Read Phom Naga KAHBHAO 23 Bible Online

KAHBHAO 23 - Phom Naga bible

KAHBHAO 23

¹Sarah bong 127 nyu; hapayü Sarahlei yangnyu den nyu.

²Pinnyü Kanan kahdok Hebronei di, hatü Sarahlei mahng kü Abraham thepeiyoung.

³Abrahami chenyühalei mahng touei uoshi nyupü yaongei Hit am kü,

⁴“Ngeiyü benha hatü yenpa hük am mü nyunyüpeih. Ngei mahng vühen shingvaishi mahngchong vaihen kahdok maani yushih” shei e.

⁵Hit ami Abraham kü,

⁶“Longpüba, hami epü banghümao; jenphong khongkü nüngü wong kohpü ongpa khih. Hamei mahngchong peü mü meipübalei mahng vütuh. Nüngi mahng vühen shingvaishi üpaiyao tah shei ne-ephapih” shei e.

⁷Abrahami yaongei hapa kahdok kü nyupü Hit am touei aümei sha.

⁸Büpai jomphong kü, “Ammi ngei kü mahng nyemvü shei deihjema, ngei epü bangkütuh, hatü ngelei men kü ammiyao Zoharlei cheha Ephron kü,

⁹büpalei Makhpelah yaongdung nyemyuphanüng etükütuh; hapayü büpalei kah philei nyüke. Am nyushi-üng büpai ngei kü mahngchong vaihen lop shuohhen nyemyupha” shei e.

¹⁰Hit am mü Ephronao uoshi nyu, hatü büpai chingnyü penyüsha touei peiyei nyupü Hit am peüi danshi Abraham kü hapakei jangei e.

¹¹“Longpüba, bangtuh.” “Ngei nüng kü kah hatü halei nyupü yaongdung shuohnyeih; hamei shennyakthü nyushi ngei nüng kü ha shuohnyeih; nüngi halei mahng vühahtuh” shei e.

¹²Hahepak kü Abrahami kahmükei nyupü nanglakthü touei aümei sha.

¹³Büpai kahmük kübü nanglakthüi danshi Ephron kü, “Nüngi ngei epü bangkütuh! Ngei nüng kü hapa kahdokei bhei shuohshah, nüngi ha yahtuh; shejüang halei ngei mahng vühen” shei e.

¹⁴Ephroni Abraham kü,

¹⁵“Oh longpüba, bangtuh, ngin kho ali mon shangpü kahdok kü ji aa kü henüngü mehe etei-henang? Hei-üng mahng vütuh” shei e.

¹⁶Ephroni epü kü Abrahami mongteke, hatü shennyakthüi danshi Ephroni epü shük ngin kho ali hahepak kü shuohteipü vanglem aimü Abrahami shuoh.

¹⁷Hanangkü Makhpelahlei nyupü Ephronei kah, Mamre heong philei nyupü hatü haleipü yaongdung, püthü viong mongei nyupü peü,

¹⁸Abrahamei kahmoi leidai. Hapa chingnyü penyüsha touei shahthai kü peipü Hit am peüi hapayü Abrahamei kah shei nyingteke.

¹⁹Hapheikü Abrahami Makhpelah kah leipü yaongdungei Kanan kahdok leipü Mamre (Hebron) philei meeshi Sarahlei mahng vü.

²⁰Hapa kah hatü yaongdungü Hit amei lak leipü Abrahami shakei büpalei mahngchong leidai.