Read Pennsylvania German Hebräer 1 Bible Online

Hebräer 1 - Pennsylvania German bible

Hebräer 1

¹Lengah zrikk hott Gott kshvetzt zu unsah foah-feddah deich di brofayda an feel zeida un in edlichi vayya.

²Avvah an dee letshta dawwa hott eah kshvetzt zu uns deich sei Sohn, deah vo eah ufketzt hott fa alli sacha eahva, un deich deah es eah aw di veld gmacht hott.

³Da Sohn is da glanz funn Gott sei hallichkeit, es gleichlich bild funn sei naduah, un eah haybt alles zammah mitt sei greftich Vatt. Vo eah unsah sinda rein gmacht katt hott bei sich selvaht, hott eah sich anna kokt uf di rechts seit funn demm vo alli macht hott im haychshta.

⁴Eah is so feel haychah vadda es di engel, veil sei nohma es Gott eem gevva hott, haychah is es iahra nohma.

⁵Fa zu vels funn di engel hott Gott selayva ksawt, “Du bisht mei Sohn, heit habb ich dich gezeikt”? Adda viddah, “Ich zayl sei Faddah sei, un eah soll mei Sohn sei”?

⁶Un aw viddah vo eah da eahsht-geboahra in di veld gebrocht hott, hott eah ksawt, “Un awl di engel funn Gott sella een ohbayda.”

⁷Veyyich di engel hott eah ksawt, “Eah macht sei engel zu geishtah un sei deenah zu feiyah-flamma.”

⁸Avvah veyyich em Sohn hott eah ksawt, “Du hoksht uf dei kaynich-shtool, oh Gott, funn ayvichkeit zu ayvichkeit, du fiahsht dei Reich in gerechtichkeit.

⁹Du hosht di gerechtichkeit gleebt, un di ungerechtichkeit kast. Fasell, oh Gott, hott dei Gott dich ksalbt mitt em ayl funn fraylichkeit ovvich dei kumrawda.”

¹⁰Un eah sawkt, “Du, Hah, hosht fumm ohfang da grund glaykt funn di eaht, un di himla sinn di eahvet funn dei hend.

¹¹Dee zayla fagay, avvah du zaylsht bleiva; si vadda awl ald vi glaydah.

¹²Du rolsht si uf vi en ivvah-rokk, un si zayla fa'ennaht sei. Avvah du bleibsht vi du bisht un dei yoahra zayla nee nett enda.”

¹³Zu vels funn di engel hott Gott selayva ksawt, “Hokk dich uf mei rechtsi seit, biss ich dee vo dich hassa in en foos-shtool mach fa dei fees”?

¹⁴Sinn nett awl di engel geishtah es Gott deena doon, un sinn naus kshikt fa selli helfa vo di saylichkeit eahva zayla?