Read Pennsylvania German Di Offenbarung 11 Bible Online

Di Offenbarung 11 - Pennsylvania German bible

Di Offenbarung 11

¹No voah miah en root gevva, vi en root fa messa, un's voah miah ksawt, “Shtay uf, un mess da tempel funn Gott un da awldah, un zayl selli vo ohbayda datt.

²Avvah du nett da hohf messa uf di autseit fumm tempel. Loss sellah haus, fa sellah is ivvah-gevva zu di Heida. Si zayla di heilich shtatt unnich iahra fees nemma fa zvay un fatzich moonet.

³Ich zayl graft gevva zu mei zvay zeiya, un si zayla broffetzeiya fa en dausend, zvay hunnaht un sechtzich dawk diveil es si geglayt sinn in sekk-glaydah.”

⁴Dess sinn di zvay ayl-baym un di zvay lichtah vo fannich em Gott funn di eaht shtayn.

⁵Vann ennich ebbah ebbes du vill zu eena fa si vay du, dann kumd feiyah aus iahra meilah un fazeaht iahra feinda. Vann ennich ebbah ebbes du vill zu eena, dann muss eah sellah vayk doht gmacht vadda.

⁶Dee mennah henn di macht fa da Himmel zu macha, so es es nett reyyaht deich di zeit es si broffetzeiya doon. Si henn di macht ivvah's vassah fa's zu bloot drayya, un fa di eaht shlauwa mitt alli sadda blohwa so oft es si vella.

⁷Vann si iahra zeiknis faddich gmacht henn, dann kumd's diah vo ruff aus em brunna unni bodda kumd, un macht greek geyyich si. Eah zayld si ivvah-kumma un si doht macha.

⁸Iahra dohdi leivah zayla in di shtrohs funn di grohs shtatt leiya, dee vass geishtlich Sodom un Egypta hayst, datt vo iahra Hah aw gegreitzicht gvest voah.

⁹Fa drei un a halb dawk zayla leit funn alli kshlechtah, shprohcha un lendah uf iahra dohdi leivah gukka un zayla si nett lossa si fagrawva.

¹⁰Un dee vo uf di eaht sinn zayla sich froiya veyyich eena. Si zayla fraylich sei un kshenkah zu nannah shikka. Dess is veil dee zvay brofayda als selli uf di eaht veeshtahlich geblohkt henn.

¹¹Avvah noch drei un a halb dawk is da Geisht funn layva aus Gott in si nei kumma, un si sinn uf iahra fees kshtanna. No is grohsi furcht uf selli kumma es si ksenna henn.

¹²No henn si en laudi shtimm fumm Himmel keaht vo ksawt hott, “Kummet do ruff.” Un si sinn nuff in da Himmel ganga in en volk, diveil es selli gvatsht henn es si kast henn.

¹³An selli shtund voah en grohsi eaht-bayben, un en zeyyadel funn di shtatt is kfalla. Sivva dausend leit voahra doht gmacht in di eaht-bayben, un di ivvahricha henn sich kfeicht un henn eah un hallichkeit gevva zumm Gott fumm Himmel.

¹⁴Da zvett vay is fabei, un gukk moll, da dritt is glei am kumma.

¹⁵No hott da sivvet engel sei hann geblohsa, un's voahra laudi shtimma im Himmel vo ksawt henn, “Di kaynich-reicha funn di veld sinn di kaynich-reicha vadda funn unsah Hah un funn sei Christus, un eah zayld Kaynich sei fa immah un immah.”

¹⁶Un di fiah un zvansich eldishti es uf iahra shteel kokt henn fannich Gott, sinn uf iahra ksichtah kfalla un henn Gott ohgebayda,

¹⁷un henn ksawt, “Miah danka dich, Hah, Awlmechtichah Gott, deah es du bisht un voahsht, veil du dei grohsi graft gnumma hosht un bisht Kaynich vadda.

¹⁸Di Heida voahra bays, un dei zann is kumma. Di zeit is do fa di dohda richta un fa dei gnechta di brofayda betzawla, un aw selli es heilich sinn, un selli es furcht henn funn deim nohma, un di glenna un di grohsa, un fa selli doht macha es di eaht fadauva.”

¹⁹No voah da tempel funn Gott uf gmacht im Himmel, un di Bundes-Lawt funn seim teshtament voah ksenna datt. Un's voahra shtrawla funn veddah-laych, un shtimma, un gviddah, un en eaht-bayben un grohsi shlohsa.