Read Phom Naga KAHBHAO 35 Bible Online

KAHBHAO 35 - Phom Naga bible

KAHBHAO 35

¹Kahvangi Jakob kü, “Yaongtuh hatü Bethelei aongei halei nyutuh. Anjei Esau kü nüng nyemei daishingkü nüng touei vamküpü Kahvang kü halei moidü hük lingtuh” shei e.

²Hanangkü Jakobi büpa mü nyupü shem am peü kü, “Am mü nyupü kung amei kahvang peü yaktüktuh hatü am nyingi daütüktuh hatü ashakviha jeituh,

³hapheikü peikei, hatü ngei shanghahpü nyih ngei kü jangpü hatü ngei dailem peü kü ngei mü nyupü Kahvang kü moidü hük linghen jen Bethelei aongshah” shei e.

⁴Hanangkü jomei kung amei kahvang lajeithü hatü dhaongchü kemei Jakob kü shuoh, hatü Jakobi hathü peü Shekhem yopai leipü longkhampü phangei jotük.

⁵Jom daishingkü jom shonei nyupü chingnyüthü peü kü Kahvang leipü nyempü pei; hanangkü üpayao jom kü nechang.

⁶Jakobi büpa mü shennyakthü peü Kanan kahdok Luzlei (hapayü Bethel) pei,

⁷hatü büpa El-Bethel shei mentü moidü hük ling; mehenangkü büpai chejei toueipü laongei daishingkü hatouei büpa kü Kahvang shakei vamteke.

⁸Rebekah kü jungteipü Deborah di, hatü pinnyü Bethel mailei nyupü longkhampü phangei pinnyü mahng vüphong. Hanangkü hapa shing kü Allon-Bakuth shei men.

⁹Jakob Paddan-Aram leipü leijashingkü shao Kahvang büpa touei vamei moihimanteke.

¹⁰Kahvangi büpa kü, “Nüngei menü Jakob nyuteke, shejao hajük kü Jakob shei nenyükhen, shejao Israel shei nyükhen” shei e. Hanangkü büpa kü Israel shei nyük.

¹¹Kahvangi büpa kü, “Ngeiyü Jeiyong Kahvang: Nüng kü betjük jükei nanglak longi datuh; nüng kübü jat hük hatü jat khong longi vamhen, hatü nüng kübü ongthü vamhen.

¹²Ngei Abraham hatü Isak kü shuohpü kahdok ngei nüng kü shuohhen hatü nüng pheikü nüngei hühihathü kü shuohhen” shei e.

¹³Hapheikü büpa kü shah eshuohpü shing kübü Kahvang aongdai.

¹⁴Kahvangi shah eshuohpü shing kü Jakobi yaong shemnyü hük haong, hatü büpai hapa kü yiü moila shuoh hatü mainga langteke.

¹⁵Hanangkü Jakob kü Kahvangi shah eshuohpü shing kü Bethel shei men.

¹⁶Hapheikü nedoh-i jomphong Bethel leipü dai, hatü jomphong Ephrah leipü maani yanei daiyei nyushingkü Rachelü hapeü anghen tüngei nyu.

¹⁷Mechem pinnyü tüngei nyupa, pinnyü kü jungpü nyühai pinnyü kü, “Nüng tenyem, nüngi shao yeshang hük anghen khih” shei e.

¹⁸Pinnyü sheyü mongdang shemdaihen nyushi pinnyüi naü kü Ben-Oni shei men, shejao chepai Benjamin shei men.

¹⁹Hanangkü Rachel di, hatü pinnyü Ephrahlei (hapayü Bethlehem) aongpü lemei vüphong,

²⁰hatü Jakobi pinnyülei mahngchong kü shemnyü hük haong; hapa kü Rachelei mahngchong kübü shemnyü shei enyeih, hatü hapa shinnyih thahshi nyüke.

²¹Israel nedoh-i dai, hatü Eder shangdü haolei ashakshem veteke.

²²Mechem Israel hapa kahdokei nyupa, Reuben peiyei chepalei yiükphü Bilhah mü shi, hatü Israeli ha dan. Shaang Jakobei yeshangthü jom anpünyi nyu.

²³Leah-i bühpü: Reuben (hashongpa), Simeon, Levi, Judah, Issakhar, hatü Zebulun.

²⁴Racheli bühpü: Joseph, Benjamin.

²⁵Rachelei aa lanyü Bilhah-i bühpü: Dan, Naphtali.

²⁶Leahlei aa lanyü Zilpah-i bühpü: Gad, Asher. Hathüyü Paddan-Aramei nyushi Jakob kü bühjapü yeshangthü nyuteke.

²⁷Abraham hi Isak nyi benha kei nyupü Mamre nevaijü Kiriath-Arbalei (hapayü Hebron) Jakobi chepa Isak touei heih.

²⁸Shaang Jakobü nyübüh bong 180 nyu.

²⁹Jakob den luei viüei nyutü di, hatü cheha Esau hi Jakob nyi-i büpalei mahng vüteke.