Read Pennsylvania German 2. Thessalonicher 3 Bible Online

2. Thessalonicher 3 - Pennsylvania German bible

2. Thessalonicher 3

¹Endlich, leevi breedah, baydet fa uns, so es es Vatt fumm Hah shteik fassich gayt un fakleaht vatt, so vi's is bei eich.

²Un baydet es miah frei gmacht vadda funn shlechti un ungettlichi mensha, fa nett alli-ebbah glawbt.

³Avvah da Hah is shtandhaftich; eah macht eich shteik un hald eich fumm evila.

⁴Miah henn en fadrauwa in eich im Hah, es diah dee sacha doond un du zaylet es miah eich sawwa.

⁵Da Hah soll eiyah hatza fiahra in di leevi funn Gott, un in di geduld funn Christus.

⁶Nau, leevi breedah, miah gevva eich's gebott im nohma fumm Hah Jesus Christus, es diah eich vekk haldet funn ennichah broodah es en faul un unshiklich layva fiaht un nett lawft im vayk es miah eich gland henn.

⁷Fa diah visset vi diah uns nohch macha seddet; miah sinn nett sellah vayk unnich eich gloffa vo miah bei eich voahra.

⁸Miah henn nimmand sei broht gessa unni's betzawla, avvah miah henn dawk un nacht kshaft un kseikt, so es miah kenn blohk voahra zu ennichs funn eich.

⁹Miah henn dess nett gedu veil miah's recht nett katt henn ditzu, avvah fa uns en foah-bild macha zu eich, es diah no uns nohch macha kennet.

¹⁰Vo miah noch bei eich voahra henn miah eich ksawt, “Deah vo nett shaffa vill soll aw nett essa.”

¹¹Fa miah heahra's sinn edlichi unshiklich unnich eich es nix shaffa un macha yusht druvvel.

¹²Deich unsah Hah Jesus Christus gevva miah eena en gebott, un famohna so leit es si en shiklich layva fiahra sella, un shaffa sella fa iahra ayya broht fadeena.

¹³Avvah diah, leevi breedah, seddet nett laydich vadda funn goot du.

¹⁴Vann ennich ebbah's nett dutt fa heicha zu unsah vadda in demm breef, vatshet een un hend nix zu du mitt eem, so es eah sich shemd.

¹⁵Doch, gukket een nett oh es ebbah es geyyich eich is, avvah famohnet een vi en broodah.

¹⁶Nau vinsha miah es da Hah funn fridda selvaht, eich immah fridda gebt in alli vayya. Da Hah sei bei eich awl.

¹⁷Ich, da Paulus, vill eich noch greesa in demm breef mitt mei aykni hand. Ich du dess in awl mei breefa. Dess is vi ich shreib.

¹⁸Di gnawt funn unsah Hah Jesus Christus sei mitt eich awl. Amen.