Read Phom Naga KAHBHAO 24 Bible Online

KAHBHAO 24 - Phom Naga bible

KAHBHAO 24

¹Shaang Abrahamü viüei bong longi dai, hatü SHEMBÜPAi Abraham kü lemphü lem kü moihiman.

²Abrahami büpalei chongphobü peü mü behe hatü khei vaipü shennyak kü, “Ngelei shüngkung kü nüngei lak haütuh,

³hatü SHEMBÜPA, vangsho hatü kahdoknyü shak kü Kahvangei men kü ngelei hapeü shing shaang chemi nyupü Kanan lapeü yiük neyahpih,

⁴shejao ngelei kahmük ngelei nanglak touei leiyei ngelei hapeü Isak shing nyüha yemhen shei lahshih” shei eteke.

⁵Chongphobüi büpa kü, “Hapa nyüha paoh ngei mü hapa kahdokei neleiküjema, ngeipa anha müei nüng peiküpü kahmükei daihen hiang?” shei phe.

⁶“Büpa hapa kahmükei müei telei” shei Abrahami e.

⁷SHEMBÜPA, vangsho Kahvang, üpai ngei opalei shem, ngelei kahmük kübü müei dai, hatü ngei kü lah-ei, “Nüngei hühiha kü ngei hapa kahdok shuohhen shei epa, ngelei hapeü shing nüngi nyüha danghen mü büpai büpalei vangsho phongshan nüng shekü shomkahen.

⁸Hapa nyüha nüng mü neleiküjema, hapa lahpü nüng kü shashi neshiü; ngelei hapeü mon nüngi halei müei tedei” shei e.

⁹Hanangkü chongphobüi büpalei lak Abrahamei shüngkung shangkü haütü hapa nangkü lahteke.

¹⁰Hapheikü chongphobüi büpalei shembülei ut an mütü meipü thintho lemphü kotü layaongei Aram-Naharaim kahdok Nahor ching yemei dai.

¹¹Büpai ching ngoishekü yungkukei utthü lemhü; hapayü om mü nyühathü yungsho heihpü hepak nyuteke.

¹²Büpai, “Oh SHEMBÜPA, ngelei shembü Abrahamei Kahvang, ngei shinnyih aokpü danghütuh, hatü ngelei shembü Abraham kü bampü hueishuoh.

¹³Veituh, ngei yungkukei yaongshi nyüpeih, hatü chingeipü nelathü yungsho heihkünyüke.

¹⁴Ngei üpa nela kü, ‘Chingmeilemlingei ngei yung yinghen nüngei yungshong yahshih’ shei ehen, hatü üpai ngei kü, ‘Yingtuh, hatü ngei nüngei utthü kao yung yinghen hih’ shei ephahenshang, hapa nelayü nüngi nüngei chongphobü Isak shing jepü vaihütuh. Hapai nüngi ngelei shembü kü bampü huteke shei ngei nyinghen” shei phop.

¹⁵Büpa phopei kemshekü bhagchongei yungdük chantü Rebekah heih. Pinnyü-ü Abrahamei chenaü Nahor hi chenyüha Milkah nyilei cheha Bethuelei yiükha nyu.

¹⁶Pinnyü nela longi meishi, hatü baha üpaiyao mangjempü pai mü ngühpü nela nyuteke. Pinnyüi yungkukei heih-ei yung shotü shao aong.

¹⁷Hahepak kü chongphobüi pinnyü mü pongnüng heih-ei pinnyü kü, “Nüngei yungdük leipü yung maani yinghen yahshih” shei e.

¹⁸Pinnyüi, “Yingtuh, ngelei shembü” shei e, hatü pinnyüi yungdük phaangei shantü büpa kü yung shuoh.

¹⁹Pinnyüi büpa kü yung shuohpheikü shao pinnyüi, “Nüngei utthü mangmoh thahshi yinghen yung ngei shophüshah” shei e.

²⁰Hanangkü pinnyüi hapa yung yemhimaki yung yingpü shung kü shih-ei kongtüktü shao yungkukei yiüei utthüi mangmoh thahshi yung shoteke.

²¹Shah phahükao ne-e-i hapa shennyaki pinnyü kü hüngei veishi SHEMBÜPAi büpalei yendai aokpü danghü-üla shei nyinghen veishi nyu.

²²Mechem utthü yung yingei kempa, hapa shennyaki hon shongchü ngaiyei shong kü shih, hatü hon lakshep nyi ngaiyei lak kü shepshuohteke.

²³Hapheikü büpai, “Nüngü üpalei yiükha vaipüang? Sheya ammei shemei paümhen shing nyülashang eshihma” shei e.

²⁴Pinnyüi, “Ngeiyü Nahor hi Milkah nyilei hapeü Bethuelei yiükha hih” shei e.

²⁵“Hamei shemei hahtang hatü lebü het longi nyüpeih, hatü am paümhen shing changshi nyüpeih” shei e.

²⁶Hapa shennyaki aümei shatü SHEMBÜPA kü khüm,

²⁷hatü, “SHEMBÜPA, ngelei shembü Abrahamei Kahvang men longtuh. Büpai ngelei shembü kü bampü lakshing hatü lahtükpü jiüshi dükteke. SHEMBÜPAi shinnyih ngelei yendaiyü ngelei shembü amei jeihinaü shemei ngoihüteke” shei e.

²⁸Hapa nelanyüi mokei heih-ei chenyü am shem kao ha jung ejateke.

²⁹Rebekahlei chejeiyü Laban nyu; büpai ching leipü vamei daiyei hapa shennyak mü heününg yungkukei heih.

³⁰Büpai shongchü hatü lakshep eehinüng, hatü hapa shennyaki pinnyü kü mehe e, ha Rebekah-i epü danhinüng büpai hapa shennyak yemei daishingkü yungkukei utthü mü yaongshi chongjateke.

³¹“SHEMBÜPAi moihimanpü nüng, huoi. Nüng hammü mehekei yaongnya? Ngei am paümhen shing hatü utthü paümhen shing temei nyüpeih” shei e.

³²Hanangkü hapa shennyak shemei aong, hatü utthü leipü hanggo ngühlang. Utthü shing hahtang hatü het anei shuoh, hatü hapa shennyak hatü jempü shennyakthü shing lakhüh shephuhen yung anei shuoh.

³³Bhaong hahhen temteke, shejao büpai, “Ngei ehen shei deihpü shah mang-e-i bhaong nehah-ü” shei e. “Shejema ekütem” shei Labani e.

³⁴Hanangkü büpai, “Ngeiyü Abrahamei chongphobü hih.

³⁵SHEMBÜPAi ngelei shembü kü longi moihimanei büpa shemmei leiteke. Büpai büpa kü mi, mohoh, hon, ngin, nyüha, baha aathü, ut hatü gadu longi shuohteke.

³⁶Ngelei shembülei chenyüha Sarah longi viüdaipheikü yeshang hük bühteke, hatü ngelei shembüi büpa kü angpü peü shuohteke.

³⁷Ngelei shembüi ngei kü, ‘Nüngi ngelei hapeü shing ham nyupü Kanan leipü yiük teyem,

³⁸shejao opalei shem am hatü ngelei mükhiphang kübü ngelei hapeü shing yiük yahhütuh’ shei lahhüpeih.

³⁹Hahepak kü ngei ngelei shembü kü, ‘Pinnyü ngei mü neleiküjü mekei vaihen?’ shei phepeih.

⁴⁰Büpai ngei kü, ‘Ngelei hapeü shing nyüha hük ngelei mükhiphang hatü opalei shem am kübü danghen shingvaishi ngei ven danei kampü SHEMBÜPAi büpalei vangsho phongshan nüng mü shomhen, hatü nüngei yendai aokpü danghen.

⁴¹Hapheikü mechem nüng ngelei mükhiphang touei peihenshang, jomi nüng kü pinnyü shuohhen nemongjao nüngei hang lanpü vaihen, hapa lahpü kü nüng shashi neshiü’ ” shei ephopeih.

⁴²Mechem ngei shinnyih yungkuk ngoipa, ngei, “Oh SHEMBÜPA, ngelei shembü Abrahamei Kahvang, chingmeilemlingei ngelei yendai aokpü danghütuh.

⁴³Veituh, ngei yungkukei yaongshi nyüpeih, hatü nela hanei yungsho heihküjü ngei pinnyü kü, ‘Chingmeilemlingei ngei nüngei yungdük leipü yung yingshah’ shei eshuohjü,

⁴⁴pinnyüi ngei kü, ‘Yingtuh, hatü nüngei utthü shingao yung shophüshah’ shei üpai ephahenshang hapa nelayü ngelei shembülei hapeü shing SHEMBÜPAi jepü yiük vaihütuh shei phoppeih.

⁴⁵Ngei ngelei mongei phoppü kemshekü bhagchongei yungdük chantü Rebekah heihküpeih. Pinnyü yungkukei heih-ei yung shoei aongkei-i pinnyü kü, ‘Yung yahshih’ shei eshuohpeih.

⁴⁶Pinnyüi shülangi bhagchong leipü yungdük phaangei shantü, ‘Yingtuh, hatü ngei nüngei utthü kao yung shophahen hih’ shei ephopeih.

⁴⁷Ngei pinnyü kü, ‘Nüngü üpalei yiükha vaipüang?’ shei pheshuohpeih. Pinnyüi, ‘Ngeiyü Nahor hi Milkah nyilei cheha Bethuelei yiükha hih’ shei ephopeih. Hapheikü ngei pinnyülei shong kü shongchü hatü lakshep shepshuohpeih,

⁴⁸hatü ngei aümei shatü SHEMBÜPA kü khümpeih. SHEMBÜPA, ngelei shembü Abrahamei Kahvangi ngelei shembülei hapeü shing büpalei chenaüei hüpeü danghen mü ngei jiüshangpü lem kü müpü nangkü ngei büpa men longnyeih.

⁴⁹Shaang nüngi ngelei shembü kü phahjiei deihjema, hatü lahtükpü jiühühen deihjema, ngei kü eshih, hei nevaijema ngei melemei daihen eshih shei phoppeih” shei eteke.

⁵⁰Laban hi Bethuel nyi-i, “Hapayü SHEMBÜPA leipü khih; ham lemhük kei meheyao ehen neshiü.

⁵¹Rebekahyü ha khih; pinnyü yah-ei leituh, hatü SHEMBÜPAi hupükei pinnyü-ü nüngei shembülei hapeülei nyüha nyemvai” shei e.

⁵²Mechem Abrahamei chongphobüi jomi ha epü danpa, büpai SHEMBÜPA kü aümei khüm.

⁵³Hapheikü chongphobüi hon, ngin, chühiyük hatü owhiai ngaiyei Rebekah kü shuoh, hatü büpai pinnyülei chejei hatü chenyü nyi kao bhei wongpü thintho shuoh.

⁵⁴Hapheikü büpa hatü büpa mü peipüthüi bhaong hahtü ha ya halei paüm. Nepnüng shin paoei büpai, “Ngelei shembü yemei leishah” shei e.

⁵⁵Shejao chejei hatü chenyü nyi-i, “Lameiyü nyih an ham mü nyutü nyemleikei” shei e.

⁵⁶Shejao büpai, “Hamphong shümei tetuh; mehenangkü SHEMBÜPAi ngelei yendai aokpü danghüteke. Ngelei shembü touei ngei leihen hih” shei e.

⁵⁷Jijinyi-i, “Shejema lamei kü nyükei ha nang phetuh” shei e.

⁵⁸Hanangkü jomphongi Rebekah kü nyükei, “Nüng hapa shennyak mü lei-üla?” shei phe. Pinnyüi, “Leihen” shei e.

⁵⁹Hanangkü jomi Rebekah mü pinnyülei chongphobü, Abrahamei chongphobü hatü büpa mü peipüthü leishih,

⁶⁰hatü jomi Rebekah kü moihimanei eteke: “Hamei lamei, nüngi haja dok kü haja dahütuh; Nüngei li-i vepathülei chingnyüthü neütuh.”

⁶¹Hapheikü Rebekah hi pinnyülei chongphobü nyi temei gadu dokshangei uotü hapa shennyak mü leishih. Hapa keiha chongphobüi Rebekah müei leiteke.

⁶²Shaang Isakü Beer-lahai-roi leipü leiyei Negebei nyu.

⁶³Büpa om kü kahlei kamtei daiyei nyu, hatü büpa ngangei veishingkü utthü ngoijaei ee,

⁶⁴hatü Rebekah-ao ngangei veijü Isak eeyei pinnyüi ut dokshang leipü shülangi shüh-ei,

⁶⁵“Antepa kahlei jen lemei kamei heihküpü üpaang?” shei chongphobü kü phe. Chongphobüi, “Ngelei shembü-ü ha hih” shei e. Hanangkü pinnyüi ashak anei dhe kü jümlang.

⁶⁶Hahepak kü chongphobüi Isak kü büpai dükpü kemei ejateke.

⁶⁷Hapheikü Isaki Rebekah müei chenyü Sarah nyupü ashakshemei müei shü, hatü büpai Rebekah mü shem yemteke. Hanangkü pinnyü büpalei nyüha vai, hatü Isaki pinnyü kü bam, hatü chenyü didaipü young lakteke.