Read Pennsylvania German Hebräer 3 Bible Online

Hebräer 3 - Pennsylvania German bible

Hebräer 3

¹Fasell, heilichi breedah, diah vo en dayl hend im himlisha beroof, denket an Christus Jesus, da Aposhtel un hohchen-preeshtah es miah bekenna.

²Eah voah shtandhaftich zu demm vo een eiksetzt hott, grawt vi da Mosi shtandhaftich voah zu Gott in seim gans haus.

³Avvah eah voah gezayld fa feel may hallichkeit havva es da Mosi, grawt vi ebbah es en haus baut may eah hott es es haus.

⁴Fa alli haus is gebaut bei ebbah, avvah deah vo alli sacha baut is Gott.

⁵Da Mosi voah shtandhaftich in Gott sei gans haus es en gnecht, un dess hott gezeikt zu di sacha es shpaydah ksawt vadda sella.

⁶Avvah Christus, es en Sohn, voah shtandhaftich ivvah sei haus. Dess haus sinn miah, vann miah fesht hayva zu di fadrauwa un frayt funn unsah hofning biss an's end.

⁷So, grawt vi da Heilich Geisht sawkt, “Heit, vann diah sei shtimm heahret,

⁸machet eiyah hatza nett hatt vi si henn vo si mich ausbroviaht henn am dawk vo si fasucht voahra in di vildahnis.

⁹Datt henn eiyah foah-feddah mich fasucht un ausbroviaht, un henn mei verka ksenna fa fatzich yoah.

¹⁰Fasell voahrich zannich mitt di leit funn selli zeit, un habb ksawt, ‘Si gayn immah letz mitt iahra hatza, un henn mei vayya nett fashtanna.’

¹¹So in meim zann habb ich kshvoahra, ‘Si sella nee nett in mei roo nei kumma.’”

¹²Gevvet acht, breedah, es kens funn eich en evil un en unglawvich hatz hott es eich vekk drayt fumm levendicha Gott.

¹³Avvah famohnet nannah alli dawk, so lang es es noch heit hayst, so es diah nett shteibahrich vaddet deich di fafiahrichkeit funn sinda.

¹⁴Fa miah henn en dayl mitt Christus vann miah biss an's end, fesht ohhayva zu di fadrausht es miah katt henn am ohfang.

¹⁵So vi's ksawt is, “Heit, vann diah sei shtimm heahret, machet eiyah hatza nett hatt, vi si henn vo si mich ausbroviaht henn.”

¹⁶Veah voahra selli es keaht henn un henn een ausbroviaht? Voahra's nett awl selli es aus Egypta kfiaht voahra beim Mosi?

¹⁷Un mitt vemm voah eah zannich fa fatzich yoah? Voah's nett mitt selli es ksindicht henn, un iahra dohdi leivah leiya in di vildahnis?

¹⁸Un zu vemm hott eah kshvoahra es si nett in sei roo nei kumma sella, vann's nett voah zu selli es nett geglawbt henn?

¹⁹So sayna miah es si nett nei gay henn kenna veil si nett geglawbt henn.