Read Phom Naga KAHBHAO 22 Bible Online

KAHBHAO 22 - Phom Naga bible

KAHBHAO 22

¹Kanja angpheikü Kahvangi Abraham kü dok. Büpai Abraham kü, “Abraham” shei nyük, hatü büpai, “Ngei hammü nyüpeih” shei e.

²Büpai, “Nüngei halom Isak nüngi bampü ha müei Moriah kahdokei daituh, hatü ngei nüng kü huphahen kahshang hükei büpa jüei jakpü moila shuohtuh” shei e.

³Hanangkü Abrahami dhom mü lomi büpalei gadu kü uotü büpa mü nethe nyi hatü cheha Isak mü, hatü moila jakhen pü yah-ei kotü Kahvangi büpa kü hushuohpü tailu shing hükei dai.

⁴Nyih jempabü kü Abrahami ngangei veishingkü hapa shing tailuei eeteke.

⁵Hahepak kü Abrahami nethepa nyi kü, “Gadu mü hatouei chongkei, naü henji antolei heihhen; henji halei khümtü leikahen” shei e.

⁶Abrahami moila jakhen püdü yah-ei Isak kü paihü, hatü büpai aw hatü longkhoih notü jiji chemi dai.

⁷Isaki chepa Abraham kü, “Opa” shei nyük. Büpai, “Oi, ngelei hapeü” shei jang. Isaki, “Aw hatü pü nyüke, shejao jakpü moila shuohhen mi melei nyüpa?” shei phe.

⁸Abrahami, “Hapeü, Kahvang, büpai-üng jakpü moila shuohhen mi yahphahen hih” shei e. Hanangkü jiji nedoh-i kamei dai.

⁹Mechem Kahvangi hupü shingei jiji ngoipa, Abrahami halei moidü hük lingtü pü ai jiüei bhaongei haü. Büpai cheha Isak kü shatü moidülei pübhaong shangkü haüteke.

¹⁰Hahepak kü Abrahami büpalei longkhoih yahei ngai, hatü cheha jühen yaong.

¹¹Shejao vangsho leipü SHEMBÜPAlei phongshani büpa kü, “Abraham, Abraham” shei nyük. Büpai, “Ngei hammü nyüpeih” shei e.

¹²Büpai, “Nüngi naü kü lak teshih nevaijü büpa kü meheyao tedük; mehenangkü nüngi Kahvang kü nyemnyüke, hatü laophülei halom hük mon nyupü dangkao ngei kü moilahen kaungei nenyu shei ngei nyingteke” shei e.

¹³Abrahami yaakei veishuohjü mi baongha hük phenha kü vaungi mantü ee. Abrahami heih-ei hapa mi yah-ei cheha nangjei jakpü moila shuoh.

¹⁴Hanangkü Abrahami hapa shing kü, “SHEMBÜPAi shuohnyüpeih” shei men, hatü shinnyih thahshi, “SHEMBÜPAi kahshangei shuohnyeih” shei enyüke.

¹⁵SHEMBÜPAlei phongshani Abraham kü vangsho leipü nyipabü nyüktü,

¹⁶“Ngei, ngei nyingi lahtepih shei SHEMBÜPAi enyüke: Nüngi nüngei halom dangkao shümei nedoh-i ha dükpü nangkü,

¹⁷ngei nüng kü moihimanhen, hatü nüngei lihila vangsho lithathü kei hatü yungching bhihhiphang kei daeisheyei leihühen. Nüngi ngelei shah bangpü nangkü nüngei hühihathüi vepathülei chingnyüthü kaamlanghen,

¹⁸hatü nüngei lihilathü homei kahdoknyü jatthü peü moihiman danghen; mehenangkü nüngi ngelei shah bangteke” shei e.

¹⁹Hanangkü Abrahami büpalei chongphopü nethepa nyi touei nyokei lei, hatü jom peü Beershebalei leiyei halei nyu.

²⁰Kansho hük pheikü chenaü Nahorlei chenyüha Milkah-i yeshang shet bühpüja shei Abrahami dan:

²¹Hashongpa Uz, chenaü Buz, Kemuelü Aramei chepa,

²²Kesed, Hazo, Pildash, Jidlaph hatü Bethuel nyuteke.

²³Bethuelü Rebekahlei chepa nyu. Hathü jom shet Abrahamei chenaü Nahor kü Milkah-i bühjapü hapeüthü nyu.

²⁴Nyeinya vaishi büpalei yiükphü Reumah-i Tebah, Gaham, Tahash hatü Maakah hathü bühjateke.