Read Phom Naga KAHBHAO 19 Bible Online

KAHBHAO 19 - Phom Naga bible

KAHBHAO 19

¹Hapa vangsho phongshan nyi om mü Sodom ngoi, hatü Lot-ü chingnyü penyüsha touei uoshi nyu. Mechem büpai henyi eepa, büpa yaongei jiji mü pongnüng heih-ei büpalei dhe aümei shatü khüm.

²“Ngelei shembü nyi, chingmeilemlingei shemei shükütuh. Lakhüh shephutü sheyayü shemei paümtü nepnüng lomi layaongei daituh” shei e. Jijinyi-i, “Anyoh, henjiyü chingshongei kamteiyei paümhen” shei e.

³Shejao büpai ahshi-üng nyeanei epü nangkü jiji shem mongei büpa mü shüteke. Büpai daw neshih-i aan lingei hahying tem, hatü jijinyi-i ha hah.

⁴Jomphong shihen shekü Sodom chingnyü leipü behe hashih peü thaiyei shem shonteke.

⁵Jomi Lot kü nyüktü, “Sheya am shemei peipü shennyak nyi melei daipa? Hami jiji kü douten dükhen chingshelei anshih” shei e.

⁶Lot-i sha küpphongtü vamei jom touei heih-ei,

⁷“Tahma, ngelei küphüthü, henüng keipü douten tedükküma.

⁸Veituh, chemao baha mü mangjempü yiükha nyi nyüpeih. Ngei jiji ngaiphanüng hatü ammi mongpükei jiji kü dükeishuoh, shejao hapa shennyak nyi kü meheyao tedük; mehenangkü jijiyü ngelei shemdhümei peidaiteke” shei e.

⁹Shejao jomphongi, “Nüngdaituh, hapa shennyakü hatouei benha vaiyei peipeih, shejao shaang shahphenbü kei ehen je? Hapa shennyak nyi mü nyeishi nüng kü nemei-i dükhen” shei e. Jomphongi nedoh-i Lot kü hungei sha benei shühen heih.

¹⁰Shejao mongeipü shennyak nyi vamei Lot shüei shütü sha latlang.

¹¹Hapheikü jijinyi-i chingshelei yaongpü behe hashih peülei mük phüngtükpü nangkü jomi shaden nenyingaok.

¹²Hapheikü hapa shennyak nyi-i Lot kü, “Halei nüngei shem am yiükhathülei baha, hapeüthü, yiükhathü nevaijü shem am hanei hapa chingnyülei nyujema hapa shing leipü müei lüdaituh.

¹³Hami hapa shing mahtükhen; mehenangkü hapa nanglak khüei thaüvaüpü SHEMBÜPAi danteke, hatü SHEMBÜPAi hapa shing mahtükhen ham shompeih” shei e.

¹⁴Hanangkü Lot daiyei yiük phepüthü kü, “Shülangi hapa shing kübü lüdaishah; mehenangkü SHEMBÜPAi hapa chingnyü mahtükhenja” shei e. Shejao yiükhathülei bahathüi nyienei enyeih shei deih.

¹⁵Mechem vangngaipa, vangsho phongshan nyi-i Lot kü, “Anyüha hatü yiükha nyi müei lomi lüdaituh, hei nevaijema hapa chingnyü mahpü mü amphongao mahhen” shei e.

¹⁶Büpa jü-üei nyushingkü hapa shennyak nyi-i büpa, chenyüha hatü yiükha nyilei lak kü düktü hapa chingnyü peih-ei müei ngailang; mehenangkü SHEMBÜPAi jom kü phahji.

¹⁷Mechem jijinyi-i hathü ching haolei müei deipa, jijinyi-i, “Yanglem yemei nyaidaituh, ngaümpheilei yaakei tevei nevaijü kahjilei metoueiyao teyaong; kahshang lemei aongdaituh, hei nevaijema amao mahhen” shei e.

¹⁸Shejao Lot-i, “Oh, anyoh ngelei shembü nyi!

¹⁹Anjilei chongphobü kü longi bamei ngelei yangnyu yangphüteke, shejao kahshang lemei ne-aongaokhen khih; mehenangkü hapa vongshüh pongpü eeyei ngei dihen khih.

²⁰Veituh, antepa ching maanpübalei nyaiyei daihen yopüba nyüke. Ngei hapa maanpü shingei daishah, shejüang yanghen khih” shei e.

²¹Büpai, “Hayao meiangke; nüngi epü hapa ching ngei nemahtükpih.

²²Shülangi yiütuh; nüng hapa shing mangngoi thahshi ngei meheyao nedükpih” shei e. Hanangkü hapa ching kü Zoar shei nyük.

²³Lot halei ngoipü thahshi vanghe aongdaitü nyu.

²⁴Hapheikü SHEMBÜPAi Sodom hatü Gomorrah nyi kü vangsho leipü awkaong meli hatü aw shom,

²⁵hatü büpai chingnyü nyi, kahji, chingnyülei nyupüthü, hatü kahdokei kohpü lemphü shamtük.

²⁶Shejao Lot-ei chenyüha yaakei vei, hatü pinnyü hüm shemnyü leidai.

²⁷Nepphei Abrahami SHEMBÜPA mü yaongpü shingei heih,

²⁸Sodom hi Gomorrah hatü kahji kahdok peü kü veishingkü awbhaong kübü awshit keiha awshit vamei eeteke.

²⁹Shejao mechem SHEMBÜPAi Lot nyupü kahji leipü chingnyü nyi mahtükpa, büpai Abraham deihpü nangkü Lot müei yanglem yemei deilang.

³⁰Shaang Lot-i Zoar chingei nyuhen nyempü nangkü haleipü daiyei shangchingei büpalei yiükha nyi mü yaongsha hükei nyu.

³¹Hashongnyüi chenaü kü, “Jenei pa viüdai, hatü hapa kahdoknyü vanglem kü kei ji yahhen üpayao halei neshiü.

³²Kei, ji-i opa kü yiü yingshuohshah, hatü ji büpa mü shishah, hatü jenei palei li tuhshah” shei e.

³³Hanangkü jijinyi-i chepa kü ha ya yiü yingshuoh, hatü hashongnyü chepa mü shi; büpai cheha mechem shi, mechem paodai nenying.

³⁴Nyihphei hashongnyüi chenaü kü, “Veituh, meya ngei büpa mü shipeih; sheya-ao ji-i büpa kü yiü yingshuohshah, hatü jenei palei li tuhhen shangmü nüngi büpa mü shituh” shei e.

³⁵Hanangkü jijinyi-i ha ya-ao chepa kü yiü yingshuoh, hatü chenaü heih-ei chepa mü shi, hatü büpai cheha mechem shi, mechem paodai nenying.

³⁶Hapheikü Lot-ei yiükha nyiphen chepalei hapeüi büm nekongi lei.

³⁷Hashongnyüi yeshang hük büh, hatü ha naü kü Moab shei men. Shinnyih thahshi büpayü Moab amei bü shei nyingnyüke.

³⁸Chenaüao yeshang hük büh, hatü ha naü kü Ben-Ammi shei men. Shinnyih thahshi büpayü Ammon amei bü shei nyingnyüke.