Read Phom Naga KAHBHAO 29 Bible Online

KAHBHAO 29 - Phom Naga bible

KAHBHAO 29

¹Hapheikü Jakobi nedoh-i büpalei yenlem kü daiyei heong nanglakthülei kahdok ngoi.

²Halei büpai yungkuk hük ha yopailei mi jem lemshi ee; mehenangkü mithü kü hapa yungkuk leipü yung yinghamteke. Hapa yungkuk kü küppü yaong longshi nyu,

³hatü mechem halei mithü thaihenshang, mi yombüthüi hapa yaong ngowtüktü yung yingtü shao hapa yaong leiyei yungkuk kü küphamteke.

⁴Jakobi mi yombüthü kü, “Ngelei jeihinaüthü, am meleipü peiküpa?” shei phe. “Hamü Haran leipü” shei jomphongi e.

⁵Büpai jomphong kü, “Amphongi Nahorlei chehü Laban nyingnyüla?” shei phe. Hathüi, “Nyingnyeih” shei e.

⁶Jakobi hathü kü, “Büpa meishi nyüla yo?” shei phe. Jomphongi, “Büpa meishi-üng nyüpeih, hatü hatouei büpalei yiükha Rachel mithü müei shaei nyüpeih” shei e.

⁷Büpai, “Vanghe longi nyüke; shaangü mithü om leihen hepak nevai; hanangkü yung yingtü het hahnüng deishihtuh” shei e.

⁸“Mithü peü thaihütü yungkuk leipü yaong mangngowtük thahshi hami ha düknüng neaokpih. Hapheikü mon hami mithü kü yung yingnyeih” shei hathüi e.

⁹Mechem Jakobi hathü mü shah eteiyei nyupa, Racheli mithü mütü pei; mehenangkü pinnyüao mi yombü nyuteke.

¹⁰Mechem Jakobi cheko Labanei yiükha Rachel, hatü mithü eepa, büpai yungkuk leipü yaong ngowtüktü chekolei mithü kü yung yingteke.

¹¹Hahepak kü Jakobi Rachel kü om kü jüptü wong mü thep.

¹²Büpai Rachel kü ngeiyü ampalei shem am hatü Rebekahlei hapeü hih shei e. Hanangkü pinnyüi mokei leiyei chepa kü e.

¹³Labani chenaüei hapeü Jakob jung danhinüng büpai büpa mü pongnüng mok; büpai büpa kü khaaitü om kü jüptü shemei müei lei, hatü Jakobi Laban kü lemphüli ejateke.

¹⁴Labani büpa kü, “Nüngü ngelei hapeü hatü ngelei iy” shei e. Jakob büpa mü lenyang hük nyuteke.

¹⁵Labani Jakob kü, “Nüngü ngelei shem am vaipai shei meheyao nevaipü kü dou dükei nyuhen je? Nüngi mehe lat yahhahhüpa ngei kü eshih” shei e.

¹⁶Shaang Labanei yiükha nyi nyu; hashongnyü-ü Leah hatü naü-eenyü-ü Rachel nyu.

¹⁷Leah-ü mük wong nekoh-i nyu, shejao Rachelü veijü bamhüshi hatü nela meishi nyu.

¹⁸Jakobü Rachel mü bamteiyei nyu, hatü büpai, “Ngei nüngei yiükha naü-eenyü shing bong nyet ngei nüng chongphohen hih” shei e.

¹⁹Labani, “Mih kü shuohlei meyü pinnyü-ü nüng kü shuohpüüng meihen; hanangkü ngei mü nyutuh” shei e.

²⁰Hanangkü Jakobi Rachel yahhen nangkü bong nyet thahshi chongphoei nyu, shejao büpai pinnyü kü bampü nangkü nyih maani mon keiha peihdai.

²¹Hapheikü Jakobi Laban kü, “Ngei kü nyüha yahshih, ngei pinnyü mü shem yemhen hih; mehenangkü itteipü nyih ngoiteke” shei e.

²²Hanangkü Labani shennyakthü peü kü nyükei yiükjing mo ühteke.

²³Shejao mechem om dhüpa, büpai cheha Leah müei deiyei Jakob kü shuoh, hatü büpai pinnyü mü paümteke.

²⁴Labani cheha chongphohen shingvaishi nyüha aa Zilpah shuoh.

²⁵Mechem shin paoei veipa, hapayü Leah vaidaitü nyu. Hanangkü Jakobi Laban kü, “Nüngi ngei kü mehe lingphopa? Ngeiyü Rachel yahhen nangkü nüng chongphopeih, vaila? Mehekei nüngi ngei kü lueilemnya?” shei e.

²⁶Labani, “Hamei vanglemi nya vaipü doi kü mangdai-i naüpeü shong doi daihen vanglem neshiüpih.

²⁷Hapa yiük yahpü hatyang peihhütuh; hapheikü ngei nüng kü Rachel shuohhen hih, hatü ha nangjei shao bong nyet nüngi ngei chongphotuh” shei e.

²⁸Jakobi hapakei chongphoei nyu. Büpai Leah mü hatyang hük peihpheikü Labani büpalei yiükha Rachel Jakobei nyüha vaihen shuoh.

²⁹Labani cheha Rachel chongphohen nyüha aa Bilhah shuoh.

³⁰Jakobi Rachel mü nyuei dai, hatü büpai Leah mao Rachel kü nyeishi bam. Büpai shao bong nyet thahshi Laban chongphoei nyu.

³¹Mechem SHEMBÜPAi Leah kü nebamnyu shei veiaokpa, SHEMBÜPAi Leahlei naü uoshing ap, shejao Rachelü nyülan leitükhü.

³²Leah büm nekongi lei, hatü yeshang hük büh. Pinnyüi naü kü, Reuben shei men. Mehenangkü pinnyüi, “SHEMBÜPAi ngelei mongshang eepü nangkü hingmei shaangü ngelei bahai ngei kü bamphahen” shei e.

³³Shao pinnyüi büm nekongi lei, hatü yeshang hük büh, hatü pinnyüi, “Ngei kü nebamnyu shei SHEMBÜPAi danpü nangkü büpai hayao ngei kü shuohpeih” shei e. Hanangkü pinnyüi naü kü Simeon shei men.

³⁴Shao pinnyüi büm nekongi lei, hatü yeshang hük büh, hatü pinnyüi, “Sheyü ngelei bahai ngei mü-üng nyeinya shepei khaaiyei chongkahen; mehenangkü ngei büpa kü yeshang jem büh-ei shuohtepih” shei e. Pinnyüi naü kü Levi shei men.

³⁵Shao pinnyüi büm nekongi lei, hatü yeshang hük büh, hatü pinnyüi, “Shinnyihpü shan keyü ngei SHEMBÜPAlei men longhen” shei e. Hanangkü pinnyüi naü kü Judah shei men. hajük kü pinnyüi hapeü ne-angi dohdai.