Read Pennsylvania German 1. Timotheus 2 Bible Online

1. Timotheus 2 - Pennsylvania German bible

1. Timotheus 2

¹Ich famohn eich, ovvich alles shunsht, es diah frohwet, baydet, ohhaldet un dank gevvet fa awl mensha.

²Un diah sellet aw bayda fa kaynicha un awl selli ivvah-saynah in hohchi bletz, so es miah en ruich un en fridlich layva fiahra kenna es gettlich un heilich is.

³Dess is goot un kfald Gott unsahm Heiland.

⁴Eah vill havva es awl mensha saylich vadda un anna kumma es si di voahheit vissa sella.

⁵Fa's is yusht ay Gott, un aynah es Gott un mensha zammah bringd; sell is da mann Christus Jesus,

⁶deah vo sei layva gevva hott fa alli-ebbah. Dess soll gebreddicht vadda an di recht zeit.

⁷Fa dess voahrich eiksetzt es en breddichah un en aposhtel, so es ich di Heida lanna kann veyyich em glawva un di voahheit. Ich sawk di voahret in Christus, un leek nett.

⁸Ich vill havva es mennah ivvahrawlich heilichi hend uf hayva un bayda unni zann adda zveifla.

⁹Ich vill aw havva es di veibsleit sich oh doon mitt shiklichi glaydah in shohm un daymoot, nett mitt gezebdi hoah, adda gold un pearls un deiyahri rekk.

¹⁰Si sella goodi verka du vi's shiklich is fa veibsleit es sich bekenna fa gettlich sei.

¹¹En veibsmensh soll shtill abheicha un lanna, un soll sich gans ufgevva.

¹²Ich alawb kenn veibsmensh fa mansleit lanna adda fa ivvah see sei. See soll shtill bleiva.

¹³Fa da Adam voah seahsht kshaffa, no dinohch di Ayfaw.

¹⁴Un da Adam voah nett fafiaht, avvah's veibsmensh voah fafiaht un is en ivvah-dreddah vadda fumm gebott.

¹⁵Avvah see soll saylich vadda deich kinnah in di veld bringa, vann see ohhald im glawva un di leevi, un in en heilich layva fiahra mitt daymoot.