Read Pennsylvania German 3. Johannes 1 Bible Online

3. Johannes 1 - Pennsylvania German bible

3. Johannes 1

¹Da eldishtah: zu em leeblicha Gaius, deah vo ich leeb habb in di voahheit.

²Mei leeblichah, ich vinsh es alles goot gay soll mitt diah un es du ksund bisht, grawt vi's aw goot gayt mitt dei sayl.

³Fa ich voah oahrich froh vo samm funn di breedah kumma sinn un henn ksawt veyyich di voahheit in deim layva, sell is, es du am lawfa bisht in di voahheit.

⁴Ich habb kenn graysahri frayt es fa heahra es mei kinnah am lawfa sinn in di voahheit.

⁵Mei leeblichah, du bisht shtandhaftich in vass du dusht fa di breedah un fa fremdi,

⁶fa si henn zeiknis gevva zu dei leevi fannich di gmay. Du dusht goot vann du si uf iahra vayk shiksht so vi's recht is fa Gott.

⁷Fa si sinn naus ganga im nohma fumm Hah un henn nix gnumma funn di Heida.

⁸Fasell sedda miah so leit uf nemma so es miah mitt-helfah sinn in di voahheit.

⁹Ich habb zu di gmay kshrivva, avvah da Diotrephes, deah vo seahsht sei vill unnich eena, nemd uns nett oh.

¹⁰So vann ich moll kumm, dann bring ich uf zu eem vass eah am du is mitt sei evili kshvetzah geyyich uns. Un vann sell nett genunk veah, eah selvaht nemd di breedah nett ei, un shteld sich geyyich selli vo si einemma vella, un dutt si aus di gmay.

¹¹Mei leeblichi, gaynd nett sellem nohch vass evil is, avvah sellem vass goot is. Deah vo dutt vass goot is, is funn Gott; deah vo dutt vass evil is, hott Gott nett ksenna.

¹²Da Demetrius hott en goodi zeiknis funn alli-ebbah, un aw funn di voahheit selvaht. Yau, un miah zeiya dess aw, un diah visset es unsah zeiknis voah is.

¹³Ich hett noch feel sacha zu shreiva avvah ich vill's nett shreiva zu diah mitt dinda un en feddah.

¹⁴Ich hoff fa dich glei sayna, no kenna miah grawt zu nannah shvetza. Fridda sei mitt diah. Di freind greesa dich. Grees di freind bei nohma.