Read Pennsylvania German 1. Samuel 12 Bible Online

1. Samuel 12 - Pennsylvania German bible

1. Samuel 12

¹No hott da Samuel ksawt zu gans Israel, “Heichet moll, ich habb abkeicht zu alles es diah ksawt hend zu miah un ich habb en kaynich ivvah eich ksetzt.

²Nau hend diah en kaynich am fannich eich lawfa. Avvah ich binn ald un groh, un mei boova sinn bei eich. Ich binn fannich eich gloffa funn yungem uf biss deah dawk.

³Do shtayn ich. Zeiyet geyyich mich fannich em HAH un sei ksalbdah. Vemm sei ox habb ich gnumma? Vemm sei aysel habb ich gnumma? Veah habb ich getsheet? Veah habb ich nunnah gedredda? Funn vemm habb ich ebbes hinna rumm gnumma fa mich macha da annah vayk gukka? Vann ich ennichs funn dee gedu habb, dann mach ich's recht.”

⁴Si henn ksawt, “Du hosht uns nett getsheet adda nunnah gedredda, un du hosht nix gnumma funn ennich ebbah sei hand.”

⁵Da Samuel hott no ksawt zu eena, “Da HAH is zeiya geyyich eich, un sei ksalbdah zeikt es diah nix kfunna hend in mei hand.” “Eah is zeiya,” henn si ksawt.

⁶No hott da Samuel ksawt zu di leit, “Da HAH hott da Mosi un da Aaron raus groofa, un si henn eiyah foah-feddah ruff aus em land funn Egypta gebrocht.

⁷Nau shtaynd do anna; ich vill eich droh gmohna fannich em HAH veyyich awl di gerechti sacha es da HAH gedu hott fa eich un eiyah foah-feddah.

⁸Noch demm es da Jakob in Egypta ganga is, henn si zumm HAH groofa fa hilf. No hott da HAH da Mosi un da Aaron kshikt, un si henn eiyah foah-feddah aus Egypta gebrocht un si in dess land ksetzt.

⁹Avvah si henn da HAH iahra Gott fagessa. So hott eah si fakawft in di hand fumm Sisera, da foah-gengah funn di greeks-gnechta funn di shtatt Hazor, un aw in di hand funn di Philishtah un da kaynich funn Moab es geyyich si kfochta hott.

¹⁰No henn si zumm HAH groofa un ksawt, ‘Miah henn ksindicht veil miah da HAH falossa henn un henn di Baals un Astharoths gedeend. Avvah nau mach uns frei funn unsah feinda, un miah zayla dich deena.’

¹¹No hott da HAH da Jerubbaal, da Barak, da Jephthah un da Samuel kshikt, un eah hott eich frei gmacht funn eiyah feinda uf alli seit, so es diah in fridda layva kennet.

¹²Avvah vo diah ksenna hend es da Nahas, da Ammoniddish kaynich, am geyyich eich kumma voah, hend diah ksawt zu miah, ‘Nay, miah vella en kaynich havva fa ivvah uns roola,’ even diveil es da HAH eiyah Gott eiyah kaynich voah.

¹³Nau do is da kaynich es diah eich gnumma hend, sellah es diah kfrohkt hend difoah. Gukket nau, da HAH hott en kaynich ivvah eich ksetzt.

¹⁴Vann diah da HAH firchtet un een deenet; vann diah sei shtimm abheichet un nett geyyich di gebodda fumm HAH gaynd, no doond diah un da kaynich es ivvah eich is, em HAH eiyah Gott nohch gay.

¹⁵Avvah vann diah nett abheichet zumm HAH sei shtimm, avvah gaynd geyyich di gebodda fumm HAH, dann zayld di hand fumm HAH geyyich eich sei, grawt vi si voah geyyich eiyah foah-feddah.

¹⁶Nau shtaynd shtill, un saynet dess grohs ding es da HAH du zayld fannich eiyah awwa.

¹⁷Is dess nett di zeit funn di vaytza-eahn? Ich zayl zumm HAH roofa so es eah gviddah un reyyah shikt. No zaylet diah vissa vass fa en evil ding es diah gedu hend im HAH sei awwa, bei frohwa fa en kaynich.”

¹⁸No hott da Samuel zumm HAH groofa, un da HAH hott gviddah un reyyah kshikt sellah dawk. Un awl di leit henn en grohsi furcht katt fumm HAH un em Samuel.

¹⁹No henn awl di leit ksawt zumm Samuel, “Bayt zumm HAH dei Gott fa dei gnechta so es miah nett shtauva, fa zu awl unsah sinda henn miah nau dess eviles gedu bei frohwa fa en kaynich ivvah uns.”

²⁰Da Samuel hott no ksawt zu di leit, “Feichet eich nett. Diah hend awl dess eviles gedu, doch drayyet nett vekk fumm HAH, avvah deenet da HAH mitt eiyah gans hatz.

²¹Drayyet nett vekk un gaynd abgettah nohch. Si kenna nix goodes du fa eich, un kenna eich nett frei macha, veil si nix veaht sinn.

²²Fa di sayk funn seim grohsah nohma zayld da HAH sei leit nett fa'achta, veil's eem kfellich voah fa eich en leit macha fa sich selvaht.

²³Un veyyich miah selvaht, es soll selayva nett sei es ich sindich geyyich da HAH bei ufheahra bayda fa eich. Ich zayl ohhalda eich lanna vass da goot un recht vayk is.

²⁴Haldet oh da HAH firchta un een deena in di voahheit mitt eiyah gans hatz, un denket droh an di vundahboahra sacha es eah gedu hott fa eich.

²⁵Avvah vann diah ohhaldet gottlohsi sacha du, dann zaylet diah un eiyah kaynich faloahra sei.”