Read Phom Naga KAHBHAO 33 Bible Online

KAHBHAO 33 - Phom Naga bible

KAHBHAO 33

¹Shaang Jakob ngangei veishingkü Esau-i büpa mü shennyak kho ali mütü peijaei ee. Hanangkü büpai Leah hi Rachel nyi hatü aa lanyü nyi kü naüthü hanei shuoh.

²Büpai yiükphüthü mü jomei hapeüthü shelei shaonghü, hapheikü Leah hatü chehathü, hatü shompülei Rachel hi Joseph nyi mühüteke.

³Büpa jom shelei shaong, hatü chejei ngoiyaki nyetpa thahshi kahdokei aümei shateke.

⁴Shejao Esau büpa mü pongnüng heih-ei büpa kü üng kü khaaitü om kü jüp, hatü jiji thep.

⁵Hapheikü Esau chiyei veishingkü nyüha hapeüthü eeteke. “Nüng mü leipü hathü üamang?” shei phe. Jakobi, “Hathüyü nüngei chongphobü kü Kahvangi phahjiyei shuohpü hapeüthü khih” shei e.

⁶Hapheikü yiükphüthü jomei hapeüthü mü ngoiyei aümei sha;

⁷Hapa keiha Leah hatü hapeüthü ngoi hatü aümei sha, hatü shomshi Joseph hatü Rachel nyi ngoiyei aümei sha.

⁸Esau-i, “Ngei heüpü khongü meheang?” shei e. Jakobi, “Hathüyü nüngi phahjiyei nyemdeihpha shei shuohpeih” shei e.

⁹Shejao Esau-i, “Naüpeü, ngelei peü changshi nyüpeih; naüpeü, nüng shing tuhhahtuh” shei e.

¹⁰Jakobi, “Hapakei nevai, chingmeilemlingei nüngi phahjiyei deihjema nüngi ngelei lak leipü hapa thintho yahtuh; hingmei nüngei dhe eepeyü Kahvang dhe eepükei khih; nüngi ngei hapakei bamei yahteke.

¹¹Nüng shing leipü ngelei thintho yahtuh; mehenangkü Kahvangi ngei kü phahjiyei nopü nangkü ngei napü kemei nyüpeih” shei e. Hanangkü büpai büpa kü yahtuh shei nyean, hatü ha büpai yah.

¹²Hapheikü Esau-i, “Jen chemi leishah, ngeiyao nüng mü leiküshah” shei e.

¹³Shejao Jakobi büpa kü, “Hapeüthü wong nekoh, hatü yemhimak maanpüthü longi junghen mü nyüke, hatü hathü nyih hük lomei müei kamjema didaikemhen khih shei nüngi nyingei nyüke.

¹⁴Nüng ngei shekü leiyei chongkei, ngei youngmü yemhimak hatü hapeüthü kampü aimü leiyei Seirlei nüng touei ngoikahen” shei e.

¹⁵Hanangkü Esau-i, “Shejema ngelei shennyak hanei nüng mü tuhphapeih” shei e. Shejao büpai, “Mehekei nüngi ngei kü hajük shinshangei deihnya?” shei e.

¹⁶Hanangkü ha nyih Esau Seir yemei leidai.

¹⁷Shejao Jakob payü Sukkoth lemei lei, hatü büpai laophü hatü yemhimakthü shing tapshaü chan; hanangkü hapa shing kü Sukkoth shei men.

¹⁸Hapheikü Jakobi Paddan-Aram leipü Kanan kahdok Shekhem chingnyülei meishi leiyei ngoi, hatü chingnyü haolei baümtap ve,

¹⁹hatü büpai Shekhemei chepa Hamor leipü lop kho hük shuohtü kahdok hük shakei ashakshem veteke.

²⁰Halei büpai moidü hük ling, hatü ha kü El-Elohe Israel shei menteke.