Eltheke, Gibbethon,

²⁴Ajalon un Gath-Rimmon grikt mitt iahra vayt-land. Sell voahra fiah shtett.

²⁵Un funn di halb-shtamm fumm Manasse henn si di shtett Thaanach un Gath-Rimmon grikt mitt iahra vayt-land. Dess voahra zvay shtett.

²⁶Dee zeyya shtett un iahra vayt-land voahra gevva zu di ivvahricha funn di nohch-kummashaft fumm Kahath.

²⁷Di kinnah fumm Gerson es Lefiddah voahra henn dee shtett grikt: Funn di halb-shtamm fumm Manasse henn si Golan in Basan grikt (sell voah ayns funn di frei-shtett fa doht-shlayyah), un aw Beesthra mitt iahra vayt-land, sell voahra zvay shtett.

²⁸Funn di shtamm fumm Isachar henn si dee fiah shtett grikt: Kisjon, Dabrath,

²⁹Jarmuth un En-Gannim mitt iahra vayt-land.

³⁰Funn di shtamm fumm Asser henn si dee fiah shtett grikt: Miseal, Abdon,

³¹Helkath un Rehob mitt iahra vayt-land.

³²Funn di shtamm fumm Naphthali henn si dee drei shtett grikt: Kedes in Galilaya (en frei-shtatt fa doht-shlayyah), Hammoth-Dor un Karthan mitt iahra vayt-land.

³³Di Gersoniddah families henn dreitzay shtett un iahra vayt-land grikt alles zammah.

³⁴Di ivvahricha funn di Lefiddah voahra funn di family fumm Merari. Funn di shtamm fumm Sebulon henn si dee fiah shtett grikt: Jokneam, Kartha,

³⁵Dimna un Nahalal mitt iahra vayt-land.

³⁶Funn di shtamm fumm Ruben henn si dee fiah shtett grikt: Bezer, Jahza,

³⁷Kedemoth un Mephaath mitt iahra vayt-land.

³⁸Funn di shtamm fumm Gad henn si dee fiah shtett grikt: Ramoth in Gilead (en frei-shtatt fa doht-shlayyah), Mahanaim,

³⁹Hesbon un Jaser mitt eahra vayt-land.

⁴⁰Em Merari sei family-drubba, di ivvahricha funn di Lefiddah, henn zvelf shtett grikt alles zammah.

⁴¹Di Lefiddah henn acht un fatzich shtett grikt alles zammah fumm land es di Kinnah-Israel kohva henn. Si henn aw's vayt-land grikt es mitt di shtett ganga is.

⁴²Yaydah funn dee shtett henn vayt-land um sich rumm katt. Es voah so mitt awl dee shtett.

⁴³So hott da HAH awl's land gevva zu Israel es eah kshvoahra hott fa zu iahra foah-feddah gevva. Si henn's land ivvah-gnumma un henn datt gvoond.

⁴⁴Da HAH hott eena roo gevva uf alli seit, grawt vi eah kshvoahra hott zu iahra foah-feddah. Kens funn iahra feinda henn ufshtay kenna geyyich si; da HAH hott si awl ivvah-gedrayt zu eena.

⁴⁵Nett ayns funn di goodi fashprechinga es da HAH gmacht hott zumm haus funn Israel is unfolfild ganga. Alli vann voah folfild.