Read Phom Naga KAHBHAO 12 Bible Online

KAHBHAO 12 - Phom Naga bible

KAHBHAO 12

¹Shaang SHEMBÜPAi Abram kü, “Nüngei kahmük, nüngei shem am, hatü ampalei shem tuhtü ngei nüng kü huphahen kahdokei daituh” shei e.

²“Ngei-i nüngü jat longpü hük leihühen, hatü ngei nüng kü moihimanhen. Ngei nüngei men longpü leihühen, hatü nüngü moihimanpü leihen.

³Nüng kü moihimanpüthü kü ngei moihimanhen; üami nüng kü thaüvaü ngeiyao jom kü thaüvaühen, hatü kahdoknyü hangkuli peü nüng homei moihiman danghen.”

⁴Hanangkü SHEMBÜPAi eshuohpükei Abram layaongei dai, hatü Lot-ao büpa mü dai. Haran leipü Abram layaongei daishingkü büpa bong 75 nyu.

⁵Büpai chenyüha Sarai, chenaüei cheha Lot, büpai thaihahpü mop kemei hatü aathü peü yahhahtü Kanan kahdokei layaongei daiyei ngoiteke.

⁶Abrami kahmük homei daiyei Shekhemei daülangpü shing Moreh leipü daülangpü longkham pünyüchong ngoi. Hahepak kü Kanan am hapa kahdokei nyudaitü nyuteke.

⁷SHEMBÜPA Abram touei vamei, “Nüngei lihila kü hapa kahdok shuohhen” shei e. Hanangkü büpa touei vamjapü SHEMBÜPA kü hatouei moidü hük ling.

⁸Hapheikü büpa shao daiyei Bethel kü heongphi lemei ashakshem ve; Bethel heshü philei hatü Ai heong philei nyuteke. Hatouei büpai SHEMBÜPA kü moidü hük lingtü SHEMBÜPA kü khümteke.

⁹Hapheikü Abrami layaongei nedoh-i Negeb lemei dai.

¹⁰Shaang hapa kahdokei münghishaü vam, hanangkü Abram hi Sarai nyi-i münghishaü nangkü kansho hük shingvaishi Ijiplei nyunüng yiü.

¹¹Büpai Ijip ngoihen hepak kü chenyüha Sarai kü, “Nüngü nela ahshi-üng meipü nyüha shei ngei nyingei nyüpeih,

¹²hatü mechem Ijip ami nüng eehen, jomi hayü büpalei chenyüha khih shei eteihen. Hahepak kü ngei jütüktü nüng mon yemmü tuhhen.

¹³Hanangkü ngei kü meishi jungeilanghen hatü nüng homei ngeiyao nemahdai-i nyuhen nangkü nüngü ngelei naüpeü hih shei etuh” shei e.

¹⁴Mechem Abram Ijip ngoipa, Ijip ami hapa nyühayü longi nela meiangke shei vei,

¹⁵hatü mechem Pharaohlei lakchongbüthüi pinnyü eepa, jomi pinnyü meipü jung Pharaoh kü ejateke, hatü pinnyü ongshemei müei dei.

¹⁶Pinnyülei men kü büpai Abram kü longi meishi jung hatü Abrami mi, mohoh, gadu chebi chebaong, nyüha hatü baha aathü hatü ut longi dangteke.

¹⁷Shejao SHEMBÜPAi Abramei chenyüha Sarai tata kü Pharaoh hatü jom shem kü longi shanghah shuoh.

¹⁸Hanangkü Pharaoh-i Abram kü nyükei, “Nüngi ngei kü mehe lingphopa?” shei e.

¹⁹“Nüngi mehekei pinnyü-ü ngelei naüpeü hih shei epa? Hanangkü pinnyü-ü ngelei nyüha vaihen yahpeih. Hey, anyüha müei leidaituh!” shei e.

²⁰Hahepak kü Pharaoh-i büpalei shennyakthü kü Abram hi büpalei aathü nangkü ngeükhüam shuohtü chenyüha hatü büpa mü nyupü lemphü koei leitük.