Read Pennsylvania German Joshua 23 Bible Online

Joshua 23 - Pennsylvania German bible

Joshua 23

¹En langi zeit is fabei ganga un da HAH hott Israel roo gevva funn awl iahra feinda gans um si rumm. Bei nau voah da Joshua oahrich ald un drovva in yoahra.

²Eah hott gans Israel bei groofa mitt iahra eldishti, foah-gengah, richtah un evvahshti, un hott ksawt zu eena, “Ich binn oahrich ald un drovva in yoahra.

³Diah hend alles ksenna es da HAH eiyah Gott gedu hott zumm folk funn dee lendah fa eiyah sayk. Da HAH eiyah Gott voah am fechta fa eich.

⁴Gukket nau, ich habb dess folk un iahra lendah es noch do sinn fadayld im lohs fa en eahbshaft fa eiyah shtamma. Ich habb dess folk abkshnidda fumm Jordan Revvah biss an da Grohs Say in di west.

⁵Da HAH eiyah Gott zayld si ausdreiva fannich eich. Eah zayld si vekk sheeva fannich eich un diah zaylet iahra land nemma, grawt vi da HAH eiyah Gott eich fashprocha hott.

⁶Seind shteik, un gevvet oahrich acht es diah heichet zu alles es kshrivva is im Ksetz-Buch Mosi. Drayyet nett vekk difunn, nett rechts adda lings,

⁷so es diah nix zu du hend mitt di leit in dee lendah es noch do unnich eich sinn. Baydet nett zu iahra gettah un shveahret nett bei si. Doond iahra gettah nett deena un eich nunnah bikka zu eena.

⁸Avvah henket fesht oh zumm HAH eiyah Gott, vi diah hend biss nau.

⁹Da HAH hott grohsi un mechtichi leit ausgedrivva do fannich eich; zu demm dawk hott nimmand kenna ufshtay zu eich.

¹⁰Ayns funn eich kann en dausend leit yawwa, veil da HAH fecht fa eich, grawt vi eah fashprocha hott.

¹¹So gevvet oahrich acht es diah da HAH eiyah Gott leeva doond.

¹²Vann diah zrikk drayyet un eich mitt dee leit shtellet es noch do sinn unnich eich, un vann diah eich faheiyahret mitt eena, un nochbahret mitt eena,

¹³dann kennet diah shuah sei es da HAH eiyah Gott nimmi lengah dee leit ausdreibt fannich eich. Avvah si vadda en fang-shtrikk un en fall zu eich. Si vadda fitza uf eiyah bikkel un shtechah in eiyah awwa, biss kens funn eich ivvahrich is in demm gooda land es da HAH eiyah Gott eich gevva hott.

¹⁴Nau mei zeit is do fa gay, vi awl dee uf di eaht. Alli vann funn eich vayst in seim hatz un sayl es da HAH eiyah Gott nett zrikk ganga is uf ennich ebbes es eah fashprocha hott. Alles es eah fashprocha hott voah gedu. Nett ay ding voah nett gedu.

¹⁵Un grawt vi alles goodes voah kumma is es da HAH eiyah Gott fashprocha hott, so aw lost eah alles eviles uf eich kumma es eah fashprocha hott, biss kens funn eich may ivvahrich is in demm gooda land es eah eich gevva hott.

¹⁶Vann diah sell bund nett haldet es da HAH eiyah Gott eich gebodda hott, un gaynd un deenet anri gettah, un bikket eich nunnah zu eena, dann zayld em HAH sei zann hays brenna geyyich eich, un's zayld kshvind nimmand funn eich may ivvahrich sei in demm gooda land es eah gevva hott zu eich.”