Read Pennsylvania German 1. Samuel 15 Bible Online

1. Samuel 15 - Pennsylvania German bible

1. Samuel 15

¹Da Samuel hott no ksawt zumm Saul, “Ich binn sellah es da HAH kshikt hott fa dich salba fa kaynich sei ivvah sei leit Israel. Nau heich zu di vadda fumm HAH.

²Dess is vass da Awlmechtich HAH sawkt: ‘Ich zayl di Amalekiddah shtrohfa fa vass si gedu henn zu Israel bei sich geyyich si setza vo si ruff kumma sinn aus Egypta.

³Nau gay un fecht di Amalekiddah un butz alles vekk es si henn. Un shpoah si selvaht aw nett, mach alli-ebbah doht, mennah, veibsleit, kinnah, boblen, kee, shohf, kamayla un aysla.’”

⁴No hott da Saul di mennah zammah groofa un hott si gezayld an Telaim. 'S voahra zvay hunnaht dausend foos greeks-leit un zeyya dausend mennah funn Juda.

⁵Da Saul un sei mennah sinn no an ayns funn di Amalekiddah shtett ganga un henn datt gvoaht uf si imma deich.

⁶Eah hott vatt kshikt zu di Keniddah un hott ksawt, “Gaynd vekk funn di Amalekiddah so es ich eich nett ausbutz mitt eena. Diah voahret goot-maynich zu di Kinnah-Israel vo si ruff aus Egypta kumma sinn.” So sinn di Keniddah vekk gezowwa funn di Amalekiddah.

⁷No hott da Saul di Amalekiddah kfochta gans funn Hevila biss an Sur drunna east funn Egypta.

⁸Eah hott da Agag, da kaynich funn di Amalekiddah, levendich kfanga, un hott awl di leit doht gmacht mitt em shvatt.

⁹Avvah da Saul un di mennah henn da Agag nett doht gmacht, un aw nett di beshta shohf, oxa un di fedda hamlen un shiblen. Alles es goot voah, voahra si nett villing fa fadauva, avvah alles es si nett geglicha henn un es nix veaht voah, henn si alles doht gmacht.

¹⁰No is es vatt fumm HAH zumm Samuel kumma.

¹¹Eah hott ksawt, “Es shpeit mich es ich da Saul kaynich gmacht habb, veil eah sich vekk gedrayt hott funn miah un hott nett gedu vi ich eem ksawt habb.” Da Samuel voah bedreebt un hott di gans nacht zumm HAH groofa.

¹²Da Samuel is uf kshtanna free da neksht meiya un is ganga da Saul ohdreffa. Avvah's voah eem ksawt, “Da Saul is an Karmel ganga. Datt hott eah en ohdenkes uf gedu fa sich selvaht eahra, no is eah nunnah an Gilgal ganga.”

¹³Vo da Samuel zumm Saul kumma is, hott da Saul ksawt, “Ksaykend bisht du beim HAH! Ich habb em HAH sei gebott ausgedrawwa.”

¹⁴Avvah da Samuel hott ksawt, “Vass is dann dess geblah funn di shohf in mei oahra? Vass fa en kee geblah is dess es ich heah?”

¹⁵Da Saul hott ksawt, “Si henn si funn di Amalekiddah gebrocht; si henn di beshta funn di shohf un kee kalda fa si opfahra zumm HAH, dei Gott, avvah's ivvahricha henn miah alles fadauva.”

¹⁶No hott da Samuel ksawt zumm Saul, “Voaht, loss mich diah sawwa vass da HAH ksawt hott zu miah letsht nacht.” “Sawk miah's,” hott da Saul ksawt.

¹⁷Da Samuel hott ksawt, “Is es nett voah, es du dich glay gezayld hosht in dei aykni awwa, un doch voahsht du da foah-gengah gmacht funn di shtamma funn Israel? Da HAH hott dich ksalbt fa kaynich sei ivvah Israel.

¹⁸Da HAH hott dich kshikt en eahvet du un hott ksawt, ‘Gay un butz selli sindah di Amalekiddah gans vekk; fecht geyyich si biss nix ivvahrich is funn eena.’

¹⁹Favass hosht du em HAH nett keicht, avvah hosht's sach gnumma un hosht evil gedu fannich di awwa fumm HAH?”

²⁰“Avvah ich habb em HAH keicht,” hott da Saul ksawt. “Ich binn ganga di eahvet du es da HAH miah gevva hott. Ich habb di Amalekiddah awl doht gmacht un habb iahra kaynich da Agag zrikk gebrocht.

²¹Di leit henn samm fumm sach gnumma vi shohf un fee, un henn's besht sach kalda fa Gott, so es si's opfahra kenna zumm HAH dei Gott an Gilgal.”

²²Da Samuel hott no ksawt, “Hott da HAH may blesiah in opfahra un brand-opfahra es vi em HAH sei shtimm heicha? Gukk moll, fa heicha is bessah es opfahra, un fa's du is bessah es es fett funn shohf-bekk.

²³Geyyich Gott shaffa is vi di sind funn hexahrei, un dikk-kebbich sei is vi's evila funn abgettah deena. Veil du's vatt fumm HAH nunnah gedrayt hosht, dann hott eah dich aw nunnah gedrayt fa kaynich sei.”

²⁴No hott da Saul ksawt zumm Samuel, “Ich habb ksindicht. Ich habb em HAH sei gebott un dei vadda ivvah-gedredda, veil ich mich kfeicht habb veyyich di leit un habb eigevva zu eena.

²⁵Nau bitt ich dich fa mei sind fagevva un zrikk kumma mitt miah, so es ich da HAH deena kann.”

²⁶Avvah da Samuel hott ksawt zu eem, “Ich gay nett zrikk mitt diah. Du hosht em HAH sei vatt nunnah gedrayt, un da HAH hott dich nunnah gedrayt fa kaynich ivvah Israel sei.”

²⁷Vi da Samuel rumm gedrayt is fa gay, hott da Saul hohld gnumma funn da sohm funn seim rokk, un da rokk is farissa.

²⁸No hott da Samuel ksawt, “Da HAH hott's kaynich-reich funn Israel vekk grissa funn diah heit, un hott's zu dei nochbah gevva es bessah is es du.

²⁹Sellah es di Hallichkeit funn Israel is dutt nett leeya adda sei vanning fa'ennahra. Eah is nett en mensh, es sei meind tshaynsht.”

³⁰Da Saul hott ksawt, “Ich habb ksindicht. Avvah ich bitt dich fa mich eahra fannich di eldishti funn mei leit un fannich Israel. Gay zrikk mitt miah so es ich da HAH dei Gott deena kann.”

³¹So is da Samuel zrikk ganga mitt em Saul, un da Saul hott da HAH gedeend.

³²No hott da Samuel ksawt, “Bringet miah da Agag, da kaynich funn di Amalekiddah.” Da Agag is geahn kumma veil eah gedenkt hott, “Geviss di biddahnis funn doht is ivvah.”

³³Avvah da Samuel hott ksawt, “Vi dei shvatt veibsleit grawbt hott funn iahra kinnah, so soll dei maemm grawbt sei funn iahra kinnah unnich veibsleit.” No hott da Samuel da Agag in shtikkah kakt fannich em HAH an Gilgal.

³⁴Da Samuel is no noch Rama ganga un da Saul is nuff an sei haus ganga in Gibea.

³⁵Biss da dawk es eah kshtauva is, is da Samuel nimmi ganga da Saul sayna, avvah da Samuel hott gveind ivvah een. Un's hott da HAH kshpeit es eah da Saul kaynich gmacht hott ivvah Israel.