Read Pennsylvania German 1. Samuel 1 Bible Online

1. Samuel 1 - Pennsylvania German bible

1. Samuel 1

¹Nau's voah en mann funn Ramathaim-Zophim in di hivla funn Ephraim es Elkana kaysa hott. Eah voah en Ephraimiddah. Eah voah em Jeroham sei boo, un da Jeroham voah em Elihu sei boo, un da Elihu voah em Thohu sei boo, un da Thohu voah em Zuph sei boo.

²Da Elkana hott zvay veivah katt. Ayni hott Hannah kaysa un di annah hott Peninnah kaysa. Di Peninnah hott kinnah katt avvah di Hannah hott kenni katt.

³Nau deah mann is alli yoah funn sei aykni shtatt nuff an Silo ganga fa bayda un opfahra macha zumm Awlmechticha HAH. Em Eli sei zvay boova, da Hophni un da Pinehas, voahra preeshtah fumm HAH an Silo.

⁴Un vann da dawk als kumma is es da Elkana gopfaht hott, hott eah en shtikk gevva zu di Peninnah un zu awl iahra boova un mayt.

⁵Avvah zu di Hannah hott eah zvay shtikkah gevva veil eah see leeb katt hott. Avvah da HAH hott di Hannah iahra muddahs-leib zu kshlossa.

⁶Un di Peninnah hott see oahrich gretzt fa see zannich macha, veil da HAH di Hannah iahra muddahs-leib zu gmacht katt hott.

⁷Un so is es ganga yoah noch yoah. Alli-mohl es di Hannah nuff an's haus fumm HAH ganga is, hott di Peninnah see geblohkt biss see keild hott un's nett gedu hott fa essa.

⁸No hott da Elkana, iahra mann, ksawt zu iahra, “Hannah, favass heilsht du? Favass dusht du nett essa? Favass is dei hatz so bedreebt? Mayn ich nett may zu diah es zeyya boova?”

⁹No vo si faddich voahra essa un drinka in Silo is di Hannah ufkshtanna. Nau da preeshtah Eli voah am uf en shtool hokka beim doah-poshta fumm HAH sei tempel.

¹⁰Un mitt en bedreebt hatz hott di Hannah oahrich keild un gebayda zumm HAH.

¹¹See hott fashprocha un hott ksawt, “Oh Almechtichah HAH, vann du yusht uf dei mawt iahra dreebsawl guksht, un mich in meind haldsht, un dei mawt nett fagesht, avvah gebsht dei mawt en boo, dann gebb ich een zumm HAH awl sei layva lang, un's soll nee kenn shayf-messah gyoost sei uf seim kobb.”

¹²Un vo see ohkalda hott bayda fannich em HAH, hott da Eli iahra maul gvatsht.

¹³Di Hannah voah am bayda in iahra hatz. Yusht iahra leftz henn gmooft, avvah iahra shtimm voah nett keaht. So hott da Eli gmaynd see is ksoffa.

¹⁴No hott da Eli ksawt zu iahra, “Vee lang zaylsht du ksoffa sei? Du dei vei vekk funn diah.”

¹⁵Avvah di Hannah hott andvat gevvah un hott ksawt, “Nay, mei hah, ich binn en fraw es oahrich bedreebt is in meim geisht. Ich habb kenn vei adda shteik drinkes gedrunka, avvah ich habb mei sayl ausgleaht fannich em HAH.

¹⁶Nemm dei mawt nett fa en gottlohsi fraw sei, avvah ich habb kshvetzt aus mei grohsi bekimmahnis un dreebsawl.”

¹⁷No hott da Eli andvat gevvah un hott ksawt, “Gay in fridda, da Gott funn Israel vatt diah gevva vass du kfrohkt hosht funn eem.”

¹⁸Si hott ksawt, “Loss dei mawt gnawt finna in dei awwa.” No is di fraw uf iahra vayk ganga, hott gessa un iahra ksicht voah nimmi bedreebt.

¹⁹Da neksht meiya sinn si free uf kshtanna, henn gedeend fannich em HAH un sinn no viddah zrikk ganga zu iahra haus an Rama. Da Elkana hott no kshlohfa mitt sei fraw di Hannah un da HAH hott an see gedenkt.

²⁰Un's is zu kumma, noch demm es di Hannah uf em family vayk voah hott see en glennah boo katt. See hott een Samuel kaysa un hott ksawt, “Veil ich da HAH kfrohkt habb fa een.”

²¹No is da mann Elkana un sei gansi haus-halding nuff ganga fa sei yeahlich opfah opfahra un sei fashprechnis ausdrawwa.

²²Avvah di Hannah is nett ganga. See hott ksawt zu iahra mann, “Noch demm es es kind ab gegvaynd is nemm ich een un bring een fannich da HAH, so es eah immah datt bleibt.”

²³Iahra mann da Elkana hott ksawt zu iahra, “Du vass du maynsht es besht is. Bleib do biss eah ab gegvaynd is; yusht so es da HAH sei vatt halda dutt.” So is di fraw dihaym geblivva un hott iahra boo brusht-kfeedaht biss eah ab gegvaynd voah.

²⁴Nau noch demm es see een ab gegvaynd katt hott, hott see een mitt sich gnumma, mitt drei bulla, shiah en bushel mayl un en boddel vei. See hott een zumm HAH sei haus gebrocht in Silo, even vo eah noch gans yung voah.

²⁵No henn si en bull kshlachta un henn's kind zumm Eli gebrocht.

²⁶See hott ksawt zu eem, “Oh mei hah, so voah es dei sayl laybt, ich binn di fraw es do bei diah kshtanna hott am bayda zumm HAH.

²⁷Ich habb gebayda fa deah boo, un da HAH hott miah gevva vass ich een kfrohkt habb difoah.

²⁸Fasell gebb ich een zumm HAH. So lang es eah laybt is eah zumm HAH gevva.” Un si henn da HAH ohgebayda datt.