Read Pennsylvania German Richtah 4 Bible Online

Richtah 4 - Pennsylvania German bible

Richtah 4

¹Noch demm es da Ehud kshtauva is, hott Israel viddah evil gedu fannich em HAH.

²Un da HAH hott si in di hend fumm Jabin, da kaynich funn Kanaan, fakawft. Eah hott groold in di shtatt funn Hazor. Da ivvah-sayna funn sei greeks-leit voah da Sisera es in Haroseth funn di Heida gvoond hott.

³Eah hott nein hunnaht eisichi greeks-veyya katt un hott di Kinnah-Israel veesht gyoost fa zvansich yoah. Fasell henn di Kinnah-Israel da HAH oahrich ohgroofa.

⁴Di Deborah, en veibsmensh brofayt, es em Lapidoth sei fraw voah hott Israel gricht an selli zeit.

⁵Si hott als unnich em palma-bohm kokt es Palma-Deborah kaysa hott zvishich Ramah un Beth-El in di hivla funn Ephraim. Datt sinn di Kinnah-Israel als zu iahra kumma fa gricht vadda vann si nett aynich voahra mitt-nannah.

⁶Si hott kshikt fa da Barak, em Abinoam sei boo funn Kedes in Naphthali, un hott ksawt zu eem, “Heich moll, da HAH, da Gott funn Israel hott dess gebodda, ‘Gay un nemm zeyya dausend mennah funn Naphthali un Sebulon un fiah si nuff an da Berg Thabor.

⁷Ich fiah da Sisera, da foah-gayyah fumm Jabin sei greeks-gnechta, an da revvah Kison mitt sei greeks-veyya un sei feel mennah, un gebb een in dei hend.’”

⁸Da Barak hott ksawt zu iahra, “Vann du mitt miah gaysht, dann gayn ich; avvah vann du nett mitt miah gaysht, dann gayn ich nett.”

⁹Di Deborah hott ksawt, “Yau ich gay mitt diah, avvah di eah zayld nett dei sei fa dess vass du unnah-nemsht deich dess gebott. Da HAH zayld da Sisera ivvah-gevva in di hand funn en veibsmensh.” No is di Deborah ufkshtanna un is mitt em Barak zu Kedes ganga.

¹⁰No hott da Barak di leit funn Sebulon un Naphthali zammah groofa an Kedes, un zeyya dausend mennah sinn nuff ganga mitt eem. Di Deborah is aw mitt eem ganga.

¹¹Nau en veil eb dess, hott da Heber da Keniddah di anra Keniddah falossa katt. Di Keniddah voahra funn di nohch-kummashaft fumm Hobab, em Mosi sei shviah-broodah. Da Heber hott sei tent uf gedu katt beim grohsa bohm in Zaanannim nayksht an Kedes.

¹²No henn si em Sisera ksawt es da Barak, em Abinoam sei boo, nuff ganga is an da Berg Thabor.

¹³Da Sisera hott no awl sei nein hunnaht eisichi greeks-veyya zammah gegeddaht, un awl di mennah es bei eem voahra funn di shtatt Haroseth funn di Heida biss an da Revvah Kison.

¹⁴No hott di Deborah ksawt zumm Barak, “Gay nau, dess is da dawk es da HAH da Sisera in dei hend gevva hott. Gukk moll, da HAH is fannich diah heah ganga.” So is da Barak nunnah ganga fumm Berg Thabor un zeyya dausend mennah sinn hinnich eem nohch ganga.

¹⁵Un da HAH hott da Sisera mitt awl sei greeks-veyya un greeks-leit ivvah-kshmissa fannich em shvatt fumm Barak. Avvah da Sisera is funn seim greeks-vauwa getshumbt, is kshpringa, un hott sich fabutzt.

¹⁶Avvah da Barak is awl di greeks-veyya un greeks-leit nohch ganga so veit es di shtatt Haroseth funn di Heida. Un awl di greeks-leit fumm Sisera sinn umkumma beim shvatt, nett aynah voah ivvahrich glost.

¹⁷Da Sisera hott avvah sich fabutzt bei foos, un is an da tent kumma vo di Jael gvoond hott. See voah di fraw fumm Heber da Keniddah. 'S voah fridda zvishich em Jabin da kaynich funn Hazor un di families fumm Heber da Keniddah.

¹⁸Di Jael is naus ganga fa da Sisera ohdreffa un hott ksawt zu eem, “Kumm rei, mei meishtah, kumm grawt rei. Feich dich nett.” So is eah in iahra tent ganga un see hott een zu gedekt mitt en duch.

¹⁹Eah hott ksawt zu iahra, “Gebb mich samm vassah fa drinka, ich binn dashtich.” No hott see en boddel millich uf gmacht, hott eem gevva fa drinka un hott een viddah zu gedekt.

²⁰Eah hott ksawt, “Shtell dich in di deah fumm tent. Vann ennich ebbah bei kumd un frohkt dich eb ebbah do is, sawk, ‘Nay.’”

²¹Avvah di Jael, em Heber sei fraw, hott en tent-shtikkel un en hammah in iahra hend gnumma, is nuff kshlicha un hott da shtikkel deich sei kobb gedrivva nunnah in da grund diveil es eah am shlohfa voah, fa eah voah oahrich meet. So is da Sisera kshtauva.

²²No is da Barak an di Jael iahra tent kumma diveil es eah am em Sisera nohch gay voah. Di Jael is naus ganga fa een ohdreffa un hott ksawt, “Kumm, ich veis diah da mann es du am gukka bisht difoah.” Eah is nei ganga mitt iahra un datt hott da Sisera gleyya, doht, mitt em tent-shtikkel in seim kobb.

²³Sellah dawk hott Gott da Jabin, da kaynich funn Kanaan, nunnah gedu fannich Israel.

²⁴Un di hand funn Israel is graysah un graysah vadda geyyich da Jabin, da Kanaaniddah kaynich, biss si een gans ivvah-gedredda henn.