Read Pennsylvania German Di Offenbarung 7 Bible Online

Di Offenbarung 7 - Pennsylvania German bible

Di Offenbarung 7

¹Noch demm habb ich fiah engel ksenna uf di fiah ekka funn di eaht shtay. Si henn di fiah vinda funn di eaht zrikk kohva, so es kenn vind uf di eaht blohsa soll, un aw nett uf da say adda uf ennichah bohm.

²No habb ich noch en engel ksenna ruff kumma datt vo di sunn ufkumd. Eah hott da seal fumm levendicha Gott katt. Eah hott naus gegrisha mitt en laudi shtimm zu di fiah engel, dee es di graft gevva voah ditzu fa di eaht un da say fadauva.

³Eah hott ksawt, “Doond kenn shawda zu di eaht, em say, adda di baym, biss miah en seal uf di shtanna funn Gott sei gnechta gedu henn.”

⁴No habb ich da nambah keaht funn selli es kseald voahra, en hunnaht un fiah un fatzich dausend funn awl di kshlechtah funn Israel.

⁵Zvelf dausend voahra kseald aus em kshlecht fumm Juda, zvelf dausend aus em kshlecht fumm Ruben, zvelf dausend aus em kshlecht fumm Gad,

⁶zvelf dausend aus em kshlecht fumm Asser, zvelf dausend aus em kshlecht fumm Naphthali, zvelf dausend aus em kshlecht fumm Manasse,

⁷zvelf dausend aus em kshlecht fumm Simeon, zvelf dausend aus em kshlecht fumm Levi, zvelf dausend aus em kshlecht fumm Isachar,

⁸zvelf dausend aus em kshlecht fumm Sebulon, zvelf dausend aus em kshlecht fumm Joseph, un zvelf dausend aus em kshlecht fumm Benjamin.

⁹Noch demm habb ich gegukt un en grohsi drubb leit es nimmand zayla kann, funn alli lendah, folk, shtamm un shprohcha voahra am fannich em kaynich-shtool un fannich em Lamm shtay. Si voahra geglayt mitt veisi glaydah un henn palma nesht in iahra hend katt.

¹⁰Si henn naus gegrisha mitt laudi shtimma un henn ksawt, “Di saylichkeit heaht zu unsah Gott vo uf em kaynich-shtool hokt, un zu em Lamm.”

¹¹Awl di engel voahra am um da kaynich-shtool rumm shtay, un um di eldishti un di fiah levendicha diahra rumm. No sinn si nunnah kfalla uf iahra ksichtah fannich em kaynich-shtool un henn Gott ohgebayda.

¹²Si henn ksawt, “Amen! Lohb un hallichkeit un veisheit un dank un eah un graft un gvald sei zu unsah Gott fa immah un immah. Amen!”

¹³No hott ayns funn di eldishti andvat gevva un hott mich kfrohkt, “Veah sinn dee vo geglayt sinn in veisi glaydah un funn vo kumma si?”

¹⁴Ich habb ksawt zu eem, “Meishtah, du vaysht's.” No hott eah ksawt, “Dess sinn selli vo aus grohsi dreebsawl kumma sinn. Si henn iahra glaydah gvesha un henn si veis gmacht im bloot fumm Lamm.

¹⁵Fasell sinn si fannich em kaynich-shtool funn Gott un deena een dawk un nacht im tempel. Un deah vo uf em shtool hokt zayld ivvah si sei un unnich eena voona.

¹⁶Si zayla nee nimmi hungahrich adda dashtich vadda, un di sunn kumd nimmi uf si un aw kenn hitz.

¹⁷Fa's Lamm in di mitt fumm kaynich-shtool zayld si heeda, un zayld si zu levendichi vassah-shpringa fiahra. Un Gott zayld awl's awwa-vassah funn iahra awwa butza.”