Read Phom Naga KAHBHAO 1 Bible Online

KAHBHAO 1 - Phom Naga bible

KAHBHAO 1

¹Chongpangpülei Kahvangi vangshothü hatü kahdoknyü ling.

²Kahdoknyü-ü dhaomü mehe deiaeiyao neshiüi kong mü nyuteke hatü yungching ilangmong shak kü vangnyaki jümtü ha shangkü Kahvang laangha kamteiyei nyu.

³Hapheikü Kahvangi, “Vangngai vamtuh” shei e, hatü vangngai vam.

⁴Kahvangi vangngaiyü meiangke shei vei, hatü Kahvangi vangnyak kübü vangngai hanhü.

⁵Kahvangi hapa vangngai kü, “Nyihnüng” hatü vangnyak kü, “Yanüng” shei nyük, hatü om dhüei peihpheikü dhom vam, hapayü shongpü nyih nyuteke.

⁶Hapheikü Kahvangi, “Yung kübü yung handaitü ha aa kü shingkong vamtuh” shei e.

⁷Kahvangi shingkong ling, hatü ha shingkong dok kübü yung mü ha shingkong phang kübü yung nyi baong hanhü, hatü ha vamteke.

⁸Kahvangi hapa shingkong kü, “Vangshang” shei men, hatü om dhü, hatü dhom shei nyipabü nyih nyuteke.

⁹Hapheikü Kahvangi, “Vangshang phang kübü yungthü shing hükei thaidaituh, hatü kahvan vamtuh” shei e, hatü ha vam.

¹⁰Kahvangi ha kahvan kü, “Kahdok” shei men, hatü thaiyei shüngpü yung kü, “Yungching” shei men. Hatü Kahvangi hayü meiangke shei veiteke.

¹¹Hapheikü Kahvangi, “Kahdoknyüi phenhavunglak vamhütuh; livang kohpü püthü, vang kohtü betjük jükpü püthü lem laolao vamtuh” shei e, hatü ha vam.

¹²Kahdoknyüi hathü vang kohshi betjük jükpü püthü lem laolao vamhü, hatü Kahvangi hayü meiangke shei vei,

¹³hatü om dhü, hatü dhom shei nyih jempabü nyuteke.

¹⁴Hapheikü Kahvangi, “Vangnyak kübü vangngai hanhen shingvaishi vangshangei vangngaithü vamtuh, hatü hathüi hepak vangpan, nyih hatü bongthü nyinghen nyangeihepü hük vaihütuh,

¹⁵hatü hathüi kahdoknyü kü vangngai shuohhen shingvaishi vangshangei vangngai kei nyemnyu” shei e, hatü ha vamteke.

¹⁶Kahvangi vangngai longpü nyi linglongpüba vangngaiyü nyihnüng nyahen vanghe, hatü maanpüba vangngaiyü yanüng nyahen lennyü hatü lithathü ling.

¹⁷Kahvangi kahdoknyü kü vangngai shuohhen,

¹⁸hatü nyihnüng hatü yanüng kü vanglem lemhen, hatü vangnyak kübü vangngai hanhen vangshangei shih-ei tuh, hatü Kahvangi hayü meiangke shei vei,

¹⁹hatü om dhü hatü dhom shei alipabü nyih nyuteke.

²⁰Hapheikü Kahvangi, “Yungi yungyen vamhütuh, hatü kahdok shak kü vangshangei ouhiyüh piteituh” shei e.

²¹Hanangkü Kahvangi yungching yem longpü hatü yungmongei kamteipü yemhimak lem laolao hatü ouhiyüh lem laolao ling, hatü Kahvangi hayü meiangke shei vei.

²²Kahvangi hathü kü, “Cheha sheiyei daeishetuh hatü yungching mahütuh, hatü kahdoknyü kü ouhiyüh daeishetuh” shei moihimanei e,

²³hatü om dhü hatü dhom shei ngapabü nyih nyuteke.

²⁴Hapheikü Kahvangi, “Kahdoknyüi yemhimak lem longi vamhütuh: haümyem hatü lüei kampü yemhimak, hatü phaüyem lem laolao vamhütuh” shei e, hatü ha vamteke.

²⁵Kahvangi haümyem, phaüyem hatü lüei kampü yem lem laolao ling, hatü Kahvangi hapayü meiangke shei vei.

²⁶Hapheikü Kahvangi, “Jeni jenei deiaei leshi hangkuli lingshah, hatü hapa hangku-i yungching yemhathü, shangouthü, haümyem, phaüyem hatü kahdokei lüei kamteipü yemhamakha peü shak kü khei nyemvai” shei e.

²⁷Hanangkü Kahvangi hangkuli büpalei deiaei kei, Kahvangei deiaei kü büpai jomphong nyüha, baha shei ling.

²⁸Kahvangi jomphong kü, “Betjük jüktuh, hatü daeishetuh, hatü kahdoknyü mahütuh, hatü ungei-aeiyei tuhtuh, hatü yungching yemhathü, shangouthü hatü kahdoknyülei nyupü yemhimak peü shak kü khei vaituh” shei moihimanei e.

²⁹Hapheikü Kahvangi, “Veituh, ngei am kü kahdok shak kü livang vampü pühivung lemphü hatü vang kohtü betjük jükpü lemphü ammi hahhen shingvaishi shuohnyüpeih.

³⁰Kahdoknyü kübü yemhimak lemphü, hatü shangouthü, kahdok shakei lüei kamteipü yem, yangnyu ngü nyupü yem lemphü, hatü pühivung peü ammi hahhen shuohnyüpeih” shei e, hatü hapakei nyuteke.

³¹Kahvangi büpai lingpü lemphü kü meiangke shei mongongei vei, hatü om dhü hatü dhom shei vokpabü nyih nyuteke.